مواقف

كنت دائما استمتع بعمود الاستاذ انيس منصور مواقف _و مازلت_و رغم اختلافى معه فى الكثير من الافكار و عدم اقتناعى بها و لكنى اجد روح الاختصار او على رأينا يا شباب اليومين دول(الانجاز)من اقرب ما يكون الى ايقاع الحياة و اكثر الطرق تحقيقا لمبدأ خير الكلام....و بما انكم وحشتونى جدا و بما ان ايدى بتاكلنى عالكيبورد و عاوزة اكتب و بردو بما ان مفيش الموضوع اللى نرغى فيه بوست كامل....فعلى غرار كاتبنا الكبير...اخترت ان تشاركونى بعض الخواطر...اتفقنا...اختلفنا...وافقنا...رفضنا...فسنستمتع بالمشاركة و حسب

1. قالت لى احدى صديقاتى المقربات عاوزة(أمأم)....نعم....ايوة أمأم....حاجة كدا اتحبس فيها و انعزل عن اى حاجة جاية من برا....رافضة بهذا التعبير المصرى القديم جدا كل من يحبطنا اثناء رحلتنا نحو اهدافنا و كل من يبعد احلامنا عنا اكثر و اكثر بالفساد او الظلم او التعصب...رافضة كل امراض مجتمعنا....و التعليق يا ريت
2. ليت (الزهايمر)ينتهى من هذا البلد فى يوم من الايام....و لا ينسى كل فرد اصله....فلا ينسى الاب انه كان شابا...ولا تنسى الام ايام الطفولة....ولا ينسى المعلم مراحل تلقيه العلم..ولا المسئولين مراحل المواطنة...و على رأى اللى قال....من فات قديمه تاه
3. اه لو تعرف....على رأى نجاة....سيبكم من باقى الاغنية....اه لو نعرف جميعنا ان المرحلة التى نعيشها دائما اسهل بكثير من المراحل التالية فنستنزف كل لحظة من لحظات المرحلة الحالية فنعمل و نكد و نعطى و نحب و نعمل حساب ان اللى جاى اصعب
4. الفراغ.......اقترح على كل بنى ادم....مهما عانى من الفراغ الاجتماعى او العاطفى او الفكرى او النفسى....ان يعطى لنفسه فرصة للاستمتاع بالفراغ.....مبفكرش فى حاجة....ولا حد ولا اى موضوع ولا اى مشاكل....تمنيت كثييييييييرا فى الفترة السابقة ان احظى بهذه الفرصة الذهبية لتطبيق مبدأ(خراب يا دنيا عمار يا دماغى..هههههههههه)انما اكيد لفترة مؤقتة جدا لا تؤثر على مسار الحياة الطبيعى و انتهت الامنية بغبطة اخوانا بتوع (اليوجا)..فن التفكير فى لا شىء...و على فكرة...اقترح ان تكون اليوجا رياضة الشعب المصرى الرسمية....محتاجين نبطل نفكر عشان نحافظ على النوع المصرى من امواض القلب و الضغط و السكر و من ثم الانقراض....و لو اننا صامدوووون
5. بعد قراءة احدى التقارير المعبرة عن حالة مصر فى كثير من المجالات كالسياحة و الاستثمار و الصناعة والبحث العلمى و التجارة و التعليم و مدى تقدمهم جميعا فى عام 2008.و مش محتاجة اقولكم معدلات التطور و التنمية و التقدم ازاى مذهلين طبعا....تولدت امنية اخرى.........يا رب مد فى عمرى لحد ما اشوف يوم واحد للبلد دى حالها معدول...بردو يا ريت
6. اختراع بسيط اتمنى لو ان احدا يجد له سبيل فى يوم من الايام ...محول....يحول كل ما هو سلبى الى طاقة ايجابية من العمل و الكد و الاجتهاد....و طول ما احنا مستنين(حد)يعمل الاختراع دا عمره ما حيتعمل......يجب على كل منا ان يتقمص دور المخترع لفترة و لو امام نفسه فقط
