Friday, August 8, 2008

دردشة مصرية


بوست فانتازيا عالاخر..لو مصر كلمتنا فى الوقت دا ممكن تقولنا ايه؟


مصر:ايه يا دينا عاملة ايه
دينا:انتى شايفة حالك يسر اوى
مصر:طب و يتزعأيلى انا ليه..ما انتوا السبب
دينا:احنا مين ان شاء الله...
مصر:اللى ماسكينى
دينا:طب و احنا مالنا و مالهم..ما هم لابدين فى الدرة نعملهم ايه يعنى
مصر:نعملهم ايه..ما انتوا طول ما انتوا ساكتين ماتقولوش بيعملوا فينا كدا ليه
دينا:دول خطر عليكى بجد...حيبوطوا صورتك ادامنا
مصر:عيب عليكم...انا مش كدا...و مش دول اللى المفروض تعرفونى عن طريقهم
دينا:امال نعرفك منين يا ست الكتكوتة و الدنيا عندك بقت طريقك مسدود مسدود يا ولدى...العيل من دول بيتظلم من اول ما يبدأ يتعلم بنظام غلط و بعدين يشتغل لو اشتغل بروتين غلط و بعدين يعيش عيشة غلط و اهو كله غلط فى غلط
مصر:يعنى خلاص يأستوا
دينا:لسا شوية انما زى ما تقولى افشين شوية .. ماتفهميش بقى عليكى ولا عليهم
مصر:ابدأى بيكى يا بنتى..و صدقينى لو انتى عملتى اللى عليكى و كل واحد عمل اللى عليه بقلب و فكر شوية فيا حأتغير
دينا:ما احنا بردو تعبنا..يعنى انتى عاجبك اللى بيحصل دا؟
مصر:لا طبعا ... انما انتوا طول عمركوا رجالة و طلعتوا بيا من مواقف اصعب من كدا بكتير
دينا:رجالة..كمان بتغلطى فيا
مصر:ههههههههه ايوة كدا خليكوا زى ما انتوا..اضحكوا و اشتغلوا و اوعوا تيأسوا و انا و الله بحبكم انما هما اللى مش سايبنى فى حالى
دينا:يعنى فى افل؟
مصر:افل..ما دام اللمبى دخل فيها يبقى مفيش امل...بس انا بقولك اهو اكتر من كدا و عدينا
دينا:طب بذمتك انا اعمل ايه عشان انسى السواد اللى جوايا من ناحيتك
مصر:لا انا عارفة انه شوية زعل و حيروحوا و على العموم افتكريلى شوية حاجات حلوة عشتيها معايا و فى وسط اخواتك يا بنتى
دينا:اه و الله معاكى حق...بس اخواتى نصهم هجوا و خلعوا منك
مصر:معلش ان شاء الله يرجعولى احسن مما راحوا
دينا:يا شيخة دا فى منهم قاعد فى اسرائيل و مترستأ عالاخر
مصر(باطراقة حزينة):ربنا يهدى...بس دول انا مش محتاجاهم
دينا:امال نفسك فى ايه...؟؟؟ اوعى تقولى كمانانا..............ههههههههه
مصر:يا بنت بطلى شقاوة...نفسى فى دينا اللى مش متشائمة اللى عارفة ان فى امل و اللى بتبدأ بنفسها و مش دينا و بس ... دينا و محمد و حسنين و جرجس و تامر
دينا:لا تامر لا عشان مانخسرش بعض...خليها حماقى او منير و اهو اكيد انتى بتحبيه...طب اخرتها ايه؟
مصر:معلش شوية صبر و شغل بجد عشانكم قبل ما يكون عشانى و حتى لو ملحقتوش تعملوا حاجة اللى بعدكم حيقولوا الله يرحمهم اللى قبلنا بدأوا حاجات كويسة ولازم احنا نكمل
دينا:تفتكرى حتحلوى يا بت بعد عشرين سنة كدا ولا زى ما انتى ولا حتوحشى ولا ايه
مصر:زى ما انتوا عايزين و شغالين...ممكن بقى تفرحونى بيكم شوية..مايبقاش انتوا و المسئولين عليا
دينا:امرى لله...ححاول اعمل اعادة تأهيل و انسى كل اللى بيحصل دا و ارجع زى زمان...اه يانى منك مطلعة عينى بس بحبك
مصر:عارفة...و مش انتى بس و كل ال80 مليون ...... و انا كمان يا دودو
دينا:دودو...هو احنا بنتدلع غير فى كاس الامم و فى باقى السنة ناخد على افانا
مصر:تاااااااانى...ما قلنا خليكوا زى المنتخب
دينا:ماشى يا قمر.....انتى مالك احلويتى كدا
مصر:لا انا زى ما انا...بس لما تشوف اللحظة بعين تانية تقدر تعمل منها حاجة حلوة
دينا:هى وصلت لفودافون .....ماشى يا عسسسسسسسسسسسسسل