ضحك و لعب و جد و حب

وجه لا أعرفه

2011-10-11T11:44:00.000-07:00

يومان و لم يغب هذا الوجه عن عينى لحظة واحدة,يطاردنى أينما ذهبت,يطاردنى مرة مؤنباً,مرة مواسياً,مرة مسترجعاً ذكريات وهمية لم نتشاركها سوياً كأشخاص و لكننا كنا شركاء فيها كمواطنين..أهرب منه فأتكلم و أتحدث و أتناقش و أحلل محاولة فهم ما حدث و ما يحدث و ما سيحدث,أعرف تماماً أنها محاولات وهمية على المستويين,فلن نفهم شيئاً و لم يتركنى صاحبنا أحظى بأى هدنة!!

هو ذلك الوجه الذى أعرفه و لا أعرفه..مينا دانيال.

كان للمجزرة ضحايا كثر,كانت فيها مشاهد تفطر القلب,مشاهد لن ينساها أى مصرى,لن ننسى مشهد بكاء "فيفيان" بجوار خطيبها و حبيبها –أو بالأحرى- جثته الملقاة على أرض المشرحة التى أكتظت بالشهداء باكية و رافضة تركه كعادة المحبين ,فهما هكذا دائماً,و لكن الجديد,أنه أصبح فى عالم اّخر!!

لن أنسى صور الجرحى و المصابين التى لا أقوى على ذكر أوصاف لها حتى!

لن أنسى ذلك المشهد المهيب فى الكاتدرائية وقت قداس الجنازة على جثامين الشهداء,وقت أن أزدحم المكان عن اّخره و لم يوجد موضع لقدم,كان الحضور مختلفين متشابهين,جمعهم الغضب و الحزن.

لن أنسى مبنى ماسبيرو المشؤوم-الذى أطلقت عليه الإعلامية هالة فهمى قلعة الخطيئة,- أنه أفضل تعبير قد يطلق على جهاز بهذا القذارة قط,جهاز لم يسمع عن معنى كلمة مهنية,جهاز لا يبالى بشرف الكلمة,اعتاد ان يكسب قوت يومه من "التطبيل" و إذا كان مبارك ذهب,فالمجلس موجود,و الطبلة موجودة,و الضحية دائماً هم المواطنون.مارس ماسبيرو تغطية لا تعتبر أفضل كثيراً من تغطيته لأحداث الثورة,حتى أنه مارس تحريضاً واضحاً و فجاً على حدوث فتنة طائفية كانت الأحداث بعيدة عنها كل البعد.

و على طريقة أجهزة الحاسب الاّلى,حدثت معلوماتى عن مشاهد دهس المتظاهرين بمدرعات الشرطة أنها قد تحدث أيضاً بمدرعات الجيش و بدبابته!! فلتحفظ يا عقلى فى ذاكرتك أن البيادة ليس لها دين,و لتلغى لوم منير على كلمته "كل العسكر حرامية"

و من بين كل هذه المشاهد التى أتجول بينها و أسترجعها طوال اليوم,كان حضور مينا الأقوى.

بينى و بينه تشابه كبير,كبير جداً,كلانا مهتم بالشأن العام,و كلانا لأنه انشغل بهذا الشأن اهتم بتلك اللعبة القذرة المسماة بالسياسة...أنا من منازلهم,و هو كان ناشطاً فى حركة"شباب من أجل العدالة و الحرية"..كان أفضل و أشجع منى.

كلانا يأس من محاولات الإصلاح و علم أنه لا بديل عن ثورة شعبية تقتلع الفساد من جذوره , تقلب الأوضاع عشان تتعدل فهى فى الأصل مقلوبة...علمت أنه كان من أكثر المؤيدين لدعاوى التظاهر يوم 25 يناير.

فوجدتنى أتخيل أنه خاض مثلى نقاشات حامية مع الزملاء و الأصدقاء يومى 24 و 25 يناير,حارب مريدى اليأس و صرخ فى وجههم,حتشوفوا!! و شعر بفرحة صباح يوم 26 يناير بذلك النصر المؤقت الذى حققه كجزء من كل, ليس فقط على ذلك النظام اللعين و لكن على اليأس,و الإحباط,و الكفر بالعدالة الإلهية و بالشعب,ربما أراد أن يصرخ فى وجه من كذب توقعاته واحداً وحداً ليقول له :أحنا صح كما تمنيت أنا أن أفعل,و لكننا توقفنا فى ترقب و فى سعادة مؤقتة بما تحقق و فى تطلع لما سوف يأتى.

و علمت أنه كان فى أوائل صفوف المتظاهرين يوم 28 يناير॥كان أفضل منى أيضاً يوم أن منعنى خوف الأهل-الذى أقدره- من المشاركة,لا أدرك كيف استقبل خبر نزول الجيش ,و لكنى أعتقد أنه هتف كما هتف الجميع-بعضهم عن اقتناع و بعضهم من باب تقديم السبت- :الجيش و الشعب إيد واحدة!!!و قد يكون احتفظ بصورة له مع الدبابة.

هدأت الأجواء نسبياً فكان فاصلاً من الهزل مع صديقه محمد فى الميدان,و كانت الغنوة:مينا,محمد,ليه الثورة جميلة و حلوة و أنت معايا؟! تلك الفواصل التى كانت تأجج الحماس و تشعل فتيل الثورة فى النفوس من جديد و تضيف إلى المستقبل تاريخاً مرحاً بقدر مجده.

ترى هل خدعه خطاب مبارك الثانى كما خدع الكثيرين؟ لا أظن ذلك أبداً, فهى ثورة كاملة يا إما بلاش.

و على كل حال,فجاء اليوم التالى للخطاب,يوم موقعة الجمل الدامى فكان من أوائل المدافعين عن الميدان,بل و أراد له الله أن يصاب برصاصة فى كتفه و أخرى فى ركبته,يذهب ليضمد جراحه و يعود لمشاركة الشباب فى الدفاع عن الميدان..شهد له الجميع ببسالته و إقدامه,اعتقد إنه لم يكن يظن أنه سينجو من ذلك اليوم على أية حال,و لكن المعجزة حدثت,و عاش بتذكار من الثورة..و كان أفضل منى أيضاً.

توالت الاحداث,تنحى مبارك,احتفلت أنا,احتفل مينا,احتفل المصريون جميعهم.

و عشنا أياماً على منحنى غير ثابت من المشاعر,بين اليأس و الإحباط,بين القلق و الإطمئنان,بين الغد و الأمس,بين الثأر و الدم,بين الشهداء و الجرحى .

من يومها أفكر يومياً فى شهداء الثورة,أنظر إليهم بإعجاب شديد,ليس فقط لبسالتهم و لما قدموه لذلك الوطن,بل لأن اصطفاء الله ل"شهيد" شىء تتعلق عليه كل الاّمال, الشهداء الذين لا يموتون,الأحياء عند الله الذين يرزقون,الذين كان لهم المجد دائماً...ليتنى كنت معهم,ليتنى نلت شرف هذا الإصطفاء,ليت محبتى لوطنى تأكدت بدم.

و فى كل جمعة تتجد الأمانى,و أعود سالمة للأسف..فعمر الشقى بقى.

أعتقد أن مينا أيضاُ كان يفكر مثلى,و لكنه كان أوفر حظاً منى,ليته يعرف كم كنت أتمنى أن أكون مكانه,أتراجع عن هذه الأمنية حينما يحضر أمامى مشهده و هو يهتف:الجيش و الشعب إيد واحدة, و مشهد اختراق رصاصة من تلك "اليد" لتمر من جسده النحيل و تخرج حاملة معها روحه و يا للعجب بوجه باسم سأظل أذكره,و سأذكر ذلك التشابه بينه و بين تشى جيفارا فى ملاحظة ذكية لرواد فيسبوك.

انضم صديقى –الذى لا أعرفه- إلى خالد سعيد,ميريام,أحمد بسيونى,سالى زهران,اللواء البطران...انضم لقائمة من قتلوا ظلماً و عدواناً , رحل تاركاً وراءه لنا حملاً ثقيلاً,حمل النهوض بهذا البلد لترقى بمستوى أحلامه هو و زملاؤه فى السماء.

يرقبوننا... الليلُ آذَنَ بالرحيلِ فَيا رفاقي .. تُصبحونَ على وَطَنْ !

هو و هى

2011-10-08T00:09:00.000-07:00

أى تشابه بين هذه الحالات و بين أى شخصية واقعية فهو عن قصد و عن عمد و استقصاد فكل واحد يحل مشاكله بينه و بين نفسه,او بين و بين دكتور نفسى,المهم بعيد عن المدونة :P

- حالة 1 -

مهان مكرم هو,ففتاته لم تسمح لأى مذكر سالم قط فى حياتها من الإقتراب منها أبداً,كانت دائماً تقف على شفا خطوط الزمالة و علاقات العمل,فهى تخشى على نفسها المجهول ألا و هو الحب و تخشى أن يتعلق أحدهم بحبال الأوهام و هى التى تعرف قدر نفسها جيداً و لذلك لا تؤمن بالصداقة المزعومة بين الفتاة و الفتى,لم تسمح لأى منهم إلا هو...كرمته بذلك,أهانته حينما أخبرته أنها ما سمحت بذلك إلا بعد أن علمت أنه لن يكون فى أحلامها يوماً॥قالتها بعد أن أصبحت كل أحلامه!!

-حالة 2 -

لا يكف عن تذكيرها بأنها رائعة,و لكنه يكره كل الفتيات!! كان نموذج للوفاء للجرح الأول।

حالة 3 --

هى شخصية قوية دائماُ و تصادمية أحياناً,حتى مع قلبها,عاملته يوم أن دق كما تعامل الجميع,فلأصارعنه حتى يثبت أنه أقوى منى!! و هذا ليس غريباً عليها,و لكن الجميع يخشى عليها لحظة أن تدرك أنها أضعف كثيراً مما تظن –بمقاييسها- هل ستعرف أن قوة المرء تكمن فى مشاعره؟!

حالة 4 -

-وجدته يحب بعض ما تحبه فانبهرت به,وجدته أبعد مما ظنت فأبتليت به,وجدت نفسها أسطح مما تعرف فاكتشفت فيها جانب مظلم ألا و هو الغباء,اكتشفت غباؤها وقت أن بدأ الاّخر يبهرها ببعض ما تحبه!!

-حالة 5 -

كانت تصرع حينما تبدأ علامات "الصح" أن توضع بجوار صفة صفة فى قائمتها الوهمية فيدق قلبها مع تكرار ذلك المشهد أو تحثه هى على الخفقان كنتيجة حتمية لوجود قائمة توافقات,و مع تصاعد الأحداث,كانت الأحداث دائماً تقف بسبب ما,هى الاّن تبحث عن الأسباب التى قد توقفها مجدداً لأن قائمتها لم تضم قائمتها أى علامة صح و برغم ذلك خفق الملعون من غير أن تستحثه!!

-حالة 6 -

يشعر أنها غامضة أيما غموض و يراها الجميع واضحة وضوح الشمس,تأخر كثيراً قبل أن يدرك أن هذا الشعور سببه رغبته فى أن يعرف عنها أكثر بكثير مما تجود هى به عليه।

- حالة 7 -

مغرم هو بالتصنيفات,و حياته لا تعرف الألوان,فهو بين الأبيض و الأسود,و العدو و العميل,و الطيب و الشرير,عرفها لفترة طويلة جداً و لم يبحث فى أى لحظة عن أن يصنفها هى ولا أن يصنف علاقتهما معاً,أدرك ذلك ثم أعترف لها بحبه।

- حالة 8-

خلافاتهما و اختلافاتهما كثيرة جداً جداً لدرجة توهم الجميع بأن كل يوم هو اّخر يوم لهما سوياً,هما يجدان فى رغبتهما ألا يصلا للنهاية سبباً كافياً للاستمرار.

