Thursday, April 24, 2008

على بابا و ال700 الف طالب



كان ياما كان يا ولاد فى يوم من الايام واحد اسمه على بابا..كان مسئول عن 700 الف طالب و طالبة و كلهم فى الثانوية العامة..الطلاب دول يا شباب مش بيروحوا مدارس و كانوا بيضربوا مرضى و بياخدوا دروس فى كل المواد فى مراكز للدروس الخصوصية و فى بيوت اصحابهم كمان..و كانوا مبيعين اهلهم اللى وراهم و اللى ادامهم عشان يعرفوا يعلموهم..على بابا معجبوش الحال..فابتكر حل حلو اوى..الحل يتمثل فى جملة(اقفل يا سمسم)..قرر يقفل كل مراكز الدروس الخصوصية علشان محدش ياخد دروس و قرر يلغى الاجازات المرضى علشان محدش يعمل فيها عيان و يزوغ من المدارس..انما يا ولاد تعالوا نشوف حال ال700 الف طالب دول..كلهم او احقاقا للحق خلينا نقول 600 الف منهم مش بيروحوا مدارس علشان عارفين انها زى قلتها و تقريبا حجم الاستفادة صفر% انما هو عنده 30 يوم غياب بعدها يحول منازل و يفقد ميزة المدينة الجامعية فبيكون الحل ضرب المرضى و فى نفس ذات الوقت انه مش بيستفيد من المدرسة بياخد دروس خصوصية...مشكلة على بابا انه عالج العرض و ساب المرض ..لغى المرضى..سامعة حد بيقولى طب و العيان يعمل ايه حقولك ان اجازته المرضى لازم تعتمد من القاهرة ..تقولى طب و العيان يروح القاهرة ازاى ولا حد من اهله حيفضى للروتين دا ازاى..اقولك علمى علمك


و فى نفس ذات الوقت على بابا ما اتكلمش عن الموظفين اللى بيشوفوا الطلبة ادامهم زى القرد و بيمضوا المرضى ولا كأنه شايف حاجة..و على بابا برده لما قفل مراكز الدروس ماقالش حنعمل ايه فى الدروس الخصوصية اللى فى البيوت؟..هو الاعتراض على فكرة الدروس ولا على المكان؟و فى نفس ذات الوقت بردو ازاى تكون الدروس الخصوصية ممنوعة و يطلع تصريح ببناء مركز دروس خصوصية و بياخدوا منه ضرايب كمان.. و فى القرارين لم يعترف على بابا ان الطالب غير مستفيد من مدرسته ولا ان المناهج مالهاش لازمة (اغلبها)و اللى له لازمة بتروح قيمته فى طريقة تدريسه الخاطئة ..ولا اتكلم عن نظام التنسيق اللى لازم يتفجر دا


و بكدا يا ولاد على بابا عمل زى اللى عنده صداع و عارف انه بسبب مرض خطير قام واخد بانادول على ريفو و تناسى المرض الاصلى .....اتفق مع على بابا ان دى ظواهر خاطئة انما اختلف فى طريقة الحل من وجهة نظره


و بكدا يا ولاد كانت حدوتة على بابا حدوتة مصرية(مع الاعتذار لمحمد منير)و كالعادة بدون نهاية و بالتالى انضمت جملة (اقفل يا سمسم)عن جدارة الى الاقوال المأثورة فى التراث المصرى لانها حتتكرر فى الفترة الجاية كتير وابقوا قولوا دينا قالت
ملحوظة:الرقم بتاع ال700 الف دا من عمنا محمود سعد لو طلع غلط انا مليش دعوة و دا تحقيقا للشفافية و المصداقية عشان الحكومة تتبسط

56 comments:

Unknown said...

دى مشكلتنا دايما بندى مسكنات وننسى الاساس عمرنا مبنعالج الاصل علشان نمنع المضاعفات

ربنا يصلح حال الجميع يارب

FaceMoon said...

