Wednesday, April 2, 2008

تجريبيات ..و محافظ محافظ ..و عمر بن الخطاب

انها المرة الاولى ان اجنى على بوست بأن ألاحقه ببوست اخر بعده بفترة وجيزة...لسا كاتبة من يوميين انما طبعا طمعا فى كرم البلوجارية حبايبنا اللى حيقروا دا و اللى قبله و يسيبوا تعليقين كمان..بلطجة بقى
و انها ايضا المرة الاولى التى استفز فيها بهذا القدر من مسئول...اعلم انها عادة ان يستفزنا المسئولون عنا..و لكن هذه المرة تعدى كل الخطوط بكل الالوان
تعلمون انى اسكندرانية..و ارى الاسكندرية عروس البحر الابيض المتوسط و بونبوناية الشرق و روح مصر...اراها ارق و اجمل و انقى مدن العالم ...و اتأكد من هذا الرأى فى ضحكة بناتها و فى جدعنة شبابها و فى كل تفصيلة من تفاصيلها.......و الطبيعى لبلد بهذا الجمال و سكان بهذه الرقة ان يأتى محافظ منهم ..من نفس الطباع و نفس الجدعنة تجاه محافظته و تجاه بلده عامةامس..فى برنامج "عمرو اديب" شاهدت مهزلة حقيقية...
سمع الكثير عن مشكلة المدارس التجريبية فى الاسكندرية..التى تحولت الى تجريبى متميز و بالتالى ارتفع سعر المصروفات المدرسية من 200 جنية الى 1000 جنية مطالب بها الطلبة اثناء العام الدراسى الحالى و الا فلن يتقدموا الى الاختبارات النهائية و لن ينتقلوا من صف الى صف....ناقش عمرو اديب المشكلة و عرض صور للتجريبى المتميز صاحب البلاعات المسدودة حيث انه لا فرق بينه و بين التجريبى سوى اهانة الطلبة فى وسط المدارس لعدم سداد المصروفات و التهديدات اليومية بالطرد من المدرسة مع رفض النقل لمدارس اخرى......و قد تقرر تطيبق هذا النظام على جميع المدارس التجريبية فى الاسكندرية ابتداء من العام المقبل
اتصلت سيدة فاضلة بالبرنامج باكية تشكو سوء المعاملة...سوء معاملة ابنها بالمدرسة و سوء معاملة المحافظ لاهالى الاسكندرية ..و اظن انها كانت تشكو فى الحقيقة من سوء معاملة حكومتنا للانسان ابتداء من السويسى المقتول فى مياة قناة السويس و المصرى المجنى عليه على الحدود مع اسرائيل الى الطالب المهان فى محراب علمه
حكت عن توجهها للمحافظ للاستعانة به هى و اهالى الطلبة البسطاء و الاحتماء به من غول الاسعار حتى فى التعليم...فأجاب سيادته"مقدرش ألغى القرار...القرار ماشى على رقبتكم..ولا اقدر انقل ولادكم...و 1000 جنية ايه اللى بتتكلموا عليها دا انا بعلم بنت بنتى ب18000 جنية"و طبعا هذا الكلام الرائع صدر بعد عناء الوصول للمسئول ............ثم تعطف سيادته و اتصل بالبرنامج و اضاف انه اصدر القرار بناء على رغبة بعض الاهالى و المعلمين فى رفع جودة المدارس و بالتالى رفع المصروفات(و المدارس هى هى و البلاعات بردو مسدودة فى التجريبى المتميز زيه زى الحكومى حتى مش التجريبى العادى) و اضاف ان اقلية من اولياء الامور تعانى من ارتفاع سعر المصروفات و انه لن يشغل وقته الثمين فى سماع مشاكل كل مواطن سكندرى بل و لاتوجد معاناة اصلا و ان الالف و 200 طالب الذين يهانون يوميا فى مدارسهم و يطردون انما هم ايضا اقلية او يمكن لابسيين طقية الاخفا و مش باينيين لا هما ولا اهاليهم......و بصرف النظر عن مستقبل اولادنا هؤلاء و بصرف النظر عن اى احمق ينتظر منهم ولاء و انتماء لمصر(مع ان مصر مالهاش دعوة بشوية مسئوليين كفتة) تبين سيادته انه يتكلم فى قضايا فرعية فأخذ يناقش مع عمرو قضية(مين يروح لمين)عندما طلب منه عمرو الرد على الجماهير و الرأى العام بأن يظهر معه فى البرنامج..فأضاف(انا ما اجيلكش..انت اللى تجينى) و عندما وافقه عمرو قال مهددا(طب تعلالى بقى)ثم بدأت مرحلة التشكيك فى مصداقية البرنامج حيث فبرك البرنامج صور التجريبى المتميز ابو بلاعة و ان المدارس بالصلاة عالنبى زى الفل و الدنيا قشطة عالزبادى و الزبادى فى الخلاط بالاضافة طبعا للعبارات البهاراتية من (مش فاضى)..(مش حعد اسمع مشاكل كل واحد)....(اللى عاوزنى يجينى).. و شوية و يقولك(انت لو جيت مش حقابلك لانك جاى تعمل مشاكل مش جاى تحل مشاكل)و اصلا اصلا اصلا كلامه و صوته مش واضح نصيحة اخوية يجيب متحدث رسمى........ما علينا
اللى يعيش ياما يشوف و اللى يعيش فى مصر يشوف اكتر