حالة 9--

فعل كل ما يمكن لشخص أن يتخيله حتى يبقيها بعيدة عن حياته المأساوية,كانت محاولاته جديرة بأن يكسبها فى أسرع وقت।

-حالة 10 -

صراعهما قديم قدم الأزل,صراع بينها باستقلالها و قوة شخصيتها و اعتزازها بنفسها , و بين رغبته فى السيطرة عليها –لا لشىء- إلا للموروث التاريخى الذى أخبره أنه دائماً أعلى منها درجة,مهما كان هو و مهما كانت هى,و الكل يترقب نهاية أو بداية!!

حالة 11 --

أخبره والده عن جده عن جد جده عن جد جد جده أنه لا خير فى عقل امرأة,و أكد له معلمه و زميله و أخيه و صديقه,زرعوا فى عقله الفكرة لدرجة كانت كافية أن تحطمه حينما قابل من أقنعته أنه لا خير فى عقل رجل!!

-حالة 12 -

صعبة حياتهما سوياً لدرجة كبيرة,صعوبة تنهار انهيار مؤقت عن النظر لوجه صغيرتهما,و تتلاشى حين يقفان سوياُ أمام يد الله مبتهلين متضرعين

-حالة 13 -

كانت صفعات الحياة على وجهيهما كافية لأن يقنع أحدهما بالاّخر

-حالة 14 -

تعايشت مع فترة جمعت فيها بين جنبيها كل أنواع العقد فهى كانت تعلم أن لكل قصة فاشلة توابع,فجأة,تلاشت عقدها فأدركت أنها على مشارف حب جديد।

------------------------------------------
ملاحظات
-------

حالة: مستوحاة من صديقتى الجميلة "منى زكريا" ,فهى اتعودت تكتب عالفيسبوك حالات متقطعة كدة,فانا قلت أدبسها عشان تجمعهم و تنشرهم قريب :)
-التدوينة دى كانت بسبب اتفاق بينى و بين منى و نهى زكريا و إسراء بكر و أحمد فهمى على إننا نرجع للتدوين إنشالله ليوم واحد بس,و قد كان,شكلى رجعت لوحدى بس مش مشكلة,فعلاً التدوين من أكتر الحاجات اللى الواحد بيفتقدها,رغم إننا كلنا بنكتب على فيسبوك و على تويتر و على حيطة البيت و فى كل مكان,بس التدوين كان دايماً له إحساس مختلف,التدوين كمان حالة -لا مؤاخذة يا منى- :D
- صورة البوست العظيمة من رسمى المتواضع فى المحاضرات,اخترتها دعماً للإضراب لإصلاح الجامعات -حقول ايه العلاقة الصبر بس- لأن دى حتبقى اّخرة كل دكتور حيدرس و هو غير مؤهل لذلك,العيال حتفضل تكتب و تلون و ترسم فى محاضرته ,اّه بالمناسبة:مش عايزين فى الجامعة عتاولة,و لا عمداء أمن الدولة,و لا وكلاء أمن الدولة :D

يوم أن زرنا الجماعة

2011-07-18T16:11:00.000-07:00

هذا ما دار فى زيارة لمقر جماعة الإخوان المسلمين بمحافظة الإسكندرية قمت بها أنا و صديقتى أميرة مهدى,دونا هذه الأحداث سوياً و حاولنا إلتزام الحياد قدر المستطاع,كان هدف الزيارة نقاش مفتوح حول أداء الجماعة فى الفترة الأخيرة من باب توصيل وجهة نظر من خارج الجماعة كما اننا رأينا أن هذا ما يقتضيه واجبنا تجاه وطننا فى هذه المرحلة.

و قد أعددنا خطاب للمهندس(مدحت الحداد) رئيس المكتب الاداري للاخوان بالاسكندرية هذا نصه

http://www.4shared.com/document/lsCCrYcA/Letter.html

كان فى حاجة كدة شبه حالة تحفز من ساعة ما دخلنا,قابلنا واحد و قلناله أننا عاوزين نقابل حد مسئول هنا فى الجماعة عشان احنا لينا رأى فى أداء الجماعة الفترة اللى فاتت و أعتقد أنكم حترحبوا أنكم تسمعوا الرأى دة

رد و قالى:بالراحة طيب!!

أنا و الله كنت بتكلم بالراحة بس دا أدانى خلفية أن كأن أى نقد أو نصيحة بتتوجه يبقى لازم نكون مشمرين و متاّمرين و داخلين

خناقة ...ما علينا

بعدها دخلنا فعلاً نتكلم مع حد,هو أنا مش فاكرة اسم و منصب الحد اللى احنا قابلناه,بس كان حاجة عبد الله أو عبد الله حاجة و قال أثناء الكلام أنه عضو فى المكتب الإدارى لجماعة الإخوان فى محافظة الإسكندرية من سنتين.

اديناله نسخة قراها الأول..و أبدى استحساناً على إيجابيتنا و على الكلام اللي بيظهر خوف على مصر أولا و أخيرا...و اننا مش جايين نعادي ولا نهاجم..و أكد انه بيدعم النقد البناء..و جابلنا شاي و نسكافيه كمان و كذا مرة مردش عالموبايل عشان يكمل كلام معانا

لأ و الراجل التزم بالمواصفات اللي قلناهاله على الشاي و النسكافيه يعني :D:D

النسكافيه كان حلو الحمد لله

قال لواحد شوف الاخوات يشربوا ايه :) :)

إحم..نعود بقى...ندخل في الجد :S:S:S:S

بعد مقدمة لقد جئنا في سلم..و انه بما اننا في ثورة لسة ماخلصتش فده مش شأن داخلي للجماعة..لأ ده يخصنا كلنا عشان مصر...أثرنا أولا نقطة 27 مايو...و مقارنة بينه و بين 9 أبريل...في اليومين دول كان فيه عدم إجماع على مطلب طرحته بعض القوى...و في اليومين دول حصلت مشاكل...بس يوم 9 أبريل نزلتم..و يوم 27 ما نزلتوش

و بما اننا نزلنا في اليومين..فاللي حصل يوم 9 أبريل ان كلنا نزلنا..و أول ما وصلنا المنطقة العسكرية في مجموعتين بعينهم وقفوا يشتموا في الجيش وده كان غلط...بس في نفس الوقت أعدادنا كانت كتيرة جدا و بما ان ده ماكانش مطلب جماهيري إسقاط المشير فالهتاف بتاعهم كان أضعف ما يكون...و الناس اتضايقت منهم..و حصل نفس السيناريو في التحرير..ونقدر نقول اليوم نجح بشكل كبير

يوم 27 مايو بقى...أولا العدد ماكانش قليل...ثانيا الشباب بتوع الدستور أولاً حاولوا يهتفوا بالدستور أولا وماكانش فيه تفاعل معاهم وبالتالي كان الهتاف كله تأكيدا على شروط الثورة اللي ما اتحققتش...و احنا شفنا ده بعينينا...ليه بقى ما نزلتوش زي يوم 9 أبريل؟؟..تنزلوا و تزودوا عدد اللي ماكانوش بيقولوا الدستور أولاً لو دة مش مطلبكم..تنزلوا تأكدوا على بقية شروط الثورة اللي لسة مخلصتش؟!!

المهم قالنا عاللي حصل للأستاذ البرنس-قيادى فى الجماعة تم التعدى عليه يومها بالضرب على ما أذكر- يوم 9 أبريل...قولناله بس وجودكم كان مهم ليكم وللثورة...قاللي احنا على طول بنتضرب ودي ماكانتش أول مرة و و و...المهم و بالنسبة ليوم 27 قالنا أولاً ائتلاف الإسكندرية فيه واحد بس عن الإخوان و احنا رضينا بده رغم ان عددنا في الشارع أكبر...بس احنا رضينا عشان مصلحة الكل..و كنا واخدين قرار ان النزول يكون الجمعة اللي بعدها..جت 6 أبريل و أعلنوا النزول يوم 27 و أضيف مطلب الدستور أولاً..و احنا على هذا الأساس رفضنا النزول..قبلها بيومين بس تراجعوا عن المطلب ده بس احنا حسينا إن دي مؤامرة أو خديعة عشان كده مانزلناش.

و فى نقطة مشكلة 9 ابريل و 27 مايو و الهتافات اللى كانت ضد الإخوان و الحاجات دى,أنا قلتله إننا أكيد بندين محاولة إقصاء أى قوة وطنية فى الوقت دة و مش عاوزين تفريق لأن دا ضد مصلحة مصر كلها,بس لاحظ أن قبل 9 إبريل كان 1 إبريل,اليوم اللى الجماعة منزلتش فيه و كالعادة مارست التشكيك فى اللى نازلين و هجوم شديد جداً عليهم و دا كمان اللى حصل 27 مايو,فمنقدرش نلوم الناس على غلط و أحنا نتحمل جزء منه,مش عشان موقف الجماعة أنها متنزلش طبعاً,ما الوسط مثلاً منزلش 27 مايو و محدش زعل منه,الغلط فى إسلوب التشكيك و إلقاء التهم

هو قال أن البيان اللى اتوزع يوم 27 و اتفهم منه أن الجماعة بتتهم اللى نازلين بإنهم شيوعين و حاجات كدة هما راجعوه و قرروا إنها كانت غلطة و صدرت تعليمات أن الأسلوب دة لا يتبع تانى

هنا اتناقشنا فى مشكلة أن تعليماتهم داخلية,و مراجعاتهم داخلية,و الإعتذار عن الغلط بردو داخلى,بمعنى أن اللى اتغلط فيهم مش عارفين حاجة عن كل دة,و لو كان طلع بيان اعتذار كانت النفوس صفيت و حالة التأهب ضد الجماعة دى كمان خلصت!!...و مكنش فى منه رد واضح!!

أنا كنت بقارن عشان أقول مش وقته نسيب الشارع...و الشارع بيعرف يردد أنهي هتاف و أنهي مطالب بالضبط و وجودكم كان هيأكد الإجماع ان مفيش دستور أولاً..تاني رجوع لمنطق المؤامرة...قولناله طيب مش نازل دي ممكن نختلف فيها..انما تخون اللي نازلين فده مرفوض...إخوان أونلاين من الآخر سياستها التحريرية لازم تتغير

فقالنا فعلا دي كانت غلطة...بس دي غلطة فردية واحنا هنبلغ القاهرة بس مالناش سلطة عليهم !!!

سألناه مش الموقع بيمثلكم ولا لأ؟؟...لو بيمثلكم يبقى تغيروا السياسة التحريرية..لو لأ قولوا مش بتاعنا وريحوا نفسكم...و كمان خبر بلطجية التحرير(يوم 28 يونية) ده كان مستفز

قالنا فعلا دي كمان غلطة فردية...والخطأ وارد...بس فعلا كان في بلطجية...و حكالنا عاللي حصل يوم الجمعة(1/7) في القائد...و ان كان في بلطجية و اللي 6 أبريل عملوه...و انهم عشان كده مش بينزلوا..قولتله لو كان المفروض نسيب الميدان عشان فيه بلطجية كنا سيبنا الميدان بقى يوم موقعة الجمال.

و برضه في موضوع إخوان أونلاين..قالنا هو عشان ده منبرنا الإعلامي الوحيد..و الناس مركزين معانا وبيعتبرونا ملايكة ومش بنغلط عشان كده أي غلطة بتتحط تحت الميكروسكوب..انما القوى التانية معاها أبواق إعلامية و بيقولوا اللي هما عايزينه

دخلنا بقى في إصرارهم المستميت على عدم الاعتذار..حضرتك بتقول احنا مش ملايكة وبنغلط...جميييييييييل...إيه حكاية بقى عدم الاعتذار دي؟؟؟

ليه دايما انتوا مظلومين و أي حد يغلطكم يبقى بيتآمر ووحش و و و و..من الآخر كده تصريحات صبحي صالح

بدأ كلامه بأن الأستاذ صبحي صالح من أول ما اختير في لجنة التعديلات الدستورية..و بدأت حملة رهيبة لتشويهه و تتبع سقطاته و و و و..و كان ناقص يدينا مناديل عشان نعيط بقى على الاضطهاد اللي شافوه من أيام عبد الناصر وحتى بعد الثورة برضه مضهدين و و و و

قولناله على فكرة احنا أهالينا كانوا في فترة من حياتهم إخوان..و احنا عارفين كويس قوي قد إيه المعاناة اللي شفتوها...و في هذه اللحظات رن هاتفي على نغمة "اتجمعوا العشاق في سجن القلعة":)

و كانت أغلب الردود رايحة فى سكة التربص اللى الناس متربصاه للإخوان و التاّمر عليهم و أنهم استحملوا كتير من 80 سنة-و دة محدش شكك فيه,و دة كان واجبهم و واجب الكل,و دة ميديش حد فضل على حد لأنه الواجب و إلا نبقى بنعيد مشكلة الجيش لما كل يوم يطلع يقولنا أصل أنا مضربتكمش,دا كان واجبك,و مش عمل الواجب هو اللى بيخلق البطولة,بس لو كان ضربنا كان حيبقى مجرم-المهم

كان ردنا دايماً فى نقطة التربص دى أنى أنا لو مصر كلها متربصالى و أنا مش بغلط دى مش مشكلة,إنما اللى بيغلط هو اللى بيخلى الناس تتكلم على غلطته,خصوصاً أن كل الحالات دى كانت مشاكل بالفعل حصلت ,محدش جاب حاجة من عنده يعنى حتى لو كانوا مستنيين على غلطة.