الله حدوتة مصرية صحيح
هيا دى مصر يادينا
والقرارات دى بتطلع لمصلحة ناس تانية
وهما اصلا مش قاصدين يحلوا بيها مشاكل البلد هما قاصدين يحلوا مشاكلهم ومصالحهم وبس التعليم فى مصر اصلا كلة كدة مش نافع لازم يتنظم ويترتب من الاول بس تقولى لمين
حدوتة فى الجون يادينا وبوست جميل كالعادة متغبيش علينا
تحياتى وحبى

kmt said...

السلام عليكم ورحمة الله وبركاته
بجد اسلوبك حلو اوي في السرد والعرض
خلتيني اقرا للنهاية علي الرغم من اني بمل بسرعة من الكلام اللي عارفاه ومش عارفة احله
بس انتي عرضتي المشكله بصورة لذيذة
تحياتي الي لقاء
us4her.blogspot.com

مـحـمـد مـفـيـد said...

مشكله تتوارثها الحكومات والمسئولين ومازلنا ننتظر الحل

قلوب بتغنى said...

الدروس الخصوصيه
مينفعش تتحل كده
طيب مايرفع مرتبات المدرسين بدل ما بيخلو العيال يخدوا عندهم دروس فرده
ولا يعملهم دورات تدريبيه تحسن من مستواهم بس دورات حقيقيه مش كده وكده
تحياتى

dina said...

هيثم الدهشان:
ما دى المشكلة فعلا...كله مقضيها مسكنات و سايب الاساس
تحياتى

FACEMOON:
دايما مثبتانى بكلامك و الله...كلك ذوق و كفاح يا بنوتة

KEMET:
و الله انا نفسى مش بحب اتكلم فى مشاكل مالهاش حل..انما يمكن كلامنا يحل حاجة او على الاقل يخلينا نعرف اخطائنا

محمد مفيد:
المشكلة فى الطلبة اللى عمالة تتحمل نتايج مشاكل حكومات مش عارفيين يحلوا حاجة

قلوب بتغنى:
دا حل حلو جدا..بردو فكرة انهم سايبيين الاصل و بيتكلموا فى الفروع

مواطن مصرى نايم said...

موضوع جاى فى وقتة
مع نزول الجداول بتاعت الثانوية
بس الشعب المصرى مش بيغلب
زى ما كانوا بيظبتوا حكاية المرضى
حيظبتوا حكاية المنازل
بس لامتى حيفضل الشعب المصرى يظبط نفسة
مع كل الضغوط اللى بيتعرض لها
حسبى الله و نعم الوكيل
بلوجك جميل جدا
شكرا لزيارتك بلوجى
سلامى ليكى

canary said...

يا قمر لازم التعقيد
الحياة من غير تعقيد تبقى ممله وبايخه
واحنا بلاش نبقى شعب رخم ونتغابى على الحكومه وهى يا حبه عينى بتحاول تضفى اثارة على حياتنا
ومش كل اما تحاول تبعد عنا الملل وتخلينا اكشن احنا نتغابى اكتر
فيها ايه يعنى لما يكون فيه طالب من محافظه نائيه وتعبان وعيان وبيموت نروح نوديه القاهرة عشان ياخد اجازة مرضى من هناك
دة احنا بنفسحه وبنخليه يقدر يزور اولياء الله الصالحين اللى يقدرو يخففو عنه المرض
والنبى بلاش كدة ونقلب كل حاجه حلوة لوحشه
افهمو بقى

NilE_QueeN said...

معلش بقي انا هختلف معاكى ف نقطه
المدرسه مفيده بطريقه ما

احنا ف الدروس بنكون سابقين المدرسه فا لما بناخد الدرس ف المدرسه بيبقي نوع من المراجعه وانعاش الذاكره ولو حاجه وقعت مننا ف الدرس نلقطها ف المدرسه والتكرار بيعلم الشطار

وعلى فكره اغلب المدرسين المشهورين بيبقوا واخدين اجازه من المدرسه ومتفرغين للدروس

انا مؤمنه ان مينفعش نفهم وننجح ونجيب مجموع من غير درس خصوصي
غير ان مناهجنا عقيمه وبتقتل اى ابداع او اى تشغيل دماغ
انتى معاكى حق جدا ف حكاية المرض والعلاج والمسكنات احنا لسا ماشيين ف حلنا لمشاكلنا بعقليه عشرات السنين لورا
وحسبنا الله ونعم الوكيل ف كل مفترى

Zika said...

