Saturday, December 13, 2008

حتعمل ايه؟

عمرى ما كتبت و انا متضايقة و قليل ما بكتب عن حاجات شخصية...انما المرة دى مش عارفة اعمل حاجة غير انى اكتب...و مش لاقية اى حل عند اى حد فيمكن الاقى عندكم....حتعمل ايه لو نمت يوم و صحيت..بصيت و شفت نفسك فى المراية بكيت؟؟!!!!!
و الله ما بهزر ولا بغنى...انما ايه اللى ممكن يتعمل لما تحس انك بتتغير تدريجيا للاسوأ..و لما تحس انك مش لاقى نفسك اللى اتعودت عليها زمان...و انك حاجات كتير مكنتش بتعملها زمان و بقيت بتعملها دلوقتى؟؟....و طريقة حياة كنت عايشها زمان مش عارف تعيشها دلوقتى؟؟....الناس المفروض انها كل ما بتكبر كل ما بتبقى احسن...لو حصل العكس...يبقى الغلط فين...لو بطلت تتكلم عن التغيير و تقدير العلم و بطلت تحط اهداف و بطلت تشتغل فى اى حاجة و اعدت تتفرج عالحياة و عالايام و عالناس و دا كله من غير اى سبب....لما تحس ان طاقتك للحياة بتخلص و انك مش انت......لما تحس ان نفسك بتاعة زمان وحشتك و تعد تفتكر فى ايام عدت و فاتت زى ما بتسمع كلام المصريين عن اجدادهم الفراعنة على اى قهوة.....لما ثقتك فى نفسك و فى قدراتك تقل من غير اى سبب و انت عارف انك لو اشتغلت حتلاقى...انما مش عارف تشتغل....لما تبقى عارف (ان الله لا يغير ما بقوم حتى يغيروا ما بأنفسهم) و مع ذلك مخدش اى خطوة....و اما تحس ان مشاكلك ملهاش حل عند حد و تستنى معجزة تغيرك فى زمن مفيهوش معجزات

لما يعدى عليك الوقت و انت واقف بتتفرج عليه و هو بيعدى و عارف انك حتتسأل عنه و سايبه يعدى...و بتتفرج عالعقارب و هى بتنقل نقلة نقلة ولا نقلات ابو تريكة مع فلافيو و هى فى الحقيقة بتنقلك من واحد لواحد تانى
و لما تبقى لزمتك(عادى)و (كله محصل بعضه) و (يلا مش مهم) و دا كله اكتر كلام كرهته فى حياتك
و لما تبقى ولا عارف تكبر دماغك و تبيع القضية ولا عارف تشتريها
من الاخر...لما تحس انك فى شيزوفرانيا...قناعاتك و قيمك و اهدافك فى سكة و انت

مش قادر غير انك تمشى فى سكة تانية ملهاش دعوة بيهم ولا تعرفهم
ساعتها حتعمل ايه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

Monday, December 8, 2008

العيد فرحة


تاج من اسلام مدونة(نام يا مصرى)له علاقة بالعيد و اجواء العيد اللى مسيطرة على كل المدونات

يلا نجاوب من غير لك كتير


ماذا يمثل لك العيد ؟ وما أكثر شئ يبهجك في مظاهر العيد ؟

العيد...دا هو الاسم شارح نفسه...يعنى احتفال و يعنى فرحة من القلب و يعنى ود و تواصل مع الاهل و الصحاب و احساس باللمة مع الناس اللى بتحبهم اللى بيحسسك بالتالى بالامان و السعادة

و احلى حاجة فى مظاهر العيد بعد صلاة العيد الولاد الصغيرين المشردين دول و هما شاريين اللعب بالعيدية


اوصف لنا طقوسك في العيد .. من ليلة العيد لآخر يوم ؟

طبعا الوقفة يعنى البيجاما الجديدة و قلبة البيت رأسا على عقب..اول يوم بيبدأ بالصلاة طبعا بعدها الفطار العائلى و اللف على كل العيلة و الاتصالات مع اهلى و اصحابى...غالبا تانى يوم بردو بيبقى تهانى كدا...اخر الايام بتبقى خروجات مع الصحاب و مسرحيات و تليفزيون


احكي لنا أطرف موقف حصلك في العيد ؟

مممممممممم......هو بتبقى كله مواقف حلوة و دا لان بيبقى فيه لمة و انا مقتنعة ان اللمة بتجيب تهييس على طول كدا...انما موقف معين مش فاكرة


بتحرص على تهنئة الأهل والأقارب والأصدقاء بالعيد .. ولا مش بتهتم ؟؟

و الله بحاول على اد ما اقدر اعدى عليهم كلهم او على الاقل اكلمهم


مين أول حد تزوره أو تكلمه في التليفون /الموبايل عشان تهنيه بالعيد ؟

مممممممم......اول ناس بابا و ماما و نهى و رضوى اصحابى و سارة بنت عمى


إيه الفرق بين العيد الحالي .. وعيد (أيام الطفولة )؟

فكرتونا بالذى مضى و الله...دا عيد زمان دا كان سكر..العيدية طبعا و شرا اللعب و البالونات و الملاهى و التنطيط و الشقاوة و خصوصا اننا و احنا صغيرين كنا فى بيت عيلة...تخيل بقى حوالى عشر اطفال منطلقين فى عيد...دلوقتى اهدى شوية اكيد...لا شوية ايه ..اهدى كتيييييييير...دى كانت طفولة مشردة

هههههههههههههههه

ذكريات


تفتكر الحياة من غير عيد .. هتفرق كتير ؟؟؟

طبعا...العيد الصغير فرحة بعد صيام و العيد الكبير بيحطك فى حالة روحانية تحفة بعد شهرين تقريبا من روحانيات رمضان...فدول محطتين مهمين جدااااااااااااا....و حلو احساس الفرحة بعد ما نشتغل و نتعب سواء فى رمضان او فى العشرة الاوائل من ذى الحجة و يمكن فعلا ربنا بالعيد كان عاوز يحسسنا معنى الاجتهاد و بعده الثواب بقى


إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟

اه واحدة صاحبتى اسمها بسمة...افرح زقطط حنكش بلبط و انكش شعرك و اتنطط عيد سعيد عليك يا جميل يا مقطقط


لسه بتاخد عيدية ؟؟ من مين ؟؟ وبتديها لمين ؟

طبعاااااااااااا...باخد و مش بدى حد حاجة...هههههههه


إيه رأيك في التاج ؟

عسول جدااااااااااا


تحب تمرره لمين من المدونين ؟ اذكر على الأقل 10

صوت من مصر

مزمز

kemet

احساس لسا حى

صاحب المضيفة

قلوب بتغنى

bar2ash

heba

كراكيب

sometimes