فى نقطة النقاش فى مشكلة صبحى صالح كمان أنا سألت سؤال مباشر و مخدتش عليه رد,السؤال هو ليه أ/صبحى بيتكلم و كأنه بيمثل الإسلام و دايماً اللى عاوز يختلف مع طرحه للدولة يبقى عاوز يختلف مع 600 اّية فى القراّن,و الهجوم عليه هجوم مدبر على الإسلام؟! سألت هل دى رؤية الجماعة كلها ولا دا كلامه هو بس؟هل فعلاً فى حد فى مصر أو فى أى مكان بيمثل الإسلام؟هنا ضحك و قال أنه مبسوط أننا بعد 25 يناير فى شباب بتتكلم و بتتناقش و اعتذر عن الرد لأنه كان عنده معاد,بصراحة هو مش غلطان أحنا اللى روحنا من غير ميعاد,بس فين,الاستقتال طبع أصيل فى المواطن المصرى .

المهم أنا عشان أحاول أنهي الجدل...قولتله ممكن تكون التصريحات دي من قبل الثورة و انه كان يقصد ان اللي تقدر تستحمل ظروف الشاب الإخواني لازم تكون إخوانية ومتعودة عالجو ده..ولو أن دي مش حقيقة برضه...بس ما علينا...فهو فرح جدا و قاللي أيوة صح

قولتله لأ استنى...إيه حكاية الذي هو أدنى دي؟؟؟؟...يعني ينفع كده؟؟؟

دي مالهاش علاقة يعني...المهم قعد يقوللنا لأ ليها أسباب بس مش راضي يقول....أصل الوقت مش هيكفي...قولتله على فكرة بقى دكتور العوا كمان معمول ضده حملة قوية جدا...بس لما طلع مع مصطفى حسني وقال التصويت بنعم واجب..بعدها بيوم طلع اعتذر على النت وفي ندوته و في كل مكان..ومفيش صحفي قدر يمسك عليه الكلمة..و بعدين احنا غسلنا ساويرس و حسين يعقوب لما غلطوا وقالوا كنا بنهزر...إيه حكاية الهزار معاكو بقى؟؟؟...يطلع يعتذر ويخلصنا...

أنا فاكرة إني قولتله إن حكاية الأخوات دي حسستني بإهانة..قاللي لأ مش إهانة ولا حاجة...ماهو ممكن واحدة تكون كويسة وهي مش من الأخوات برضه :D:D:D

كان للأسف ماينفعش نحتد بالنقاش أكتر من كده عشان مش صح...

بشكل عام فى مشاكل ظهرت فى الحوار أكتر من مرة أو نقدر نقول عليها سمة عامة للحوار,أولها مشكلة التاّمر اللى كان محسسنا بيها طول الوقت,و كمان التخريم من الموضوع و الدخول فى مواضيع تانية و دة حصل أكتر من مرة...فكرنى برباعية جاهين بتاع علم اللوع أكبر كتاب فى الأرض,للأسف محستش أن الكلام مستقيم و أننا بنتكلم فى موضوع واحد,كنا بنتكلم فى وادى و فى الغالب الرد فى وادى تانى,أو بمعنى تانى كان سامعنا و مش سامعنا,

احنا كنا من وقت للتانى بنأكد أننا جينا بس عشان مصلحة بلدنا و عشان اتعلمنا أن رأي أن حد فى أداء أى جهة بيحسن الأداء دة لو فعلاً سمعوا لرأيه...لكن دا لم يقلل من التوتر اللى كان فى اللقاء عموماً

أحنا سيبنا أرقام تلفوناتنا عشان لو فى أى رد عالجواب اللى احنا سبناه أو لو فى أى ملاحظات بس محدش كلمنا لحد دلوقتى!!

فى كل الأحوال,هى كانت مغامرة و تجرية جديدة نفسنا نكررها مع كل القوى الوطنية اللى فى بلدنا و اهو يا يبقى بيننا و بينهم كلهم عيش و شاى و نسكافيه يا ميطلعوش فى كرم ضيافة الجماعة:)

و لمحاولة إلتزام الحادية,م/أحمد حسن(من شباب الإخوان وصاحب فكرة الزيارة دى بما أنه من دعاة الإصلاح فى شباب الجماعة ) اطلع على الخطاب المرسل و على تفاصيل اللقاء و كان هذا رده كالاّتى

اولا جزاكم الله خير على تلبية الدعوة

واللى هدفها الضغط ومش شرط الاستجابة

الجزء الاول من الخطاب اتفق فيه بنسبة مية فى المية

الجزء التاني للاسف عندي عليه تعليقات كتير اوجزها فى ::

فصل الحزب والقضية دي صعبة ومش هيتم الفصل غير خلال سنتين على الاقل النية موجودة والتنفيذ مشتبك وصعب وبالتالي الفصل لن يتم غير بالتجربة والخطأ وده هياخد وقت لكن الارادة موجودة

قانونية الجماعة

الجماعة واخدة حكم قضائي بأنها لاينطبق عليها قرار حل الاحزاب اللى اصدره عبد الناصر وبالتالي فهي غير محظورة مشكلتها انها لم تكيف نفسها على قانون الجمعيات الجديد بتاع سنة حاجة وسبعين ده

اتكلمنا مع الاخوة فى النقطة دي فكان ردهم انه ان شاء الله فيه شبه اجماع من هيئات المجتمع المدني على تعديل القانون لما فيه من عوار وقيود وتشويه والتكييف القانوني هيتم بمجرد تعدبل القانون

موضوع المعارض الخيرية وجهة نظرى المتعارضة

الجماعة هي المختصة بالامور الدعوية والمجتمعية وكافة النشاطات ماعدا السياسي التفصيلي منها

وبالتالي المعارض دى نشاط مجتمعي فمفيش مشكلة انه يكون تحت اسم الاخوان

بالعكس ده الاصح انه يكون تحت اسم الجماعة مش الحزب

ورأيي الشخصي الاولى من المعارض اقامة مشاريع انتاجية احسن من المسكنات دي

موضوع النقابات الموازية محض افتراء صحفي

دمتم بخير

وجزاكم الله خيرا على مجهودكم ووقتكم ربنا يعينكم :))

و لحق الرد برضه,دى شهادة تانية للى حصل يوم7/1 عشان منبقاش ظلمنا أى طرف

https://www.facebook.com/notes/mohamed-tarek/%D8%B4%D8%A7%D9%87%D8%AF-%D8%B9%D9%8A%D8%A7%D9%86-%D8%B9%D9%84%D9%89-%D9%85%D8%A7-%D8%AC%D8%B1%D9%89-%D9%81%D9%89-%D8%A7%D9%84%D9%82%D8%A7%D8%A6%D8%AF-%D8%A5%D8%A8%D8%B1%D8%A7%D9%87%D9%8A%D9%85-%D8%A8%D8%A7%D9%84%D8%A5%D8%B3%D9%83%D9%86%D8%AF%D8%B1%D9%8A%D8%A9-%D9%8A%D9%88%D9%85-17/231815340173807

تأملات فلسفية فى الحياة الحلمنتيشية

2011-07-03T04:29:00.001-07:00

الشعر الحملنتيشى:نوع من الشعر الفكاهي ويعتبر الشاعر حسن شفيق المصري أول من أطلق هذا الإسم عليه ويبدو من الكلمة أنها كلمة منحوتة . أي أنها نحتت من كلمتين ( حلا ) من حلا الشيء حلاوة . و ( منتيشي ) من ( نتش ) الشيء إذا جذبه . والنتاش في العامية المصرية هو الفشار أو الكذاب . وبهذا تكون الكلمة اما ان تعني النتش الحلو أو الفشر اللذيذ

.

هذا ما جمعته من قصاقيص ورق كتير,مواضيع متفرقة و كلام مختلف متشابه يجمعه صفة واحدة أنه كلام ابن عم حديت ابن خالة رغى فقط ولا غير,بس حلمنتيشى عشان هى الدنيا بطبيعتها فيها الكثير من السخرية!!

أحسن ما فيها العشق و المعشقة

و شويتين الضحك و التريقة

شفت الحية,لفيت,لقيت الألذ

تغييرها,و دا يعنى التعب و الشقا

و عجبى!!

- بدأت اتأكد أن الحياة الصاخبة التى نعيشها طوال الوقت بحاجة من وقت إلى اّخر إلى لمسات من الهدوء الذى يمكن الإنسان من التأمل عند بعد من حياته,حتى لو لم تكن من محبى الهدوء زى حالاتى.

-يقارب مصطلح التأمل عند بعد التحكم عن بعد,فهل تأمل حياتنا يمكننا من التحكم فيها بعد فترة بسبب مشاهدتها بعقلانية.

-حاجات كتير وجودها بيضايقنا,و لو غابت...حنتضايق بردو,و يظل الإنسان هو الكائن الوحيد اللى العكننة عنده غية رغم أنه المفروض عايش بيدور عالسعادة!!

-الربيع من أجمل فصول السنة و الورد جميل على رأى ثومة,بس الشتاء أحلى ليه بقى؟عشان هو الجندى المجهول اللى ورا كل الحاجات الحلوة دى و ياما ناس و حاجات فى الصورة ملهاش قيمة و اللى وراهم أهم.

عـوّدَنا الدّهـرُ علـى

تعاقُـبِ الفصـولْ .

ينطَلِقُ الرَبيـعُ في ربيعِـهِ

.. فيبلغُ الذُّبـولْ !

وَيهجُـمُ الصّيفُ بجيشِ نـارِهِ

.. فَيسحـبُ الذُّيولْ !

ويعتلـي الخريفُ مَـدَّ طَيشِـهِ

.. فَيُـدرِكُ القُفـولْ !

ويصعَـدُ الشّتاءُ مجنـوناً إلى ذُرْوَتِـهِ

.. ليبـدأَ النّزولْ !

(أحمد مطر)

-اكتشفت إنى لما بكتب بالقلم الرصاص بتلخبط اكتر عشان عارفة إنى ممكن أصلح غلطاتى,واضح إننا فعلاً لما بنلاقى حاجة ممكن تتصلح بنستقل بيها للأسف الشديد بدل ما نقدر إنها إديتنا الفرصة نصلح ,مش الفكرة فى القلم الرصاص إنما مشكلة حاجات تانية كتير فى حياتنا و طبيعة بشرية.

-قالك أهم لحظة فى حياتنا هى دلوقتى,مش بكرة,مش امبارح,مقامك حيث أقامك,و أجمل لحظة ممكن نوصلها هى اللى حتوصلنا لأجمل عمر,و اتقان اللحظة اتقان للعمر كله يعنى دلوقتى هو المهم,لو مكاننا فى وسط ناس يببقى اللى المفروض يتعمل إننا نعاملهم كويس و نعامل ربنا فيهم,لوحدنا يبقى الإخلاص مع نفسنا قبل إى حاجة تانية ,شغل يبقى المطلوب"نعمل" أياً كان العمل ايه هو ,و لو ماسكين ورقة و قلم يبقى حق و شرف الكلمة و أمانة تسجيل التاريخ حتى لو تاريخنا إحنا الشخصى ..و دى تبقى أحلى خدمة تخدم بيها العالم.

