و الله بعودة+تاج

طبعا انا بقالى زمن بعيد عن مدونتى و عن المدونين الجامدين جدا انما بجد دا غصب عنى .. عاوزة بس اقولكم كل سنة و انتم بألف خير و صحة و سلامة و يا رب يكون رمضان السنة دى نقطة تحول فى حياة كل حد مننا..و عاوزة اشكر كل اللى بيسألوا عليا دايما و اقولهم ان انا الحمد لله تمام


و عاوزة اتكلم معاكم فى حاجة يا شباب...عندى احساس الايام دى ان فى حركة فى البلد جامدة جدا..حملات من احترم نفسك لبؤجة الخير لغيرها ..و جمعيات شغالة بنشاط مكثف من رسالة لجمعيات صناع الحياة و اللى شغلتنى الفترة اللى فاتت و فى اقبال جامد جدا عالجمعيات دى


بدأت احس ان البلد بتتحرك بس المرة دى بجد..و ان ولاد البلد استجدعوا مع بلدهم


حد حاسس الاحساس دا؟
طب ايه تفسيره؟
ولا هو رمضان شهر كريم عالكل؟

التاج بقى من محمد هشام ..يلا بينا نجاوب

بدأت تدون امتى و دخلت العالم دا ازاى؟

انا بدأت ادون من تقريبا اخر شهر يناير او بدايات فبراير السنة دى و دا معناه انى لسا فى الاول اوىىىىىىى..و دخلت العالم دا عن طريق انى كنت بشوف حاجات كتير اوى حواليا فى الشارع و فى المدرسة ايام ما كنت لسا فى المدرسة بقى و فى اماكن كتير ببقى عاوزة اعلق على تصرف شفته او كلمة سمعتها و مش دايما فى مجال انك تتكلم مع صحابك مثلا عن الشارع لان الصداقة علاقة خاصة اكتر..فكرت فى حاجة تدينى المجال دا و كنت فى نفس الوقت اعرف واحد عنده مدونة كلمنى عن التدوين و عملت المدونة و تابعنى فى الاول و قالى انى ممكن اكتب كويس على حد كلامه يعنى

ايه كان انطباعك فى البداية؟

كنت ببقى مبسوطة اوى لما اتكلم فى حاجة عاوزة اتكلم فيها حتى لو مجاليش ولا تعليق و كنت محترمة اوى العالم الكبير دا و كان عندى احساس انى نفسى اتعرف على كل المدونين لاننا جامعانا حب بلدنا و حب قلمنا او كىبوردنا

مين اكتر واحد بتهتم بتعليقه على بوستك الجديد؟

بهتم بجد بكل تعليق بيجيلى اوى حتى لو نقد

ايه اهم حاجة اتعلمتها من عالم التدوين؟

اتعلمت احترم وجهة نظر الاخر و ماتضايقش منها حتى لو غير وجهة نظرى و اتعلمت اعبر عن رأيى بأسلوب شيك و محترم حتى لو نقد و اتعلمت ان مشاعرنا حاجة مهمة اوى ولازم نعبر عنها حتى لو بالكتابة فى مكان مفيهوش حد يعرفك بشكل شخصى زى النت كدا

ايه اكتر حاجة كرهتها؟

الناس اللى مالهمش فيها اللى بيدخلوا يقولوا كلام مالوش علاقة بأى حاجة...يعنى افتكر واحد مثلا دخل اعترض على بوست لمجرد انه عرف انى لسا فى ثانوية عامة قبل ما اخلص منها مع انه نفس البنى ادم دا دخل قبل كدا و عجبه بوست ليا اوى ..لا و مش اعترض و بس..شتم كمان و انا سيبت التعليق زى ما هو

حاسس ان التدوين له تأثير؟

اكيد بيأثر اول حاجة فى حياة اللى بيدون نفسه و بيعلمه ازاى يعبر عن نفسه و بيأثر فى اللى بيقرا الكلام دا و فى المجتمع بقى بشكل عام..و اكبر دليل على كدا ان فعلا فى حملات طلعت من عندنا و فى حملات كبرت بالمدونين ....طبعا مؤثر

تهدى التاج لمين؟

http://www.blogger.com/profile/04882291844076624000

Sometimes

حكومتى ملاك

قهوة بالفانيليا - شيماء علي

blue-wave

كان فى تاج كمان من عروس البحر....انا جاوبت على حتة منه قبل كدا فى تاج سابق و فى جزء اول مرة اتسأله فحجاوبه

اذكر 6 اسرار لا يكتشفها من يقابلك لاول مرة؟

مممممممممممممممم

انا اصلا الانطباع الاول بيكون دايما غلط عنى...فاللى بيشوفنى اول مرة مش بيتخيل انى ممكن اكون عاقلة و بفكر كويس بردو...مش بيتخيل انى ممكن اكون اخدت عليه بسرعة انما لسا مش واثقة فيه...مش بيتخيل انى ممكن يكون ليا فى التدوين و المناقشات و القراءة و الندوات و الحركات و بردو الكورة و محمد بركات...مش حياخد باله بردو انى محترمة و مش بتاعة اى حاجة من الكلام دا بتاع شيرين ...مش حياخد باله انى مؤمنة بالوسطية فى كل حاجة فى حياتى..و مش حياخد باله انى متسرعة

للاسف بقى اول انطباع بيبقى حاجة من الاتنيين و دا على حسب مودى اليوم دا لانى مودية جدااااااااا....يا اما ببقى مهيسة فبيتاخد انطباع انى تافهة و مرفهة يا اما ببقى متضايقة فيتاخد انطباع انى عقد...بس مش بزعل لان اول ما بنعرف بعض كويس الحمد لله الانطباع بيتصلح كمان انا مش مؤمنة بفكرة الانطباع الاول لان حرام تظلم حد و تحكم عليه من اول مرة تشوفه...لازم تكون تعرفه كويس دا غير ان 93% من الانطباع الاول لغة جسد و مظاهر ولا وعى و دى اخر حاجة قريتها بقى عن الانطباع الاول و اللى خليتنى ائفش منه افش ابدى

بس يا عروسة البحر

كل سنة و انتوا بألف خير يا رب و رمضان كريم