صحيح حدوته مصرية اخر حاجه
متهيالي الحدوته ماتنفعش غير في مصر
تحياتي

صوت من مصر said...

الحدوته طويله بجد ممكن اختصار فى كلمتين او حتى اكون واحد من ال 700 حرامى على الاقل هكسب

مدحت محمد said...

دروس خصوصية ايه اللى تتحل
بعد عشرين سنة واكتر بتقلى نحل
ربنا يهدى

ذو النون المصري said...

التعليم هيفضل ازمه مصريه في عظام المصريين كلهم الا اذا!!!!!!!!!!!!!!!!!!!!!!!!!!!!!!!!!!؟؟؟؟؟؟؟؟؟؟؟؟؟؟؟؟؟؟؟؟
الا اذا ايه بقي
مش عارف اوضح لان المطلوب لاصلاح مصر و تعليمها كثير جدا لا يمكن حصره في تعليق
لكن باقترح اننا ممكن نتفق كلنا اننا نكتب افكارنا عن اصلاح التعليم في توقيت واحد و نتبادل الافكار
زي ما قررنا نتفق علي يوم اضراب و الحكاية انتشرت ممكن نتفق علي تبادل الافكار حول اصلاح التعليم

mnoon said...

ياعينى يابنتى

دا إنتى حطاهم فى قلبك وساكته

ولا يهمك بكره تخلصى

وترتاحى

ومتلقيش حاجه تعميلها

على الأقل

إنتى بتستمتعى بالفرجه

على أداء على بابااااااااا

غير مش لاقى حاجه يتفرج عليها

منى said...

عندك حق يا دينا ساب المرض وعايز يعالج العرض
مع ان بديهى طالما المرض لسه موجود يبقى الاعراض مش هتختفى
يعنى لو الطلبه بيستفيدوا من المدرسه ايه اللى يخلي اهاليهم يدفعوا اللى وراهم واللى قدامهم فى الدروس
تحياتى يا جميل

القلم السكندري said...

الحمد لله الذي عافانا من سنوات الثانوي العجاف عليها لعنة الله

وربنا يعافي كل ابناء المسلمين

بس هي المشكلة انهم بيطلعو من بلوة لبلوة

كانت هي يعني الجامعات اللي عدلة اوي

ربنا يتولانا برحمته


تحياتي يا اسكندرانية

تــــايه ومش تـــايه said...

المشكله انى على بابا كبيرو يشتغل حرامى ويشرف على اربعين حرامى مش اكتر
لانو غبى من الاخر
ومتستنيش من اى على بابا انو يعمل حاجه صح
تحياتى

mohamed said...

أنا مرة قلت لواحد من المسؤلين حل لمشكلة الثانوية العامة ,وتحديتة أنة مجرد يناقشة وطبعا سيادتةعمل ودن من طين وودن من عجين لية بقى
لأن وبأختصارمملكة الدروس الخصوصية,بالاضافة الى وزارة التعتعة سوف تفقد سبوبة الثانوية العامة
ما هو الاقتراح الذى قلتة للمسؤل؟
بأختصار شهادة أتمام الدراسة الثانوية
تصبح شهادة اتمام تعليم فقط لاغير
أما من يريد دخول كلية معينة
فعلى كل مجموعة من الكليات التجارية أو طبية أو هندسية الى آخرة
أن تضع مجموعة من الكتب التى تحوىالمادة العلمية الاساسية التى يحتاجها الطالب فى هذة الكلية وعلى من يريد ان يلتحق بهذا النوع من الكليات أن يقوم بدراستها بمعرفتة ومن يحققمجموع يصل الى السبعين فى المئة فى أمتحان عام يصبح لة الحق فى دخول الكلية التى اختارها بصرف النظر عن تاريخ حصولة على الثانوية العامة او مجموعة فيها

Desert cat said...