-فكرة العمل دى فكرة محترمة جداً,بجد أى حد بيعمل أى حاجة يستحق أنه يحترم,حتى العمل الإسود,أهو مصير اللى بيغلط يعرف غلطه و يتغير إنما الناس ال Neutral دول معتقدش أنهم ممكن يتغيروا,هما مش شايفين حاجة تستحق التغيير أصلاً.

-كل حاجة حلوة لازم يكون فيها نسبة تعب تتناسب طردياً مع كم السعادة اللى حتمنحها الحاجة دى لينا بعد كدة.

-تبتعد قدر ما تبتعد عن مصدر الصوت و لكنك تظل تستمع لها,لها مدى يفوق الحواس,فيروزى ملائكى مداها....هى فيروز.

-حلوة الديموقراطية,حلوة التعددية,حلوة الجامعة,وحشة السياسة,حلوة الحياة حتى فى أواخرها,حلوة الحياة حتى و لو فتافيت.

-الغنا دى حاجة عظيمة,الغنوة خطوة و صديق,الغنوة خطوة و طريق,سحر المغنى دا روح بتغنى لروح على رأى منير و يا مين يفهم.

-كل انتماء بيقول حاجة عن صاحبه,سواء لفكرة أو لتيار أو لحزب او لنوع مزيكا أو لنوع أفلام أو لصحبة أو لبلد...منها تقرا الشخصيات,الناس عادة بتتقرا بحاجات كتير..دى اهمها.

-الكتابة دى دنيا تانية,بيها تعيش عمرك مرتين,عمرك و عمر استرجاعك لعمرك و أصدق حاجات تعرفها عن نفسك اللى تعرفها و أنت بتكتب

عندي قلم

ممتلئٌ يبحث عن دفتر

و الدفتر يبحث عن شعر

و الشعر بأعماقي مضمر

و ضميري يبحث عن أمن

و الأمن مقيم في المخفر

و المخفر يبحث عن قلم

- عندي قلم

- وقع يا كلب على المحضر

(أحمد مطر)

-أجمل و أوقع حاجة فى بلدنا أنك كمواطن تقضيها Suspense تعد كدة تتفرج و تقول يا ترى ايه اللى ممكن يحصل؟فلو كان إبراهيم الفقى قال عيش بالأمل فأنا شايفة أن العيشة بال Suspense حاجة حلوة بردو J

أنا اللي بالأمر المحال اغتــــــــــــوي

شفت القمر نطيت لفوق في الهـــــوا

طلته ما طلتوش إيه انا يهمنـــــــــي

و ليه .. ما دام بالنشوة قلبي ارتوي

عجبي !!

-أد ايه جميل إننا نعيش بالأمل,نعيش و عنينا على بكرة من غير ما نضيع النهاردة,فى نفس ذات بلدنا,دا أنسب حل لمشاكل كتير,لازم نبص للى جاى و يعوض علينا ربنا عوض الصابرين فى اللى راح و فى اللى حاصل دلوقتى,أد ايه جميل إنها كل ما تضلم فى وشك تبص لبعيد و تقول مش دة اّخر المطاف ولا عمر الضلمة بتطول ولا عمر النور حتى بيفضل,المهم دايماً نكون عارفين أن(بكرة جايب نهار,يستاهل المشوار)و لو مجبش نهار نستنى بعد بكرة...نستنى بعد بعده...بعد بعد بعده J

أقــولْ :

الشمسُ لا تـزولْ

بلْ تنحَـني

لِمحْـوِ ليلٍ آخَـرٍ

.. في سـاعةِ الأُفولْ !

أحمد مطر))

-الحكمة ضالة المؤمن و المعرفة ثم المعرفة هى الضمان الوحيد لأن يحظى الإنسان بإنسانيته و يبقى مختلف عن الدبدوب,بعد المعرفة و البحث ييجى إعمال العقل و الحكم على أى حاجة فى الدنيا,و لكل معاييره فى الحكم على الأشياء,أما لى فأنا ضد كل ما هو غير إنسانى –و مش كلنا إنسان بتاعة سميرة سعيد- أنا مع الإنسانية كما أرادها الله لخلقه قولاً و فعلاً و تكريماً للبشر,فكل من عاش لذلك بحبه و كل من وضع الحرية و الإنسانية تحت رجليه ظاناً أنها سترفعه أنا ضده .

قال لزوجه: اسكتي . و قال لابنه: ا نكتم.

صوتكما يجعلني مشوش التفكير.

لا تنبسا بكلمةٍ أريد أن أكتب عن

حرية التعبير !

(أحمد مطر)

-مش مهم الشغل,المهم تظبيط الشغل-قاعدة مصرية قديمة-و مش مهم القرارات ولا الاختيارات على كبرها أو صغرها,الأهم فعلاً أن تجد سعادتك فيما اخترته,حتى لو مكنش القرار قرارك بنسبة 100% ,أن تجد فيه مساحتك الخاصة هو ما يكونك و يشكلك..الشغف و ليس التعود.

-ما كانت الأوطان إلا ليكون الإنتماء,و ما كان الإنتماء إلا ليكون الأمان,و ما كان الأمان إلا ليكون الإنسان,هل من شخص يخبرنى عن سبب لتواجد هذا الوطن حتى الاّن!!

لو سقط الثقب من الإبرة!

لو هوت الحفرة في حفرة!

لو سكِرت قنينة خـمره!

لو مات الضِّحك من الحسرة!

لو قص الغيم أظافره

لو أنجبت النسمة صخرة!

فسأؤمن في صحة هذا

وأُقِرُّ وأبصِم بالعشرة.

لكنْ.. لن أؤمن بالمرة

أن بأوطاني أوطانا

وأن بحاكمها أملاً

أن يصبح، يوماً، إنسانا

أو أن بها أدنى فرق

ما بين الكلمة والعورة

أو أن الشعب بها حر

أو أن الحرية.. حرة !

(أحمد مطر)

-فى حب يونس و عزيزة عبرة,ليت يونس كان من محبى الحبسة و حب التملك,أو يا ريت كانت عزيزة من محبى الحرية...المحصلة إختلافات تؤدى للفشل,الحب و أشياء أخرى يعنى!!

-عابرى الشارع فى مصر نوعين,نوع يبقى فى صف مستنى الفارس المغوار اللى حييجى من بعيييييييد بالطبل و الزراغيد عشان يعديهم,و نوع لا بيبص يمين و لا شمال و بيديها على طول,المتسرع و المتواكل اّفة المجتمع.

للأسف من صغر سنى

علتى...يزهق قوام

أبتدى و اسخن لكنى

بعد فترة أبرد و انام

كله فى الاّخر بميل له

و كله فى الاّخر بمله

حتى لو كان شىء فاضله

خطوة واحدة عالختام!!

(مصطفى إبراهيم)

أنا و وطنى

2011-01-02T15:39:00.000-08:00

إلتقينا ذات يوم...كان أول يوم فى عام دراسى جديد لقاء عادى لم أكن اعرف ما سيحدث بعده -ككل اللقاءات- عرفتنا صديقة قديمة قائلة:هذه( دينا)...و هذه (دينا) أيضاً....أعلم أنكم ستكونون أصدقاء و صدقت نبوءتها و ببعد نظرها أصابت هى:فتاة جميلة الملامح و الشخصية....انعكس جمالها تقديراً للجمال ذاته و لكل ما يحاكيه من فن و ذوق و رقى هى فتاة مسيحية متدينة....روح التسامح و الحب فى دينها فاضت منها على كل من حولها بل و على كل ما حولها لا أكاد أراها حتى أتذكر قول الله-عز و جل_ (لَتَجِدَنَّ أَقْرَبَهُمْ مَوَدَّةً لِلَّذِينَ آمَنُوا الَّذِينَ قَالُوا إِنَّا نَصَارَى ذَلِكَ بِأَنَّ مِنْهُمْ قِسِّيسِينَ وَرُهْبَانًا وَأَنَّهُمْ لَا يَسْتَكْبِرُونَ
هى المودة....هى الكلمة التى تصف ما بينى و بينها
و بسرعة تطورت صداقتنا و عرف كل منا الاّخر أكثر و منح كل منا للاّخر ثقته سريعاً
تشاركنا فى كل شىء
تعلمنا سوياً
مشينا سوياً
سمعنا نفس المزيكا(منير و فيروز طبعاً)
أكلنا من نفس الطعام و هو فى الغالب-كبدة أسكندرانى-نقاطعها حينما تصوم هى ,و تقاطع هى معى كل الطعام طوال شهر رمضان إلى اّذان المغرب
كنت قبل أن أتوجه لها بالعذر لأنى سأتكرها لأتوجه لأداء الصلاة كانت تقول لى:يلا نصلى
أعرف من حكاويها كل شخص فى الكنيسة التى تتردد عليها....لكل منهم صورة فى مخيلتى...أفرح لفرحهم و أحزن لحزنهم و ما زلت لا أعرفهم
فى كل ضائقة كانت تقول لى:صلى الفجر و أدعيلى....فأرد قائلة:و أنتى صليلى
لطالما تجاذبنا أطراف الحديث.....لطالما حلمنا بوطن أفضل....بل بوطننا أفضل
هى -بطبيعتها الرقيقة-ترى فى حلمها فن راقى و شوارع نظيفة و قلوب محبة
و أنا أرى فى حلمى وطن حر و عادل
و كلانا شيد قصور أحلامه على أرض نفس الوطن
كلانا كان يهنىء الاّخر بيوم مولده فى أول دقيقة فى سنته الجديدة....ليس ذلك حباً فى تقليد المتعارف عليه-فلطالما تمرد كلانا على الكثير من التقاليد البالية-بل لأننا حقاً سعداء بوجود كل منا فى حياة الاّخر
أعرف أن (دينا) حين تصلى تذكرنى و تذكر مصر....و هى تعرف أنى كذلك أذكرها و أذكر وطننا

كنت أفكر فى كل ذلك فى الساعات الأولى من العام الجديد....وقتها سمعت أنباء الخبر المأساوى لحادث الإسكندرية
تتابعت الأفكار:ترى هل حدث لها مكروه؟
أحاول طرد هذه الأفكار جاهدة من عقلى و لكنى لا أستطيع
كيف سيخاطب كل منا الاّخر بعد ذلك؟
هى تعرف أن ما حدث لا علاقة له بالإسلام-ولا بأى دين-و أنا أعرف أنها لن تدع الإنفعال يسيطر عليها....و حتى لو تمكن الإنفعال منها فليس فى قلبها حقد أو كره يخرج فى مثل هذه الأوقات...فقط مودة....فقط محبة
هل ستشكرنى إذا قدمت لها العزاء فى شهداءنا كما يفعل الغرباء؟
ماذا سأقول لها إذا سألتنى:ليه؟و بأى ذنب؟!!
كانت ليلة طويلة طويلة.....لم أذق فيها للنوم طعماً كمداً على وطنى
و طلع الصبح...رأيت قائمة المصابين و الشهداء
فيها من أعرفه.....فيها من درس لى و تلقيت على يده علماً....فيها من لا أعرفه و من لم أره من قبل.....فيها ابناء وطنى
فيها بشر
هاتفت( دينا)....الحزن فى صوتى و فى صوتها
هونت علىّ....و حاولت أن أهون عليها
ألمنا واحد و وجعنا واحد
و حلمنا لهذا الوطن واحد
أرض واسعة يعيش عليها الكل بمنتهى السلام و الأمان و الحب.....يرى مواطنوه الأمل فيه- و لا يكابدوا من أجله-....يشعروا بانتماء له -و لا يجاهدوا أنفسهم من أجل ذلك-....وطن منح الجميع حباً فمنحوه أكثر
القضية ليست قضية اثنين...هى قضية شعب كامل روابطه أقوى مما يظن الكثيرون....هى قضية هذه الأرض التى استشهد من أجلها المسلم و المسيحى فاختلطت دماؤهم و سالت على رمالها
لا لستم مسلمين....لا لستم مصريين....لا لن تفلحوا
لا أعرف كيف كتبت هذه الكلمات و لم؟
كنت على اقتناع -و ما زلت-أن أى كلمات لن تخفف من وقع ما حدث....أن الوقت وقت أفعال
أن هذه النار لن تطفؤها إلا محاسبة سريعة لكل من أراق دم مواطناً مصرياً على هذه الأرض
و لكن ليت كلماتى تذكر كل منا بكل مينا و مايكل و ايرينى و بولين و دينا فى حياة كل فاطمة و محمد و أحمد و زينب
ليت كلماتى تساهم فى لصق ما يحاول البعض كسره
ليتنى أقف أمام الله يوم القيامة و فى يد كلمتى هذه و فى اليد الأخرى ايدى شهداء أول يوم فى العام لأقول لربى:.حاولت أن أبقى على هذا الوطن