انما احيط سيادته علما:
اولا:الاعلام هى السلطة الرابعة فى الدستور
ثانيا: حقنا عليه ان يسمع مشاكلنا بل و يكرث حياته كلها لخدمتنا و لحل مشاكلنا حتى لو كانت مشاكل فردية و ان كان يرى ان مشكلة 1200 طالب و طالبة مشكلة فردية فعليه ان يتعلم الفرق بين المفرد و الجمع من جديد
ثالثا:احب ان اضيف معلومة للمحافظ المحافظ اللى مش بياخد عالناس بسرعة و اللى بيحافظ على المسافات بينه و بين الناس و بيتكلم فى مين يروح لمين ...اضيف معلومة له و لكل مسئول فى بلادنا و اقولها بالعامية (انتوا شغاليين عندنا) و وظيفة كل منكم حل مشاكلنا
رابعا: اتسائل الاخ الدمنهورى مين اللى جابه يتولى امر اسكندرية ..هل انتخبه السكندريين ام انه القدر الذى نقله من دمنهور لاسكندرية مع كامل الاحترام لدمنهور طبعا و لكنى ارى ان من يحكم شعب او محافظة يجب ان يكون منهم كليا حتى يشعر بما يعانون منه
خامسا و اخيرا :اود ان ارسل سلامى و تحياتى لك يا (عمر بن الخطاب) فاروق الاسلام كنت و ستظل...ولى الامر الذى كان يسير على الاقدام يتفقد حال رعيته

ولانها مصر و لانها الاسكندرية المختصة بهذه المشكلة..ولان المشكلة مسئولون لا يقدرون قدر و عظمة ما تولوا امره من بلد عظيمة كمصر يبقى اللهم ولى امرنا للى يراعيك فينا و يدرك نعمتك عليه بأن يكون مصرى مسئول عن مصريين...قولوا امين يا بلوجارية يمكن تكون ابواب السما مفتوحة

36 comments:

أنا حر said...

هي دي المشكلة انهم مش عارفين انهم شغالين عندنا بفلوسنا اللي بندفعها في الضرائب
يعني هو واللي زيه والوزرا ورئيس الجمهورية كمان شغالين عندنا
للاسف هما بيطلعوا عنينا وهما شوية رتب سابقة في الجيش مبيفهموش اي حاجة في الدنيا
قدرنا ان نعيش في بلد كل علاقتها بالمواطن تعذيبه
تحياتي

dina said...

