تاج بردو

المرة دى التاج من محمد هشام و يلا نجاوب بسرعة عشان التاج طويل اوى

اذكر 16 صفة عن نفسك؟

1. متسرعة و معنديش صبر و تلقائية زيادة عن اللزوم و دايما بتفهم غلط


2. اهلاوية طبعا


3. لكاكة


4. بحب القراءة و الكتابة و المشى و التصوير و النت


5. مبحبش اعمل حاجة مش عاوزة اعملها خالص


6. بحب اصحابى جدا


7. بحب مصر جدا و بالتالى بحب منير


8. شخصيتى قوية الى حد ما


9. رومانسية فى الخباثة و لجوا


10. مش بعرف اخبى حاجة و كله بيبان عليا للناس اللى يعرفونى كويس


11. مش بعرف اسامح لما حد ييجى على كرامتى


12. طموحة جدا


13. متفائلة اوىىى و شايفة بكرا احلى بينا ان شاء الله


14. نقطة ضعفى العطاء..و كل ما حد ما يبدى من قلبه و باخلاص اكتر كل ما كان الشخص دا له مكانة تانية عندى


15. بحب بيتنا و دار تحفيظ القران بتاعى و البحر و اسكندرية كلهاااااااااااااااااااااااااااااااااااااا


16. بحب ربنا جدااااااا و دى اكبر نعمة هو اداهالى و بحاول اكون دايما شكورة للنعم دى بتصرفاتى و كلامى و احساسى و كل حاجة
    
    
    اذكر احلام تخص ماضيك..كنت حتتخلى عن ايه و حتتمسك بايه لحد دلوقتى؟.

و الله حلمت احلام كتير زمان..حلمت انى اكون مضيفة طيران و انى اكون مهندسة و دكتورة و ضابطة و طيارة و كل الكلام دا و كان نفسى اعمل كل حاجة و انا صغيرة...انما طبعا دلوقتى مش بفكر فى كل دا...حلمى انى اقدر اخلص دراستى الجاية بنجاح و اعمل شركة لانتاج برمجيات الكمبيوتر الهادفة للاطفال و الشباب و اشارك فى اصلاح بلدى عشان الاقى حاجة اقولها لربنا لما ابقى بين ايديه

اذكر احلام تخص مستقبلك و ما تتمناه؟

اتمنى اكون بنت كمل كدا...محترمة و متدينة و محبوبة و اهلاوية زى ما انا و مصرية بجد و عاملة حاجة لبلدى و مسلمة و عاملة حاجة لدينى و مثقفة و راضية ربى قبل كل دا

اذكر شخصين على الاقل موجودين فى حياتك و كنت تتمنى وجودهم من قبل كدا؟

ممممممممم.....فى مدرسين كتير قابلتهم فى الثانوية العامة و اثروا فيا و كان نفسى اقابلهم من قبل كدا زى مستر مصطفى عبد العظيم و مستر مصطفى العلايلى..و من اصحابى انا اعرفهم كلهم من زمان انما فى بنت اسمها اميرة كان نفسى اعرفها كويس من زمان

اذكر شخصين غير متواجدين فى حياتك و تتمنى وجودهم مستقبلا فى حياة و حياة ولادك؟

ما دام حياتى و حياة ولادى يبقى باباهم اول حاجة اتمنى انى اقابله و يكون فى حياتى مستقبلا و اتمنى لولادى المعلم الفاضل اللى يأثر فيهم

و حمرر التاج

لقلوب بتغنى
KEMET
CANARY
FACEMOON

صوت من مصر