فى بيتنا....صالون

2010-12-14T17:09:00.000-08:00

اّه لو كنت عاصرت هذا الزمن الذهبى...وقت أن كان المبدعون و الأدباء و الفلاسفة و المفكرون و المطربون و كبار رجال الدين و السياسة و الإقتصاد يجتمعون فى مناسبة غير ما قبل موسم الإنتخابات فى مقابلاتهم التاريخية مع السيد الرئيس-طويل العمر يطول عمره و يزهزه عصره و ينصره على مين يعاديه-
سمعت كثيراً عما كان يسمى قديماً (بالصالون الأدبى)...لم أره بأم عينى قط....أسمع عن رواد له...أسمع عن سيدات و رجالات نجحوا فى جمع رموز مصرية كبيرة فى صالوناتهم و دائماً أتساءل لماذا انقرضت هذه الفكرة مع ما انقرض؟ و أعود لأقول...اّه لو أنى رأيت زمناً للصالون فيه ارتباطاً بشىء اّخر غير الزواجات الملفقة و الضيوف الغير مرغوب فيهم
اّه لو تعود هذه العادة الجميلة لزماننا هذا....و تفتح على مصراعيها لتستقبل الشباب ولا تحرمهم شرف مقابلة الكبار و تبادل الخبرات و التعليق على الأحداث و مشاركة الأفراح و الأطراح
و سرحت بخيالى و تخيلت أن يتحول صالون منزلى المتواضع-أو أى صالون-إلى هذا الجمع الموقر

أمر بعينى قبل أن أدخل على ضيوفنا لهذه الليلة و أشعر براحة شديدة...أدخل بفضول الأطفال و أمر على كل منهم أكلمه و أحدثه

يجلس بجوار الباب فضيلة الشيخ /محمد الغزالى
أحييه بتحية الإسلام....تحية الإسلام الواسع الذى عرّفنا به....أشكره على أن استطاع أن يصل بنا إلى جوهر الإسلام:العدل و الحرية
أشكره على أن كانت كتبه و افكاره بشيراً لنا بأن الوسطية ستظل موجودة فى ديننا الحنيف و أن للعدل و للحق جنود خلقهم الله ليحملوا الرسالة
اسأله كيف استطاع أن يجمع دائماً ما بين الصرامة و الحزم و ما بين اللين و الرفق فيجيب فى تواضع الكبار:هذا دينى....هذا دينك....هذا ديننا
و اسأله:لو كان مكانك الكثير لرفض التواجد مع رموز فنية فى مكان واحد....ألا تمانع؟!
يبتسم فى هدوء

بجواره يجلس الرائع الراحل:مصطفى محمود
اسأله:هل كانت خلطة سحرية من إمام مسجد للقضاء على الصراصير ببعض الاّيات القراّنية تستحق هذه الرحلة الطويلة من الشك؟
فيجيب : تسفيه العقول و تسطيح الدين يدفع الكثير إما إلى الشك أو إلى التطرف...فى الإعتدال يوجد الحل دائماً...و فى الفطرة خير حصن

و هناك يجلس الشيخ إمام محتضن عوده كعادته
أخبره أنه سبق عصره حينما غنا (الممنوعات)و ها نحن حقاً نعيش عصر الممنوعات
اشكره أن منحنا تأريخاً لأحداث تاريخية كثيرة بأغانيه من النكسة إلى التطبيع إلى حرب فلسطين و غيرهم
سألته مداعبة:طب هما مين و احنا مين؟
فيشدو من الغنوة مقطع و يقول:
هما مين واحنا مين
هما الأمرا والسلاطين
هما المال والحكم معاهم
واحنا الفقرا المحكومين
حزر فزر شغل مخك
شوف مين فينا بيحكم مين
اسأله:هل نصبر عالجار السوّ؟
فيغنى أيضاً و يقول
الصبر حلم العواجز يطرح زهور الأماني
والقهرعدى الحواجز وانا اللي واقف مكاني
اسأله عن الأمل...هل ما زال موجوداً ؟!
يجيب فى يقين و هو يشدو
و اسمعى يا بلدنا خلاصة القول
و بقولك أهو و أنا أد القول
مش ممكن كدا....حيحول الحول
على كدا و الناس...يفضلوا ساكتين
خليكوا شاهدين

و يصدق على كلامه بيرم التونسى و يقول
يا مصرى و أنت اللى هاممنى من دون الكل
نمت و العالم قايم قوم بص و طل
فأداعبه قائلة:تونسى.... مالك و مال المصرى بقى؟
فيرد فى حنق:أنا مصرى قبل منك يا حلوة...أنا مصرى أكتر منك
فأضحك و أتركه من باب قصر الشر فلن أكون محظوظة أبداً إذا تفانت هذه الموهبة فى هجائى و له فى ذلك سوابق

أتركهم و أذهب إلى هذا الجالس يراقب تصرفات الجميع و تعليقاتهم بإبتسامة رقيقة فهو يجيد فهم البشر أقف أمامه لأعلمه بسر:تعرف....أنت أكتر واحد قريتله فى كل دول
دائماً أنت بين كل كتاب و اّخر...دائماً أنت فى الإستراحة من متاعب الحياة...دائماً أنت من ترتفع بروحى و تزيدنى زهواً أن خلقت إنسانة
هو عبد الوهاب مطاوع
بالتأكيد أغبطك لأنك أمتلكت القدرة على فهم مفاتيح النفس الإنسانية إلى هذه الدرجة...منحت الناس صدقاً و وقتاً و ليناً فمنحوك خبرة و ثقة لن تعوض
يشكرنى و يذكرنى أن خيالى كان فكرته من الأساس:أنا أول من جمعت المبدعين فى صالون منزلى و على أرفف مكتبتى و كتبت مقالات تصف حوارى معهم فأقر و أشكره على فكرته

و يدخل متأخراً ليملأ الجو مرحاً و بهجة و تفاؤل (صلاح جاهين)
اسأله:تقفز و كأنك ترقص
فيجيب:
غمض عينيك و ارقص بخفة و دلع
الدنيا هى الشابة و انت الجدع
تشوف رشاقة خطوتك تعبدك
لكن انت لو بصيت لرجليك...تقع
و عجبى
فأخبره أن أقرب الرباعيات لقلبى

أنا اللي بالأمر المحال اغتــــــــــــوي
شفت القمر نطيت لفوق في الهـــــوا
طلته ما طلتوش إيه انا يهمنـــــــــي
و ليه .. ما دام بالنشوة قلبي ارتوي
عجبي !!

و أقول له:أقولك على سر...أنت من أنجانى من الوقوع فى الإزدواجية و الشك فى قدراتى العقلية....أبات يوماً هائمة فى حب هذا الوطن....و أبات يوماً اّخر لاعنة له و متمنية لو أنى أستيقظت لأجد نفسى فى أى بقعة أخرى من الأرض....بس و الله يا عم صلاح من ورا قلبى...يسمعنى السامعون فيتعجبون و يلوموننى و لكنك وحدك تدرك المعنى

هو:فهمتك
بحبها وهي مالكة الأرض شرق وغرب
وبحبها وهي مرمية جريحة حرب
بحبها بعنف وبرقة وعلى استحياء
واكرهها وألعن أبوها بعشق زي الداء
واسيبها واطفش في درب وتبقى هي ف درب
وتلتفت تلاقيني جنبها في الكرب
والنبض ينفض عروقي بألف نغمة وضرب
على اسم مصر

و سمحت لنفسى أن اسأله سؤال اّخر:كما مررت بلحظات تصالح مع الحياة و حب لها مررت بالاكتئاب و اليأس...هل ما زلت تؤمن أن الحياة بالحلاوة التى كنت تصفها ؟

فيخبرنى:هى بين الحلاوة و الشقاء و لكن

" محلا الحياه حتى ولو فتافيت "

" محلا الحياه ولو فى أواخرها "

و عجزت أن أنطق بكلمة لبراعة تعبيره و لنداء أمى الذى قطع حبل الخيال
ودعت عزوتى و وعدت الباقيين منهم بلقاء قريب و مشيت إلى أمى مبتهجة أردد

" محلا الحياه حتى ولو فتافيت "

" محلا الحياه ولو فى أواخرها "

قوس قزح

2010-12-06T11:37:00.000-08:00

بدأ اليوم.....كما يبدأ أى يوم اّخر
كالعادة استيقظت صاحبتنا من نومها لترتدى ثيابها و تذهب إلى جامعتها....و من هنا بدأت سلسلة الروتين اليومية نفس الشوارع
نفس الأشخاص
نفس المحاضرات
نفس المعلمين
حتى أنها صارت تركب الحافلات مع نفس السائقين فى الكثير من الأحيان
شعرت أن الملل يتسرب إلى كل تفاصيل حياتها,-و هى التى ترى فى الملل و فقد الحماس درباً من دروب الموت-
حتى شوارع مدينتها التى كانت دائماً تعجب بتصميها تراها مملة,ثلاثة خطوط متوازية,طريق الحرية,خط الكورنيش و الترام...لن تضل الطريق فى هذه المدينة أبداً
و لكن الطريق يضلنا فى أحيان كثيرة
حاولت أن تكون طبيعية و أن تتعامل مع الجميع بشكل ودود...لطالما تمنت أن ترمقهم جميعاً بنظرة من الزهد و تتركهم و ترحل...إلى أين؟...إلى أى مكان لا تكون فيه مجبرة على التصنع أو التكلف
حاولت أن تشاركهم الأحاديث,و التعليق على أخبار بلدها المحروسة,و النقد و الدعابات فى الكثير من الأحيان....مجرد محاولات
قالت أحداهن:الجو اليوم كئيب جداً
نظرت حولها,لم تكن قد لاحظت إلى هذه اللحظة أن البرد حقاً قارص ذلك اليوم,السماء ملبدة بالغيوم
و رغم أنها كانت تعشق هذا الجو,كانت تستطيع أن ترى فيه أمل,أمل فى أن تشرق شمس جديدة,أو أن تهبط الأمطار حاملة معها الخير و البركة,فهى تعشق الشتاء لأنه -كبعض الأشخاص-يمنح غيره الحياة و الروح
و لكنها لا تكاد ترى هذه اللمحات من الأمل...إطلاقاً
أعتذرت من الجميع و انصرفت
لم تكن تعرف إلى أين الوجهة....تذكرت تعبير تكرر كثيراً أثناء دراستها لقصة عنترة و عبلة فى الصف الأول الثانوى....-خرج عنترة يهيم على وجهه فى الصحراء-و لكم سخرت منه هو الاّخر...و ها هى تتبع خطاه
صديقتها كانت محقة,جو المدينة غريب اليوم,غيوم السماء من نوع مميز,هو نوع لا يبشر باحتمالية سقوط أمطار و طبعاً لا يشى بأية نية لظهور شمس مشرقة,البحر هو الاّخر ينتفض انتفاضات عصبية غريبة تشبه حركة الأمواج و لونه شديد العكارة,بينهما -على اليابسة-أعمدة النور و يا للعجب-كلها مضائة-و فى وضح النهار!!!!
استطاع الإهمال أن ينتزع منها ابتسامة تعجب و ألم تعرفها جيداً,فهى غالباً تظهر حينما تتابع أى شىء يخص أحوال بلدها....هى مصرية

تذكرت قول الشاعر

وطريقي، ما طريقي؟ أطويل أم قصير؟
هل أنا أصعد أم أهبط فيه وأغور
أأنا السّائر في الدّرب أم الدّرب يسير
أم كلاّنا واقف والدّهر يجري؟
لست أدري!