معاك حق و الله
شوية رتب سابقة وو بيبيعوا و يشتروا فينا
حسبى الله و نعم الوكيل

Mohamed Hesham Safa said...

آمين

walaa said...

اولا ازيك
ثانيا الاسكندرانيه مش بلطجين كده يا دينا الناس هتاخد فكره وحشه عننل ومش هتيجى تصيف عندنا هههه
ثانيا البوست ده انا كتبت بوست شبيه ليه قوى اسمه هو التعليم فى مصر هيتخصخص ولا ايه
وفعلا الناس دى شغاله عندنا
بس الفاروق كان ولم يعد مره اخرى
الناس دى مجاش زيهم على مر العصور
تحياتى ولاء

المـــفـــــــقــــــــوعـــــة مــرارتـهــا said...

انتي مادرتيش ان لو عاوز تعلم ابنك لازم تدفع ياإما مافيش تعليم ... كله بفلوس دلوقتي
انا اللي محيرني الدولة دلوقتي شالت أيديها من كل حاجة ... يبقي بتلم ضرايب ليه ؟
ولا هي فردة

FaceMoon said...

بيلموا ضرايب عشان المحافظ دة واللى زية يروحوا يصيفوا فى مارينا ويتبسطوا على حساب الشعب
قال تعليم قال والله لو دفعوا فيه مليون جنية يصلحوا الاول المناهج والمدرسين اللى بقت تعبانة من عدم الاحترام تبقوا سلمولى على التعليم والله ما انا فاكرة انا اخدت اية فى ثانوية عامة قال تعليم قال المفروض يسموها تحفيظ مش تعليم
ربنا معانا مش عارفة حنلاقيها منين ولا منين

dina said...

mohamed hesham:
مرسى عالمرور و يا رب ربنا يتقبل

walaa:
الناس تاخد فكرة وحشة عن اسكندرية لما يكون الاخ اسكندرانى اصلا و جاى بالانتخاب من الاسكندرانية بيبقى ما دام احنا قبلنا بيه يبقى دى شخصيتنا بقى كاسكندرانية ......بوست التعليم حيتخصخص بتاعك انا فاكراه و كان بوست مميز جدا فعلا و معاكى حق عمر بن الخطاب و الناس دى مش حتتكرر..مع ان هما لما عاشوا صح كان الطبيعى اننا نقتدى بيهم بعد كدا و نحاول نعيش على نفس الطريق...انما بتكلمى مين..مالهمش دعوة هما بالكلام دا

مفقوعة مرارتى من حماتى:
بالظبط كدا...اللى معاه يلزمه و اللى ماعاهوش مايلزموش...صحيح هما بيلموا ضرايب ليه و مبهدلين محمد شومان معاهم فى الاعلانات ليه
عجبى

facemoon:
صح هما بيلموا ضرايب علشان الاخ المحافظ يعلم بنت بنته بال18000 جنية و يحرم ولادنا احنا انهم يتعلموا....بجد معاكى حق..انا دايما بقول لو كان للتخلف كلمة واحدة مرادف ليه فى مصر لازم حبقى التعليم
تحياتى

HeBa said...

دينا

أنا أسكندرانية على فكرة

بصي يا ستي

أنا سمعت الحكاية دي من مدة ومصدقتهاش في الأول

بس اتضح فعلا أنها حقيقة

أنا جالي ذهول أمال فين مجانية التعليم اللي بنسمع عنها منذ فجر التاريخ

خلاص هتتلغى

أنا سمعت إن لما الناس اشتكت لوزير التعليم قالهم دي محليات مليش دعوة بيها

مش فاهمة ازاي يعني مع إن المدراس دي تابعة لوزارة التربية والتعليم

ده حتى مدرسة لوران اللي كانت عادية ومش تجريبية ولا حاجة بقت مصاريفها 1000 جنيه برضه

بجد حاجة مستفزة جدا

بس إن كان سايبين الناس تعاني من الغلاء ومش طايلين العيش الحاف هيحلوا مشكلة زي دي


تحياتي

*سمر* said...