7. اخرس......اقبل......افتكر....شوية كلام نفسى اقوله لشوية ناس....اخرس فتستحق ان توجه للنوعية اللى اتكلمنا عنهم....انصار مفيش فايدة و مفيش امل و كان غيرك اشطر....عزيزى المحبط اخرس....اقبل....فأنت عزيزى المواطن المحب للاختلاف مع الاخر لمجرد الاختلاف معه او حتى لاى سبب اخر فاقبله كما هو...اقبل الاختلافات تجد المشترك بسهولة اكبر....و افتكر...انما اقولها لكل طالب و طالبة نسى دور مدرسته و جامعته و اماكن كتير ليها دور غير الدور اللى هو فاكره خااااااالص......افتكر ان الجامعة لتلقى العلم و تلقى الصدمات فى العلم اللى انت بتتلقاه فقط لا غير.....مش باعتينك تظبك...ولا تشرب سجاير....ولا تعاكس زميلاتك ولا توقع بنطلونك ولابعتنا الطالبة الفاضلة عشان تدور على عدلها و تبدأ مسيرة الكفاح من اجل عريس و موضوع الجامعة دا لازم نتكلم فيه عشان انا شايلة و معبية...هههههههه...مش بس الجامعة...انما هى فكرة لكل مقام مقال
8. اقصى الاشياء......اصبحنا نعيش دائما فى الاقاصى...اقصى الانفلات و اقصى التدين....اقصى الامل...و اقصى الاحباط......اقصى القبول...و اقصى الرفض و قد لا يكون هذا غريبا فى حياة المجتمعات....و ما اجده غريبا حقا ان هذه الحالة انتقلت للافراد و لو ان بردو الافراد جزء من المجتمعات و انا اولهم....فأجد وصف النهاردة اجمل ما فيها العشق و المعشقة و شويتين الضحك و التريقة و وصف بكرا و طريقى ما طريقى ءأنا اصعد فيه ام اهبط ام انى لست ادرى؟.....خير الامور الوسط....نقدر نوصلها؟
9. من الكلمات التى شعرت انها ماينفعش تكون موجودة اصلا فى الفترة الاخيرة.....كلمة...تفاهات.....فما تجده انت تافه...قد يكون ذا قيمة عند غيرك...و ما تجده مالوش لازمة عند غيرك له و نص.....و تفاهات الغير جزء من شخصيتهم عليك احترامه حتى لو.....تفاهات
10. فكرت كتير لو ممكن اقود حملة حتكون حملة لايه....للقضاء على الفساد...ولا لحياة بدون تدخين....ولا لحياة بدون تظبيط....هههههه....ولا نحو تعليم افضل....و وجدت الاجابة....حملة تطوير الامثال الشعبية....امثالنا هى ثقافتنا و مراة شعوبنا و بتغييرها فبامكاننا تغيير ثقافة شعب......و اهو بردو تغيير
11. بيقولك....بيتهوفن....عندما قام بتأليف رائعته التاسعة قال بثقة ان كل شىء سوف ينتهى و يتغير و لكن هذا العمل سيدوم.....و هنا استوجب الشكر لصديقة لى متبنية قضية تثقيفنا الفنى.....تفتكروا ايه اللى ناقص عشان نقدر نعمل عمل كدا.....ثقته....موهبته....اصراره....قد يكون....و لكنى صرت على يقين ان الاصعب هو معرفة العمل نفسه لاننا جميعنا نمتلك المواهب و القدارت..و السؤال فيما نمتلكها؟
12. قارئى اللى دايما مدوخاك.....صدعتك....انما بالنظر الى البند التاسع....تذكر.....عليك احترام خواطرى و تفاهاتى و تحملها حتى اخر حرف فى البوست...........بلطجة بقى

و لكم منى الف تحية و سلام