و بعد ساعتين من المشى المتواصل و بعد فترة -لا تكاد تتذكرها من طولها -من التفكير الأكثر تواصلاً,نظرت حولها فوجدت الكثير من الناس رؤوسهم مرفوعة لأعلى و يشاهدون شيئاً ما....نظرت هى الأخرى و ذهلت لما رأت

إنه قوس قزح....لأول مرة فى حياتها تراه بالفعل....تؤمن بوجوده....ذكروه كثيراً فى كتب الفيزياء....ذكره الذاكرون أيضاً ممن لا يفقهون شيئاً عن العلم....موجود,كادت تنسى هذه المعلومة أصلاً
بمعنى أدق....لقد رأت فيه الأمل....قد يغيب هو الاّخر و لكنه موجود....موجود...موجود
رأت فيه التغيير,رأت فيه التجديد,رأت فيه الحلم,رأت فيه مبادىء تتمنى أنتشارها,رأت فيه كل ما تتمناه و لكنها لاتراه

ابتسمت ككل من راّه معها و قالت:سبحانك ربى
لفت نظرها كيف سعد الجميع برؤية مظهر من مظاهر جمال الله فى كونه....هى الفطرة التى جبلت على حب الجمال و الرقى و الصفاء و الأمل و الخير....هى الفطرة التى تنقذنا دائماً.....هى الفطرة التى تبقى الإنسان إنساناً

الأولة:بلدى

2010-11-28T01:43:00.000-08:00

الأولة بلدى....و التانية بلدى....و التالتة بلدى
الأولة:بلدى....بسلطن جو موالى
و التانية:بلدى....بقول الكلمة بالعالى
و التالتة:بلدى يا كنزى و عزوتى و مالى

الأولة:بلدى بسلطن جو موالى.....و دا الموصوف
و التانية:بلدى....بقول الكلمة بالعالى و عالمكشوف
و التالتة:بلدى...يا كنزى و عزوتى و مالى و ملو الشوف

الأولة:بلدى...بسلطن جو موالى و دا الموصوف...دوا العيان
و التانية:بلدى...بقول الكلمة بالعالى و عالمكشوف...و بالمليان
و التالتة:بلدى....يا كنزى و عزوتى و مالى و ملو الشوف

تحدي الحد يا بلدي
ما بين الحق و البهتان
و رايتك تعلا يا بلدي
دليل عن صحة البنيان
و دا الموصوف
و الاولة روحى...بلدى
و الثانية عقلى...بلدى
و الثالثة.... بلدي

رائعة من روائع الشيخ إمام كنت أستمع إليها وسط عدد كبير من الأغنيات,بين(الممنوعات)و (أنا رحت القلعة) و (ياما مويل الهوا) و (بهية )و غيرهم,وجدتنى أكتب كلماتها -دوناً عن زميلاتها-كلمة كلمة خلف الشيخ إمام و أنا مستمتعة -لأول مرة-بالتلقين إذا جاز التعبير
لماذا اليوم؟
لا أعلم,ربما فى محاولة للتمسك بالأمل....ربما هروب من الواقع المؤلم و الذى يزداد إيلاماً هذه الأيام,ربما لأن فقه الأولويات غائب عن وطننا منذ فترة فلم يعد أحد يفكر لا فى الأولة و لا فى التانية ولا فى التامنة حتى,فضلاً عن أنه مفيش حد بردو بيفكر فى البلد.....فجمع إمام بين الإثنين فى عمل فنى أراه رائعاً و عادة ما ينجذب الإنسان إلى ما يشبهه- أو إلى ما يفتقده ساعات-فكان طبيعياً أن تجذبنى الغنوة...أو لأنها تذكرنى أن بعض الأشياء فى حياتنا لا فرار منها مهما كبدنا الارتباط بها من متاعب,فهى إما أولوية ,أو حلم,أو عشق غير مشروط...بالظبط كحالتنا مع الوطن
أو من باب المشاركة ليس إلا!!
لست أدرى
عموماً هى حالة فنية وطنية جديرة بأن نستمتع بها و (نسلطن)جميعاً (جو موالنا)على خلفية من الأمل و الخضار و بنظرة راجية إلى المستقبل لعله يحمل معه الأجمل لوطننا
سك عالموضوع

موعد على العشاء

2010-11-09T16:21:00.000-08:00

جلست و الخوف فى عينيها...إنها ليست قارئة الفنجان...إنها أختى ياسمين

جلسنا نتناول العشاء سوياً فوجدتها سارحة ثم بادرتنى بسؤال

ياسمين:المدرسة ايه؟

دينا:نعم

ياسمين:المدرسة ايييييييه؟

دينا:دار علم-مثلاً-

ياسمين:غلط....المدرسة ايييييييييييه؟ها يا جماعة حد عارف المدرسة ايه؟

أمى تغادر الغرفة و هى تبتسم و تضرب كفاً بكف و تقول:عوض عليا يا رب عوض الصابرين

دينا:صلى عالنبى يا ياسو

ياسمين:بلاش المدرسة....طب الخاتم ايه؟

دينا:شبكة مثلاً....ألف مبروك...مين اتخطب؟

ياسمين:بقول الخاتم ايييييييييييييييه

دينا:ايه؟

ياسمين:يا أم جهل...المدرسة:بناء.....والخاتم حلىّ

هذه لا تعتبر ألشة....و لكنها كانت عائدة لتوها من حصة (الفلسفة و المنطق)...حمدت الله أن هذه القضية المثيرة للجدل البالغة الخطورة و الأهمية التى لم أكن أعرف كيف قضيت عشرين عاماً من حياتى و هى غائبة عن ذهنى لأنى ظننت أنها حاضرة فى خلفية المنطقيات قد قضيت

و لكنها عادت تقول:الله يرحمه كان شكاك أوى....شك فى كل حاجة

دينا:ما تجوزش عليه غير الرحمة...شك فى كل حاجة فى كل حاجة؟....مين دا؟

ياسمين:ديكارت....دا كان شاكك إننا موجودين فعلاً....طب إثبتيلى إننا موجودين...مش يمكن نكون بنحلم و أنا بحلم بيكى و أنتى بالصدفة بتحلمى بيا

أنتابتنى موجة من الضحك الهستيرى...و أنتظرت عشان أشوف اّخرها فين

ثم قالت:لأ كفاية كدا....ايه هرشة الدماغ دى؟....إحنا فين؟

ثم تركت الطاولة و إنصرفت

ربما أكون جاهلة بعلوم الفلسفة و المنطق لأنها خارج تخصصى و لم أتعرف عليها أبداً بما يرضى الله,و لكنى أنوى القراءة عنها -و لو أن الفرصة لسا مجتش-
و لكنى كنت دائماً ما أتهم بأن تفكيرى فلسفى,و كنت دائماً أسأل من يبادرنى بهذه الكلمة:اللى هى حاجة حلوة ولا وحشة؟

و أدركت مع الأيام أن الفلسفة بصفتها علم الوصول للأصول ليست بالشىء السىء و لكن منها اللى يجن و يجعلنا ندور فى دوائر مفرغة دون الوصول لنتائج...بس ماشى

فى نفس ذات اليوم الذى دار فيه هذا الحوار....جلست مع ورقة و قلم و نسمات الساعات الأولى من الفجر تداعبهما و انسابت الكلمات فوق الورقة بفعل القلم دون أن أدرك تحديداً ما الذى كنت أكتبه

ثم عدت و قرأته فاترحمت على ديكارت و أرسطو و سقراط و أفلاطون و كل اللى ماتوا و عرفت ان اللى كنت بضحك عليه من كام ساعة من فلسفة و تفكير و هرش الدماغ دا مش بعيد عن حياتنا ولا حاجة...و عن حياتى أنا تحديداً

و كان النص كالتالى

معقدون هم البشر...علاقاتهم ببعضهم البعض عجيبة و غامضة ولها ظروف خاصة,يعنى الموضوع عمره ما كان ولا حيكون إن اتنين اتقابلوا,حسوا ان هما قريبين من بعض,فى توافق فكرى و انسانى-بتعبير صديقة مقربة-فيلا عرفنا بعض...يلا علاقتنا بقت كويسة....يلا العلاقة من كويس لأفضل....ما تلاقيييييش

ليه بقى؟؟....لأن بالظبط الموضوع عامل شبه التفاعلات الكيميائية...تواجد مركب مع مركب اّخر لا ينتج بالضرورة تفاعل ما لم تكن الحرارة و الضغط و جميع الظروف مهيئة لحدوث تفاعل,و المركبين نفسهم حيكونوا فى حالة أكثر استقراراً بعد التفاعل...سبحانك ربى....نظام الكون واحد فى كل حاجة

و ينفرد البشر بالقدرة على سوء الإدراك و قصر النظر و الخداع البصرى....بحيث أن اللى تفتكره موسى عادى جداً يطلع فرعون...و التفاعل الذى تظن أنه سينتج عن مركبات أكثر أستقراراً يطلع العكس تماااااااماً

و لو أن فى كل الحالات معرفة الناس كنوز و بنتعلم بردو

يبقى معقدين احنا ولا مش معقدين؟

و على الصعيد الاّخر....ممكن يكون حد مش زيك ولا فى توافق بينكم ولا حاجة و تلاقوا نفسكم تعرفوا بعض و بحكم الظروف لازقين لبعض....بالظبط زى مسلسل مش عاجبك....التليفزيون فى المكان اللى بتاكل فيه....اخواتك بيتفرجوا عالمسلسل و دا معاد أكلك....فغصب و اقتدار بتشوفه معاهم....يمكن يعجبك بعد كدا....يمكن تتعايش معاه من باب (اصبر عالجار ال...يا يرحل,يا تجيله رقابة تشيله)...يمكن تكتشفله ميزة بعدين....و يمكن بردو تفضل مش طايقه.....بس ما أن ظلت الظروف سانحة و لم يقرر أحدكما (التغيير)حتفضلوا مع بعض

و دا بقى يخلينا نسأل طب هو مين اللى يخلى الظروف مهيئة تماماً لأى حاجة و مين اللى يخليها ضد كدا؟

إنه القدر و التدبير و لهما دائماً حكمة....بل حكمممممممممم.....و سنظل نسأل و نسأل و نسأل:طب ليه؟طب اشمعنى؟طب ازاى؟ و لن نصل لأية إجابات....ما هو مش دايماً كل سؤال له عندنا إجابة,أو له أجابة دلوقتى....بس لازم نسأل...لأن عندنا عقول....و عقولنا شغالة....و منقدرش نحجر عليها ولا حاجة....و السؤال ما دام خطر على البال يبقى مش القضية تصرح بيه ولا لأ....لأنه سبحانه يعلم السر و العلن.....الفكرة إنه يستحق يتسأل مادام عدى على مخنا اللى خلانا كبنى ادمين مكرمين عن غيرنا...و لأن مدبر الكون و كاتب الأقدار عارف أنك حتسأل حتسأل و عارف ايه ممكن ييجى فى بالك سواء بس فى بالك,أو بالتصريح و التعبير عنه

ما هو لو مش عايزك تفكر ولا تسأل مكنش خلقلنا مخ بمنتهى البساطة,أو خلقه بيفكر فى حاجات حاجات مثلاً...و قادر سبحانه على ذلك

يبقى الحل ايه؟

على رأى صديقة مقربة تانية بردو:ثق و ابتسم

اد ايه جميل اننا نعيش بالأمل,نعيش و عنينا على بكرا من غير ما نضيع النهاردة,فى بلدنا دى أنسب حاجة لحل مشاكل كتير...الأمل.....لازم نبص للى جاى,أد ايه جميل انها كل ما تضلم فى وشك تبص لبعييييييييد و تقول مش دا اّخر المطاف ولا عمر الضلمة بتدوم و لا عمر النور حتى بيفضل,المهم دايماً نكون عارفين إن(بكرا جايب نهار...يستاهل المشوار) و لو مجبش نهار...نستنى بعد بكرا...و ماله؟!.....المهم الأمل و الإصرار و الإستمتاع بجو الساسبنس دا اللى بردو يسيطر طول الوقت على بلدنا