ماهى المشكلة يا دينا ان على بابا ملقاش حد يقوله ايه فرعنك يا على بابا وبالتالى ساق فيها
ربنا عليه ومعانا ان شاء الله
تحياتى ليكى يا جميل

Tamer Nabil Moussa said...
This comment has been removed by the author.
Tamer Nabil Moussa said...

معلشى يادينا


طول ما احنا عايشين

ياما هنشوف

ربنا يكرمك


تحياتى

الآء said...

والله المشكله كبيره
مش مشكله مراكز دروس وخلاص
المشكله مشكله فكر وثقافه ان الواحد مش هيعدي من غير دروس
مشكله ضمير المدرس
وضأله مرتبه وارتفاع الأسعار
وغباء امتحانات بتعتمد علي الحفظ والتوقعات
ومناهج عقيمه بتعتمد علي التكرار

والله احنا محتاجين معجزه

*سمر* said...

جميل اوى البوست ده بجد..بس انتى اعده تكتبى عن الثانوية العامة ..والشهادات المرضى ..ومش عارفه ايه ...
روحى زاكرى يا بنوته ..عايزين مجموع ..
ربنا معاكى انتى و اختى

dina said...

مواطن مصرى نايم:
متفكرنيش و النبى بموضوع الجداول بتاعة الثانوية العامية دا...اهو كل الثانوية و التخلف اللى فيها فى كوم و كمية الاعاقة بتاعة الجدول بتاعنا فى كوم تانى
حسبى الله زى ما انت ما قلت

canary:
احنا اللى مش فاهمينهم صح...مخنا المتواضع مش مستوعب دماغهم العبقرية
هههههههههههه

nile_queen
انعاش للذاكرة...ههههههه
ما المدرسة لما تبقى انعاش للذاكرة و يبقى دورها ثانوى اوى كدا دا فى حد ذاته مصيبة

zika:
بالظبط كدا....نحن نختلف عن الاخرين ...خالص
ههههههههههه

dina said...

صوت من مصر
ههههههه...فكرتنى بمدرسة عندى كان عندها مقولة مأثورة كدا...كانت دايما تقولنا نص الشعب المصرى شحاتين و النص التانى حرامية
ههههههههه

مدحت محمد:
هو يمكن الخطوة اللى اخدوها انهم يفكروا فى ل بصرف النظر ان الحل عقدها زيادة...بس النية كانت كويسة
اتحسبتلهم خلاص

mnoon:
هههههههههه
اسكتى...دا انا اللى مصبرنى عليهم انهم بيخلونا نلاقى حاجة نكتبها فى المدونة...دا على بابا دا حيخلينى اكبر صحفية فيكى يا بلد...او اكبر مكتأبة على حسب بقى

منى:
تمام يا منى..دا اللى انا بتكلم فيه..لما اكون انا فعلا مستفيدة من مدرستى ايه اللى يخلينى احمل اهلى اعباء مادية و احمل نفسى اعباء نفسية و ضفط اكتر
تحياتى

القلم السكندرى:
اجدع ناس...منور المدونة و الله العظيم و بجد اديتنى جرعة تفاؤل..يعنى الجامعة انيل من الثانوى...سمعونا سلام صعبت عليا نفسى و النبى
هههههههههه

dina said...

ذو النون المصرى:
بجد دى فكرة حلوة جداااااااااا جدااااا و انا معاكم فيها طبعا..انا بجد ممكن اكون مش بدخل كتير عشان الدراسة وكدا بس انا نفسى جدا اتكلم فى موضوع التعليم دا...دى فكرة عبقرية بجد و يا ريت تحاول فعلا تنسقها و تقولى بقى الجديد ..يمكن يكون بداية الحل اننا نتكلم عن مشاكلنا و نشوفها بأكتر من عين
تحياتى

dina said...