لك الله يا مصر ..

دى المرة العشرتاشر اللى اقول فيها التعليق ده فى مدونات مختلفة ..الناس كلها حاسة بالظلم ..وبتشتكى ..

اسلوبك رائع ..موهوبة..ان شاء الله هاجى تانى :)

كلبوزة لكن سمباتيك said...

الفرق بين التجريبي العادي و المتميز البلاعات المسدودة هاهاها سخرية لازعة لكاتبة مبشرة بكل خير


امنياتي لك بالازدهار و التميز الدائم
تحياتي

صاحب المضيفة said...

ومين هايسمع الكلام ده ومسن ها يعمل بيه


ربنا معانا ويبلغان ماتحلمين به يارب


تحياتي

صوت من مصر said...

بوست هايل جدا يا دينا وفقك الله واخدوا منك ضرايب

dina said...

heba:
اه مستفز اوى موضوع الوزير بتاع التربية و التعليم اللى مالوش دعوة بالتعليم دا....ما دام كلهم مالهمش دعوة بحاجة بيمسكوا مناصب ليه
منورة المدونة يا اسكندرانية
تحياتى

سمر:
مرسى لمرورك يا جميلة و يا رب تكررى الزيارة دى لانها فعلا اسعدتنى جدااااا و فعلا لكى الله يا مصر

sampateek:
ربنا يخليكى ..دا بس من ذوقك و رقتك و لما الموضوع يبقى مستفز للدرجة دى لازم نضحك بدل ما نفرقع
تحياتى

صاحب المضيفة:
على رأيك..دول ودن من طين و اختها التانية مع عجين..تحياتى

صوت من مصر:
حسبى الله و نعم الوكيل...اخرتها ياخدوا منى انا ضرايب...طب تصدق يا ريتها تيجى على اد كدا
دا انا حاسة انى حتاخد امن دولة على اخر السنة بجد
تحياتى

Desert cat said...

تعرفى احنا السبب فى اللى بيعملوه فينا
اتعودوا يدوسوا علينا ونسكت
فلما يخلونا نشحت وولادنا يترموا فى الشوارع بلا تعليم بلا وجع قلب عارفين ومتاكدين برضه اننا هنسكت
تحياتى

تــــايه ومش تـــايه said...

نقول ايه .مبقاش فيه دم ولا اى حاجه من الاحمر .كل اللى اتكلمتى عنهم شوية متخلفين قاعدين على كراسى .
مش عارف ينام ازاى وفيه ام بتبكى عشان مش قادره تسدد مصروفات ابنها .ازاى ينام وفيه ناس بتدعى عليه .الناس دى مش طبيعين دول مرضى عقليين

dina said...

desert cat:
معاكى حق و الله...السلبية و السكوت عالغلط هو اللى بيخلى الغلطان يتمادى

تايه و مش تايه:
دا مش مرض عقلى..دا ضميرهم اللى مريض بعيد عنك..فعلا مش عارفة ازاى ادا ضميره حقنة هوا كدا و خلاه يقدر يسكت عاللى عاملينه فى الناس
حسبى الله و نعم الوكيل

في حب مصر said...

أنا بصراحة متضايق، ازاي بس تزعجوا سيادة المحافظ وتدخلوه في مشاكلكم. ايه مش عارفين تحلوا مشاكلكم .. أما شعب وحش صحيح
وايه يعني لما المحافظ يخلي بنت بنته تتعلم ب 18 الف ولا حتى 180 الف.. ليه الحقد ده.. مش هو محافظ؟؟؟؟؟؟

نصيحتي لكل واحد ممكن تتفقع مرارته من التصريحات والمواقف البلهاء اللي من المسؤولين العبط بتوعنا انه ينسى ان فيه حكومة، احنا فعلا دلوقت بنعيش مرحلة اللادولة.. تعاملوا مع الوضع ولا كأن فيه حكومة.. اعتبروها ماتت.. والضرب في الميت حرام

تقبلي مروري

dina said...