و كفاية كدا عشان سيرة التغيير و الأمل فى موسم الإنتخابات مش كويسة و الجو ملبش

(دا بكرا جايب نهار....يستاهل المشوار)

يوم ممطر اّخر

2010-10-31T01:44:00.000-07:00

استيقظت اليوم متأخرة بعض الشىء عن ميعادى المعتاد,لم يكن التأخير كبيراً حتى يفوت موعد أول محاضرة و لكنى قررت ألا أذهب إلى الكلية....فجأة شعرت أنى قد مللت التلقين و الروتين و التعليم بطريقة أبلة نظيرة و مللت طريقة تعامل الأساتذة معنا على أننا طالعين من الإبتدائية عليهم عدل,حتى أن بعضهم أوحى لى و لزملائى ذات مرة أنها على وشك أن تمر على الطلبة-الجامعيين-لتصحح الكراسات و أنها ستزف إلينا البشرى السارة ليلة أمتحان نصف العام الدراسى الأول بأنها نزلت التوقعات المرئية فى الليزر(وحدة تصوير الورق فى كلية الهندسة).....و غيرهم من ناشرى الموجات السلبية و عاشقى الإحباط....و غيرهم ممن أتوقع له النجاح الساحق فى أى مهنة سوى التدريس و هكذا صار الجميع ضحية نظام تعليمى فاشل

قررت أخذ أستراحة قصيرة و أن أذهب لجامعتى فى موعد المحاضرة الثانية

و بالفعل نزلت من منزلى و سلكت دربى المعتاد فى محاكاة للروتين اليومى.....و لكن شيئاً جديداً حدث على غير العادة.....الدنيا بتشتىىىىىىىىى

شعرت بسعادة بالغة ليس فقط من أجل التغيير و لكن لأن الشتاء فصلى المفضل

لم أجد أى مواصلة أنط فيها عشان أروح لأبلة نظيرة....عفواً دكتورتى الجامعية العظيمة....فقررت أن أنتقل إلى موقع الحدث....إلى كورنيش بحر الإسكندرية لأشاهد الأمطار و هى تهطل عليه فى مشهد يعتبر الأول فى حياتى

كنت قد قررت ألا أمشى تحت المطر على كورنيش مدينتى الجميلة إلا مع مستر إكس....و اللى ميعرفش مين مستر إكس مايزعلش لأنى أنا نفسى معرفوش....و لكنه شخص إفتراضى لأجل غير مسمى و لكنى أعلم أنه موجود فى مكان ما,إن لم يكن استشهد فى حرب أكتوبر أو ترك البلد مهاجراً فإنه موجود.....هو سعيد الحظ و اللى حماتى دعيتله فى ليلة القدر فاستجاب لها الله و رزق أبنها بسعادتى....فنعم..أنا من أولائك الذين يؤمنون نظرية النص التانى

و لكن الموقف كان أكثر إغراءً من أن يؤجل لهذا الأجل الغير معلوم,دا ممكن قانون الطوارىء يتلغى و أكس لسا مظهرش

و بالفعل كانت كل الخواطر و المواقف الاّتية تحت المطر فى عروسة النيل المحروسة و تحديداً فى عروسة البحر الأبيض المتوسط

الشارع لأول مرة تقريباً لا يوجد به أحد,قلة قليلة تهرول تحت المظلات,رجال بذقون,رجال -كاجوال-,بنات محجبات,منتقبات,طلبة و طالبات...اختلافات لا حدود لها و الجميع ينظر إلى فى إستعجاب و إستغراب,فجأة طبقات المجتمع المصرى إجتمعت على إنى فيا حاجة غلط...و ماله الوحدة حلوة بردو من أيام المرحوم مينا موحد القطرين

مرشخصاً عشوائى المظهر أو كما يظن البعض-مجنون- و منهم حقاً تخرج الحكم,نظر حوله و قال:دى بتشتى....ثم تعالى صوت ضحكه بشكل ملفت و قال:بركة يمكن تخضرّ...و أخذ يغنى:عايزينها تبقى خضرا الأرض اللى فى الصحرا,و نقدمها لمصر هدية حاجة جميلة و معتبرة

أكملت سيرى و الناس تنظر إلى مندهشة و أنا أتحسر على حالهم المتعجل فحقاً إنهم لا يشعرون بروعة و جلال سقوط الشتاء,مرت فتاة تمشى بهدوء و تستمع إلى موسيقى-لم أميزها-على هاتفها,وجد كل منا ضالته فى الاّخر فالجميع فى عجلة سوانا فنظر كل منا للاّخر بإبتسامة تشى بجوهر السعادة الذى نشعر به

مررت على مجموعة من عمال البناء الصعايدة,قال أحدهم لزميله:بالذمة حد يشتغل فى الجو دا....رد الرفيق:طول عمر الصعايدة أجدع ناس و نشتغل فى أى وقت.....فقال الأول:طبعاً...دا أول واحد طلع القمر كان صعيدى.....ضحك الجميع و سأله أحدهم:طلع يعمل ايه عاد؟....فقال له:كان بيورد رمل و أسمنت

ضحكت لقدرة المصرى على اختلاق الإنجازات الوهمية و لروحه التى تنجيه دائماً من كل الصعاب

الشارع ملىء بلافتات الدعاية الإنتخابية و كثيراً ما تمر بجوار مجموعة فتسمع أحدهم يقول:أهى كلها وعود كدابة

و يرد الاّخر:زيد زى عبيد و أحمد زى الحاج أحمد

حال أولائك البشر جعلنى أتسائل:على فين يا حلوة؟......مش بعاكس لا سامح الله.....و لكن حقاً على فين يا مصر؟هل من خلاص؟...و نظرت إلى المطر و فيه وجدت الإجابة,فكما يحيى الله الأرض بعد موتها به فى معجزة إلهية لا تملك إلا أن تقف عاجزاً أمامها,قادر الله على أن تحيا هذه البلدة-زينة بقاع الأرض-

و على بلوكات البحر,يعبر شبابنا عن اّرائهم و طموحاتهم و مواقفهم من الحياة,و قبل أن نتفق أو نختلف على هذه الوسيلة التعبيرية يجب أن نبادر أنفسنا بالسؤال:كانوا لقوا مكان تانى يعبروا فيه عن رأيهم ولا حد ألين من الحجر يسمع و ماراحولوش؟

كتب أحدهم:الحب حرام

فرد اّخر تحته:مش محتاج أتوب....حبك مش ذنوب ولا عشقك خطية

كتب أحدهم:نعم....لجمال الدولى-مشجع نادى الإتحاد الأشهر-

كتب اّخر:الأولة بلدى....و غيرها ماليش

و اقتبس غيره من عمنا صلاح جاهين:اتكلموا....محلى الكلام ما أجمله و ما ألزمه

و واحد شغلته قضية الوحدة الوطنية فكتب:اللى أوطانهم تجمعهم....عمر الأديان ما تفرقهم

و كتب منيرى مأصل جملة أعشقها من غنوة(ياما مويل الهوى):شرط المحبة الجسارة

و صاحبنا هذا ذو نظرة فلسفية فكتب يقول:لو الإنتخابات كانت بتغير مكانوش عملوها

و هكذا اقتبس شبابنا من أشعار جاهين و أحمد فؤاد نجم و من أغانى محمد منير ما يعبر عن واقعهم......تساءلت :متى ظهر هذا الجيل و لماذا لا نرى له أثراً حتى الاّن؟...و أدركت أن دوام الحال حقاً من المحال

فى المطر أمل...أمل بأن يحيى الله الأرض بعد موتها....أمل فى أن يحيى الله قلوب العاصيين بعد غفوتها و يردها إلى دربه رداً جميلاً...أمل فى الغد....أمل فى أن تشرق الشمس من جديد

و أكملت سيرى مستمتعة بقرارى لخرق المعتاد و المألوف, و متحملة مسئولية جنانى تماماً....و مدركة أن ما من شىء يعادل سعادة أن تعمل ما تود فعلاً عمله و أن -العقل دا داء بيعيي فعلاً-....قد يكون الوزن ثقل بسبب الماء,و ما المشكلة؟فالروح خفيفة

رحلة تحت مطر مدينتى و بصحبة بلدى و شعبها كانت من أجمل و أغرب ما فعلته يوماً على الإطلاق...سألت نفسى و ماذا عن الصحبة البشرية؟

فأخذت أردد كلمات صلاح جاهين و غنوة محمد منير تحت المطر

إيديا فى جيوبى و قلبى طرب

سارح فى غربة بس مش مغترب

وحدى.....لكن ونسان و ماشى كدا

ببتعد,معرفش أو بقترب

و إلى أن تأتى النزلة المعوية أو يكملها ربنا بستره......سك عالموضوع

استثناء

2010-10-12T10:07:00.000-07:00

لمن غنى للحرية و للإنسانية و للحلم و لقبول الاّخر, للدنيا و للوطن و للحب الغير مشروط الذى بين طياته نجد الحرية,لمن عودنا على التلاحم بالناس و إيجاد الذات بين ذواتهم,لمن علمنا الإصرار و لمن رسم على وجوهنا الإبتسامة و البهجة فى عز الأحزان....أقول شكراً أود بالتأكيد أن أشكر كل من تنطبق عليه هذه الصفات و لكنى أعنى
بالتحديد(محمد منير) و تعود ال(نا)على المنايرة

و يسألون دائماً ما العلاقة التى تربط بين منير و جمهوره؟

أنى أجولك.....لأنه الوحيد الذى غنى لكل الحالات فهو الأجدر على أن تجد عنده ما يعبر عنك دائماً....الفارق الوحيد بينه و بينك أن الله أعطاه القدرة على أن يترجم أفكاره و مشاعره و أحلامه و وجعه إلى عمل رائع بينما لا نملك نحن هذه الموهبة فهى علاقة(تكامل).....علاقة شخص بشخص اّخر شاركه جميع تفاصيل حياته,قرأ أفكاره و ترجم مشاعره,أخذ بيده لينجيه من الأحزان مقنعاً إياه بألا يستسلم لها, و سلمه لها تارة أخرى من جودة تعبيره عما فى داخلنا و لهذا العلاقة إستثنائية.....و كذلك تكون العلاقات التى تقوم على التكامل و المشاركة فكيف لنا أن نصف ارتباط الكاتب بقلمه؟ و كيف يكون ارتباط الرسام بريشته؟ و كيف يكون إرتباط المطرب بصوته؟ و هو كذلك إرتباط المنايرة بمنير....ارتباط ترجمة الأفكار و المشاعر....ارتباط توافق و تشابك الأحلام فأعتدنا أن(ينشبك حلمه فى حلمنا) و هكذا و على مدار خمسة و ثلاثين عاماً سارت العلاقة استثنائية و ستظل كذلك
فجاءت كلماتى هكذا دون سابق مراجعة أو تنميق و أنا أستمع إلى(على صوتك)تعبيراً منى عن الإمتنان لهذا المبدع فقد أنتشلتنى هذه الغنوة من حالة ضلمة كانت أكيدة لولاها....و صادف أن كان ذلك يوم ميلاده
و مع مختارات من إختيارت هذا المبدع و من إبداعات ناس تانية لا تقل إبداعاً أترككم

طعن الخناجر ولا حكم الخسيس فيا

و دا حب إيه دا اللى من غير أى حرية؟

الحب زى الطيور....لازم يعيش فى النور

ربك لما يريد...أحلامنا حتتحقق و كلامنا حيتصدق و الغايب حيعود

يا مصر و أنتى الحقيقة....و أنتى أغترابى و شقايا....دا أنتى الجراح الرهيبة و أنتى اللى عندك دوايا

شرط المحبة الجسارة....شرع القلوب الوفية

إحنا بكرا لينا....تحلى الذكرى بينا

تمشى ورا السبع تفضل سبع و تموت سبع...تمشى ورا الضبع لا دا الضبع سىء طبع

لو بطلنا نحلم نموووووت....لو عاندنا نقدر نفوت

عاشق,إعشقنى....كاره,إكرهنى...لكن (اسمعنى)