:تايه و مش تايه
على رأيك و الله...يعنى هو على بابا دخل المغارة عشان يصلح الدهب ولا عشان يكوش عليه
هههههههه

mohamed:
انا فعلا كنت بتكلم مع واحدة صاحبتى امبارح فى حاجة شبه كدا...بس مش علشان نحل مشكلة الدروس..انما لان الطبيعى ان الطالب بيطلع من الثانوية العمومية اصلا كاره التعليم و الكتب و كاره الوزارة و كل حاجة فى الدنيا و دا اكبر نجاح لنظام التعليم فى بلدنا..انهم حطوا هدف اننا نكره التعليم و الحمد لله وصلوله عن جدارة و استحقاق و من الحاجات المهمة بردو اللى انت قلتها الباشا اللى عمل ودن من طين و ودن من عجين ...امتى حيفهموا ان احنا شغلهم..و ان سماع مشاكلنا و حلولها بعيونا احنا دا اهم حاجة المفروض تشغلهم...بجد مش فاهمة
كل واحد صوته من دماغه و يا ريت الدماغ راكبة يمين و فى بينها و بين دماغ صاحب المشكلة توافق
حسبى الله و نعم الوكيل
تحياتى

desert cat:
تماااااااااااااااام
احنا من اهم الحاجات اللى خلت الفساد فى بلادنا يوصل للدرجات دى
صح و الله

tamer nabil:
صح و الله..اللى يعيش ياما يشوف..و اللى يعيش فى مصر يشوف اكتر و اكتر
تحياتى

الاء:
بالظبط يا الاء...هى منظومة كلها و كله منفد على بعضه ولازم كل دا يتغير بجد من الاصل مش تغيير سطحى
تحياتى

سمر:
ما هو انا لو سكتت يا سمر يا حيجرالى حاجة يا اما حيجرالى حاجة...اهو يمكن الكلام يخلينا نحط ايدينا على حاجة نقدر منها نبدأ و نغير بجد
مرسى لمرورك الرقيق دا و سلمى على اختك رفيقتى فى العناء الثانوى

۩۝۩ Dr. Flavio ۩۝۩ said...

بصراحه علي بابا ده مينفعش يغير ولا يعدل ولا يصلح حاجه

من يوم ما طلع وهو بيتعامل مع حراميين

-حلوه حراميين دي-
لكن تقولي لي يحاول يعدل نظام اللي ماشي عليه 700 ألف طالب .. أقول لك لا يمكن لأنه لو عدله زي أيام زمان ولغى الدروس ولغى المرضي ... الناس مش هتلاقي تاكل لأنها مش هتشتغل وحتى اللي بيشتغلوا وبيمشوا أمورهم .. هيطقوا لأن المرتب مش مكفي

وفى الآخر ال 700 ألف طالب هيشتكوا من صعوبة الامتحان لأنهم عمرهم ما هيفهموا حاجه من المدرسه .. اللي راحوها في الأصل عشان الغياب مش عشان يتعلموا

يعني لو على بابا عمل كل حاجه بالظبط هيلاقي سمسم جاي له يشيله من مكانه تاني يوم لأن البلد ساعتها مش هتمشي

طريقتك في الكتابه لذيذه .. تقبلي تحياتي

dina said...

محمود فرج احمد
هههههههه
و بعدين بقى فى مشكلة على بابا و سمسم الحراميين دول -حلوة حراميين دى اوى-مش عارفة و الله اخرتها معاهم ايه
اما نشوف بقى
سيبك انت...الف شكر عالمرور و الكومينت اللذيذ دا
تحياتى

marktwain said...

كان يا ما كان في زمن من الازمان و بلاد ملينة بتنجان كان كله حاجة ماشية بالمعكوس بس لانك معاك الفلوس
اما اللى مالهوش حماية تلقة الكل عامل عليه وصايه و نزل البلد فيوم غريب الناس فضلوا يسألو عدو و الا حبيب . كان الغريب انسان كتير السؤال و فضل يسال الاهل عن الاحوال و من ضمن ما سأل كان السؤال " كيف حال التعليم ؟" قالو الكل في السليم
العيال بتنجح بالكوم و مش مهم يعرفو الفرق مابين البصل و التوم
دي بلدنا كلها متعلمين و مافيناش ياخويا خايبيين

تحياتي للتعليم الرائع و التربوية و عاش الوحدة ال..

Unknown said...

أضف أليها مقولة : الى مش عاجبه يشرب م البحر

من المأثورات برضه و هى اصل كل الحواديت المصرية مع الاعتذار لمنير

Miss. Sosa said...