فى حب مصر:
عارف اختى الصغيرة لما بشتكيلها من مدرس مزعلنى بتقولى اتعاملى معاهم على انهم مجانيين و خديهم على اد عقلهم...فكرتنى بيها و الله بس انتوا معاكوا حق...لازم بعد كدا نتعامل بمبدأ الحكومة الميتة و المدرس اللاسع
تحياتى

استراحة محمد said...

بتهيألى ما كنش فاضل من مبادىء الثورة غير مجانيه التعليم .. وربنا وفقنا وقدرنا نتخلص منها
هااااااااااااااايل
اتمنى زيارة مدونتى
estraha.blogspot.com

شقاوة شعب said...

طبيعى
لما سيادته يدفع بنت بنته 18 الف جنيه فى السنة
طبيعى انه يشوف الالف دى ولا حاجة
طب ما يتكرم سيادته وصدقة عن صحته وعافيته وعافية بنت بنته ..يتصدق على الهالى دول كل اسرة الف
وتخلص المشكلة

ولا ايييه ؟؟

تحياتى
شيماء

أغوغا غوغا said...

جميلة المدونة اوى والأجمل الموضوعات اللى فيها وأتمنى أن استمر فى متابعة موضوعاتك وأتمنى كمان اشوف موضوعات أكتر ليك مع تحياتى وتمنياتى بالتوفيق دائماً

Unknown said...

بفلوسي يا كلاب

موضوع جميل وبلوج جميل برده

عمو احمد said...

والله يابنتى كنت لسه بفكر فى الموضوع ده
الناس دى فاهمه الدنيا غلط
انك تبقى مسئول كبير دى مش حاجه سهله
مش فلوس وعربيات وبرستيج وانك تتعالا على الناس وتبعد عنهم
على العكس المفروض تقرب منهم وتعرف مشاكلهم
وتحس بيهم وتموت نفسك عشان مصالحهم
وربنا على الظالم

mnoon said...

انتوا شغاليين عندنا

الله عليكى

هم فعلا شغالين عندنا وبفلوسنا

الله يرحمه سيدنا عمر بن الخطاب

مفتكرش إن حد منهم

فكر يقرأ سيرته

ولا هيفكروا

سلااااااااااااام

قلوب بتغنى said...

صباحو اناناس
شغالين عندنا!
يالهوى اتجننتى يابت
تغلطى فاسيادك يا حتة عبده لا روحتى ولا جيتى
ادى اخر الدلع فى شعب مايع ومرع
ايه يعنى الف جنيه مش بدل ما ينزلوا يعملوا بيها شوبنج
مستقبل ولادهم اولى
ايه يعنى البلاعه مسدوده
ده تميز يا جهله
كل البلاعات مفتوحه دى بقى مسدوده
اشطات

الآء said...

بجد حال البلد بقا صعب قوي
وحاجه مستفزه انها تترفع من 200 لل 100 جنيها
هي الناس مرتباتها كام أساسا علشان يدفعوا 1000
وحتي لو ال1000 جنيها ادفعت تفتكروا الحال هيتصلح
حال المدرسين التعبان وحال المناهج العتيقه والدروس الخصوصيه
أعتقد اننا محتاجين معجزه علشان مشاكلنها تتحل

dina said...