الكلمة إيد الكلمة رجل الكلمة باب....الكلمة نجمة كهربية فى الضباب...الكلمة كوبرى صلب فوق بحر العباب...الجن يا أحباب ما يقدر يهدمه

الاسم الكامل(إنسان)الشعب الطيب والدية,المهنة بناضل بتعلم...تلميذ فى مدرسة شعبية

مش محتاج أتوب,حبك مش ذنوب,ولا عشقك خطية

لو كان لزاماً علينا الرحيل,كارهاك يا وداع ولا بديل

دا بكرا جايب نهار,يستاهل المشوار,و حلمنا لو ينضرب,حنصد و نرد ولابد...يبقى المصير فى اليد

حالة

2010-09-22T16:03:00.000-07:00

صوابعك مش زى بعضها...و هكذا خلق الله البشر مختلفين و سبحانه لو أراد لهم التطابق لكان ذلك بين الكاف و النون و لكنها حكمة قد لا تدرك بالعقول و منبه للتدبر بداخلنا فنسبح خالق البشر على إختلافها
و جزء من هذا الإختلاف أن سعادة أو تعاسة البشر يجدونها فى أشياء مختلفة أو ربما متناقضة
و أنا كممثلة لطائفة ما-ما أكيد فى ناس زيى-أجد أعلى مراحل سعادتى فى الكثير من الأشياء و من أهمها العمل,هو الهروب المبرر الوحيد,ففيه و به أهرب من كل متاعب الحياة و له صدر رحب دائماً ما يستوعبنى مهما كانت حجم المشكلات و أحبه أيضاً لأنى أرى فيه التغيير متمثلاً فى خطوات و بنجاحه و السعى وراء كماله تعلو سعادتى فأعلو معه و أحاول أن أضيف له لكن الأكيد أنه يضيف لى على اختلاف طبيعته سواء دراسة أو عمل تطوعى أو ما خلاف ذلك
و فى شىء اّخر أجد سعادتى فيه,أجدها فى الجمال و فى كل ما يقربنى إلى ذلك الجمال و يعلى من الإحساس به فأسعد بغنوة صادقة أو بمقالة معبرة أو بفكرة مبدعة أو بحالة فكرية سعادة شاء الله ألا يعطينى من موهبة الكتابة قدر كبير حتى أصفها و أنقل كل جوانبها
أكتب الاّن لأنى قد مررت بحالة من الجمال و بحالة من تقدير العمل فمنحتنى السعاة بالتالى و قليلاً ما يصل بك شخص إلى هذه السعادة بجمال فكره و جودة عمله
كنت أشاهد حلقة اليوم من برنامج-العاشرة مساءاً-للرائعة الجميلة منى الشاذلى و كان فى إستضافتها مبدع صغير كبير هو إياد نصار
تعرفون حجم النقاش الذى أثاره مسلسل(الجماعة)ولكنى لن أناقش التيار الفكرى أو السياسى أو موقفى الشخصى من الجماعة و لكنى أناقش كيف نجح هذا المبدع فى أن يستوقف جميع المؤيدين و المعارضين أمام موهبته و إتقانه للعمل و إبداعه و للإبداع يجب أن نقف جميعناً احتراماً
أشعر أن الموهبة بحاجة دائماً إلى أشياء كثيرة تثقلها و الجميع يسلم بموهبة هذا المبدع الفريدة و لكنه فى حواره مع منى الشاذلى استوقنى أكثر من مرة
استوقفتنى ثقافة نشأت بتوجيه من الأهل,فتأمل دور الأب الذى يفتح أمام ولده جميع جوانب المعرفة و مختلف الفكر و التيارات و يتركه ينهل منها و يراقبه من بعيد و يضع صغيره على الطريق الصحيح إذا مال لأى طرف بسبب نقص فى المعلومة

تأمل موهبة -و قليلاً ما تتكرر هذه الكلمة فى أى مقال-شفافة ترقى لأن تحاكى مشاعر البشر و تتقمصها و تقدمها بإحسان و توجهك بكل حواسها لمعنى الإنسانية

تأمل الإتقان و الحرص على كافة التفاصيل و الحرفية التى يتعامل بها الرجل مع مهنته

تأمل فخره بأنه فنان و ثقافته عن مجاله و إدراكه لدور الفن

و تأمل الفن حينما يتعدى الأمكنة و الأزمنة و يلغى الجنسيات و الإنتماءات و يقرب اللهجات و يجعل الجميع يلتفون حول قيمته فحسب

تأمل جمال لحظة النجاح و فرحة الوصول إليها

هو حالة ثقافية نادراً ما نراها فى فنانينا العرب,خلطة من الثقافة و الإتقان و عشق العمل لدرجة تقوم بها أمم و الله,حالة تلهمك بالكثير و تهدى لك الكثير و فى كل الحالات تسعدك لأنها موجودة بالفعل
لا أملك إلا أن أقول سبحان وهاب المواهب و سبحان معد خلقاً بلغوا من الرقى مبلغه و سبحان خالق خلقاً جهلوا معنى الرقى و للإختلاف حكمة
و سبحان خالق الجمال و ملهم الإبداع و مسبب أسباب السعادة و الفخر بنموذج فنى أردنى مصرى عربى

قراّنا....ليس قراّنا

2010-09-22T02:09:00.000-07:00

مقال فى جريدة الدستور دفعنى للكتابة مرة أخرى فيه رأيين
أولهما رأى الدكتور محمد الشحات الجندى-الأمين العام للمجلس الأعلى للشئون الإسلامية-و بنص
الجريدة:

أكد الدكتور محمد الشحات الجندي ـ الأمين العام للمجلس الأعلي للشئون الإسلامية ـ أن ما دعا القس الأمريكي تيري جونز لحرقه لا يعد قرآنا ذلك لأنها نسخ مترجمة من القرآن الكريم عن العربية، وأنه رغم أن ترجمات القرآن لها قدسية لأنها فرع
من الأصل ولا يجوز حرقها ولكنها ليست قراّنا

و الرأى الثانى فى نفس المقال للدكتور حسن وجيه -أستاذ اللغويات بكلية اللغات و الترجمة- و بنص الجريدة:

وفي الوقت ذاته اعتبر الدكتور حسن وجيه ـ أستاذ اللغويات بكلية اللغات والترجمة ـ أن ترجمات القرآن الكريم تعد قرآناً لأنها تحمل النص العربي وفي الصفحة المقابلة للترجمة، ولكنه انتقد الترجمات الأجنبية للقرآن الكريم وحملها السبب وراء حملات الكراهية للإسلام والمسلمين مؤكدا أنها تحمل العديد من الأخطاء الفادحة كما تتجاهل ربط الترجمة بمعاني التواصل عبر الثقافات وفقدان البرامج العملية والنموذجية، قائلا: «كثيراً ما أقابل عدداً من الأجانب الذين يرفضون الإسلام بعد قراءتهم بعض الترجمات الخاطئة»

و بعيد عنكم قلبت معايا بضحك ليس من باب تسفيه ما قاله الرجلان فلست أهلاً لذلك ولست من محبى هذه الثقافة و لكنه السلوك الذى سلكناه فى التعامل مع الأزمات كالعادة و كأن أزمة حرق المصحف ستحل بمعرفة إذا كان المصحف المترجم قراّنا أو ليس قراّنا و كأننا إذا إتفقنا على أنه ليس قراّنا هدأت النفوس و أقتنعت العقول و أفتتحنا شوادر البطيخ الصيفى فى البطون,و كأن من أراد هذا للقراّن كانت تعنيه قضية إذا كان المصحف المترجم قراّنا أو ليس قراّنا- بل أنه أراد الرمز-و كأن هذا هو أصل الأزمة و كأن الغرب هو المتهم
و ربما كنت سأمر على هذه الفتاوى مرور الكرام إذا لم تربط بفكرة حرق المصحف

المسألة بهدوء يا حضرات,أننا نحن من كنا وراء فكرة حرق المصحف,و نحن من كنا وراء الرسومات المسيئة للرسول,و نحن من كنا وراء الحملات المضادة للإسلام
نعم,نحن السبب

من أساء لمحمد لا يعرف محمد لأنه لو عرفه بإنصاف ما كان له أن يقوم بذلك و لكنه يعرف أتباع محمد تمام المعرفة. أناس خير أمة أخرجت للناس و يراها من أسوأ الأمم,يعرف ما وصلت له من تخلف,يعرف العقول المتحجرة و يعرف العلم المهمل,يعرف التشدد و يعرف سوء الخلق,يعرف التكفير و يعرف التعدى على حرية الأديان و يعرف أكثر من ذلك و مع ما يلقاه الخواجة من تعتيم و تضليل إعلامى و مع القليل من الجهل الكامن فى التعميم و مع هستيريا الحرية-و ما هى بحرية- التى تجعله يظن أن من حقه الإساءة لما يختار بمنتهى الطلاقة يصل إلى إستنتاج لا يؤرق ضميره بأن هذا هو الإسلام,هذا هو محمد,هذا هو القراّن

لا أرى حلاً لهذه الأزمات المتتالية سوى الحوار القائم على محاولة إيجاد أرضية مشتركة والوصول(لكلمة سواء) مع دعوة كل مسلم يعتقد أنه يغار على دينه فيدعو لمقاطعة الفيسبوك إذا ظهرت جروب تسىء للمولى أو للرسول,و يغضب أشد الغضب إذا علم بنية لحرق كتابه الشريف,أو إنتابته مشاعر النشوة و السعادة لأن أحد أتباع الأديان الأخرى ترك دينه و أسلم معتقداً أن فى ذلك أنتصار لدين الله رغم أن القاعدة معروفة(فمن شاء فليؤمن و من شاء فليكفر)و ما هى بالقضية التى تستوقفنا لو كنا نعلم معنى حرية الإعتقاد...أدعوه أن يقف مع نفسه ليعرف بنسبة كم ساهم فى نشر هذا الإنطباع عن دينه؟بنسبة كم يحمل نفسه مأساة هذه الأمة؟بنسبة كم يعتقد أنه كان سبباً فى كل إعتداء على هذا الدين؟بنسبة كم تجاهل تعاليم كتابه و أختصرها فى معجزات وهمية من أمثال-هجمات 11 سبتمير مذكورة فى القراّن و يقولها بفرحة و كأن قتل الأرواح و الإعتداء على المدنيين مقبول فى الإسلام؟أسأله ماذا تعرف عن رسولك و صحابته و هل توقيرهم هو تقليد متوارث لديك أم أنه عن إقتناع و تدبر فى سيرتهم؟اسأل كم بلغ منك معنى (التدبر)من حيث التفكير فى كتابك و فى حكمة أحكامه أم أنك من أنصار أن التفكير فى الدين لنزداد إيماناً و تسليماً رجس من عمل الشيطان؟
و بنفس ذات الهدوء أتمنى لو نغير طريق تعاملنا مع الأزمات فنكف عن نشر أخبار المسلم الذى أنقذ جاره المسيحى من حريق فى شقته بعد كل حدث يلوح من بعيد للفتنة الطائفية -و كأن من المفترض أن أسأل شخصاً حياته مهددة بالإنتهاء عن ديانته قبل أن يدفعنى ضميرى لمساعدته-و كذلك نشر أخبار الظابط الذى وجد حقيبة بها أموال فسلمها للشرطة بعد كل تجاوز يحدث فى وزارة الداخلية و الأخبار التى تتداول دائما بأنه وجدت جثة فلان الفلانى الذى أساء للإسلام محروقاً أو مشنوقاً فى مكان ما و غيرها من الأخبار اللطيفة
و لو أن بعد كل مشكلة أجتمع العقلاء و علماء الإجتماع للنظر فى جذور الأزمات و لإيجاد حلول جذرية لها و معالجة المرض بدلاً عن معالجة العرض لما تكررت المشكلات
و سك عالموضوع

نص المقال
http://www.dostor.org/weekly/depth/10/september/14/28678