عرضك للمشكلة جميل جدا بس انتي نسيت دور الست مرجانة
هي اللي مضيعة علي بابا اي حد يغمزها بحتة بخمسة تديله شهادة مرضي ممضيه بختم الصقر علي طول

dina said...

marktwain
ماشاء الله...بجد اول مرة اشوف كومينت احلى من البوست نفسه و جايب من الاخر و ملخص المشكلة كلها فى سطور
تحياتى

عاليا حليم:
ايوة كدا يا لولو...خليكى معايا عالخط...عاوزيين بقى نجمع المأثورات المصرية دى لان دا تراث لازم نخاف عليه من الضياع اكتر ما هو..و مع الاعتذار لمنير بردو

Miss. Sosa
و الست مرجانة كمان عشان خاطر ميس سوسو..ما هو وراء كل عظيم امرأة و وراء كل حرامى قاتلة و الطيور على اشكالها تقع

walaa said...

الحدوته دى شبه التعليم المصرى الفاسد انت بتغشى يا دينا هههههه
والله فكرتينى بايام الثانويه العامه
المدرسين مش لاقين مرتب يكفيهم لذلك قرروا اعطاء الدورس
وقالك كدر تعليمى من اجل رفع الكفاءه التعليمه وبرده الحال كما هو مفيش تعليم غيير بالدروس
دى سياسه علشان البلد تفضل غرقانه ومحدش يقولهم ايه الفساد ده
تحياتى ولاء

shirry said...

علي فكرة المشكلة دي موجودة وكل سنة بتكرر نفسها
بس هقولك ايه يعني
هي دي بلدنا بتعمل اي حاجة في اي وقت من غير ما تفكر في اي عواقب او حلول جذرية
المهم شدي انتي حيلك

وابقي تعالي

Yahia said...

انا اكيد متفق معاكي في كل اللي بتقوليه بس برده لازم نفكر احنا في حل ، تتفتكري انت ممكن علي بابا يعمل ايه ؟

سلام

mohamed said...

علي بابا شششششششششششششششش عشان ده سر. مستني منك جديد

Tamer Nabil Moussa said...

ازيك يادينا

اخبارك اية

فى انتظار جديدك

تحياتى

mohamed said...

دينا أنا سعيد جدا بزيارتك لمدونتى شرفتينى ونورتينى وتبقى دايما تزورينى

بس تبقى وانتى جاية تجيبى شيكولاتة

dina said...

walaa:
كدر تعليمى.....دا كدر الكاميرا اجدع منه
المشكلة ان الطلبة اللى هما الوحيدين اللى ليهم الحق فى اختيار تعليمهم و مستقبلهم هما اللى برا اى كدر
تحياتى يا ولاء

shirry:
على رأيك و الله يا شيرى..اى حاة فى اى وقت لاى حد
و انا جاية قريب ماتقلقيش

yahia:
ما انا بقولك...هما لو يبدأوا يفكروا بشكل مختلف و يعالجوا المشكلة من اصلها الموضوع حيختلف كتير

cenotaph
سر ايه بقى..هما خلوا فيهااسرار
ما هو كله على عينك يا تاجر

Tamer Nabil
مرسى جدااااااااااااا عالسؤال بجد و ان شاء الله حكتب حاجة جديدة بس هى زنقة الستات قصدى زنقة الامتحانات و المراجعات
ادعيلى بس

mohamed:
داخل على طمع انت يا محمد...اجى و اجيب شوكولاتة كمان
هههههههههه
بس انت تؤمر و بجد زيارتى اسعدتنى انا اكتر ما اسعدتك
تحياتى

samourai 4 ever said...

بلدك و لازم تتاعيشى معاها
الحمد لله انا هربت خلاص من الثانويه العامه و قرفها
و مساله تحدي المستقبل اللى يقرف بردوه

ربنا على الظلمه

و دمتــــــــــــــــم

dina said...

samourai 4 ever
حلوة مسألة تحدى للمستقبل اللى احنا عارفيين انه مقرف دى...اعتقد ان اى حاجة بعد الثانوية العمومية دى ولا المصورة العمومية الضاربة دى تهون
بس نقول ايه..بلدنا ولازم نستحملها
تحياتى

Esraa Hamed said...