استراحة محمد:
ياااااااااه..دى ذكريات..انت لسا فاكر موضوع الثورة دا و المبادىء..كانوا 3 اقامة و 2 تحقيق تقريبا..هههههههههه
اشكر مرورك

شقاوة شعب:
اه و الله يا شيماء حلو المبدأ دا...يتصدق على الشعب من فلوسه..يا سيدى
تحياتى

اغوغا غوغا:
مرسى عالمرور الكريم جداااااااا..و يا ريت نشوفك تانى
تحياتى

everlasting love:
اه و الله احلى وصف للموقف....بفلوسى يا كلاب

عمو احمد:
اه و الله يا عمو احمد معاك حق...الناس دى مش فاهمة يعنى ايه مسئولية و ازاى حيتحاسبوا عليها ادام ربنا

mnoon:
مش فاهمة لما ولاة الامر ما يفكروش يعدوا على سيرة سيدنا عمر..امال مين اللى حيقراها و يطبقها فى حياتنا

قلوب بتغنى:
السماح و الرضا..و النبى ما كان قصدى..دا انا بس كنت ببعبع بكلمتيين..انما هو حد حيعبرنى ولا حيعرف انا بقول ايه اصلا..حاشا و باشا

الاء:
بصى يا الاء..عصر المعجزات خلص من زمان و اللى عاوز فعلا يغير لازم يبدأ بيه...المشكلة ان فعلا التعليم بالذات عندنا عاوز يتفجر اصلا..ما بقاش ليه ميزة واحدة توحد ربها
تحياتى

(احمد سكر ) said...

مش هنقول غير حسبنا الله ونعم الوكيل

ولا تعليق

احمد سكر

dina said...

سكر:
بالظبط كدا...مفيش حاجة تانية ممكن تتقال
تحياتى

كلمتى said...

يااااااااااااااااااااه يادينا
هو فينه عمر بن الخطاب
ماكنش هيبقى ده حالنا
رضى الله عنه وارضاه
تحياتى

dina said...

كلمتى:
اهلا اهلا..ايه النور اللى فى المدونة دا...يا سلام لو كنت محكومة بحد زى عمر بن الخطاب...بجد كانت كل حاجة اختلفت
تحياتى

canary said...

فى الاول واضح طبعا جدا عشقك ل أسكندريه الجميله اللى رغم انى صعيديه الا انى من عشاقها وافتخر بكدة
تانى حاجه بقى. انتى عقلك رائع يا عزيزتى وبصراحه وبجد انت عندك 17 سنه؟؟معقول التفكير المنظم دة وألاراء المنطقيه جدا اللى شايفه فعلا ان المسؤلين هما مجرد موظفين عندنا رأى شاب اوى كدة
ثالثا ودة الاهم انا معاكى فعلا فى تحيه الخليفه الذى لم يرى الزمان مثله
احر واجمل تحياتى للعقل الرائع اللى عجبنى جدا دة

dina said...

canary:
بجد كلامك اثر فيا جدا جدا جدا جدا..و زيارتك لمدونتى شرفتنى و شهادة مدونة رقيقة زيك شرف كبير جدا ليا..و على فكرة انا اصلى صعيدى من اسيوط يعنى بردو بلديات...عاوزة اشكر ذوقك و رقتك و مرورك الرائع دا و يا ريت اشوفك تانى قريب
تحياتى يا جميلة

صوت من مصر said...

ليكى تاج عندى تعالى خديه

استراحة محمد said...

انا اهدتلك التاج .. اتمنى تقبلى منى
تحياتى

dina said...

انا بجد يا جماعة متشكرة جدا جداااا و دا شرف كبير اوى ليا انت يجيلى تاج من اتنيين من اجمل المدونيين و اللى انا فعلا بعتز بمدونتهم و بصداقتهم و بدماغهم اذا كان صوت من مصر او استراحة محمد..بس كدا يا جماعة حهدى التاج لعشرة..خمسة بتوع تاج محمد و خمسة بتوع صوت من مصر ولا ايه الحوار يا جدعان
ما علينا بقى
ربكم يسهلها
مرسى جدااااااااااااااااااااااااااااااااااااااااا ليكم