مدونتك جميلة يا دينا بجد
و عجبني اوي اسلوب كتابتك
و تناولك للموضوع

ربنا يوفقك يا قمر
و الأمل فينا بقي احنا اللي نصلح عشان الجيل القديم ده خلاااااااااص .... ما علينا بقي عشان منغلطش في حد اكبر مننا عيب بردو خلينا احنا الأحسن هههههههه

مدونتك جميلة فعلا
تحياتي ليكي

إبـراهيم ... said...

الحدوتة ...مصـرية


تمام


**************
كنت عاوز أسألك شايفة المدونات إزاي، والتدوين وكده، وده عندي


تحياتي ج

dina said...

Esraa Hamed
يا رب يخليكى يا اسراء بجد كلك ذوق و انتى معاكى حق...الامل فينا احنا بس يا رب نقدر عالمسئولية دى
تحياتى

إبـراهيم ... معـايــا:
مرسى يا ابراهيم عالمرور الكريم و الموضوع حلو جدا اللى انت بتتكلم فيه بتاع التدوين دا و انا اكيد حرد عالموضوع دا قريب ان شاء الله
تحياتى

أحمد بكر said...

الموضوع ده عايز علاء الدين و المصباح السحرى مش على بابا
تحياتى

صوت من مصر said...

انتى واخده اجازه ولا ايه ايه الغيبه دى كلها

.:.-=- ELGaZaLy-=-.:. said...

فى دكتور قالى على حاجة غريبة جدااا قالى انت ممكن تقعد سنين بجزء فيك مكسور او ملحوم غلط بس لانك بتاخد مسكنات بتضيع الالم اللحظى...

هى دى مصر يا عبلة

arsenalwy said...

جميل يادينا يااهلاوية طريقة عرضك للموضوع

مستنى اقتراحك على البوست الجديد

mostafa rayan said...

عندك حق يا دينا
تحياتي لكي

- لو سمحتي شيلي تأكيد الكلمة لسهولة التعليق

Mkjwe said...

ثم ماتت رابعه

Tamer Nabil Moussa said...

عاملة اية فى الامتحانات

ربنا يكرمك فيها يارب

تحياتى

almasry said...

لا ده الخنقه المره دى زياده شويه


تحيــــاتى
المصـــــــــرى

Unknown said...

الغلطه مش غلطته
لان الجزء الاول من القصه اللي اسمها
علي بابا و ال70 مليون مواطن
كان بيوضح السبب الرئيسي للوضع دا
وتسلسل الاحداث المنطقي اللي ادى للجزء التاني الي انت اكلتني عنه
علي بابا وال 700 الف طالب
وهنا ادركت شهرزاد الصباح
وجه مسرور قبض على الشاب الغلبان
واشوفكم بعد ما مسرور يشوف شغله

FaceMoon said...

فينك يادينا بقالك كتير مش كتبتى لية
يارب تكونى بخير
وحشتينى كتير

dina said...

Baker
هههههههههه
تفتكر حيقدر يعمل حاجة معاهم؟

.:.-=- ELGaZaLy-=-.:.
الدكتور دا بجد كلامه زى الفل..و دى اكتر حاجة تأكد حاجات كتير غلط فى بلدنا

arsenalwy
الله يخليك يا اهلاوى و انا عارفة انى مقصرة و الله بس خلاص بقى ان شاء الله حتابع

mostafarayan
و الله ما حطيت حاجة يا باشا..انا براءة..بس ححاول اشوف الموضوع دا من عنيا حاضر

L0vElYGh0sT14
هههههههههه
الله يرحمها

Tamer Nabil
عاملة ايه بقى ... اكيد سامع عن المهازل اللى احنا عايشين فيها من اول الامتحانات
اقول ايه
حسبى الله و نعم الوكيل

almasry
دا هما على طول عيار الخنقة عندهم زيادة

دمعاتي
الله
تمام و الله العظيم..دا اللى بحاول اقوله..السلبية هى اللى بتكبر الغلط