Tuesday, June 3, 2008

اجازة عارضة

اعزائى البلوجارية...بما انك وصلت لحد هنا لوحدك و قلت اما اشوف البنت دينا عاملة ايه فى الدنيا فيبقى لازم اقولك شوية حاجات كدا:
اول حاجة انا طبعا بعتذر عالاجازة العارضة اللى انا اخدتها اذ فجأة كدا و دا طبعا بسبب الامتحانات و المراجعات و منها لله الثانوية العامية
تانى حاجة ان كلكم بجد وحشتونى جدا و نفسى اشوف ايه الجديد عند كل واحد و كل واحدة فيكم
تالت حاجة عاوزة اعتذر لكل اللى ردوا عليا فى الموضوع اللى فات و انا مردتش لسا عليهم بس معلش بقى انا عارفة انكم كلكم ذوق و كفاح و حتصبروا عليا
رابع حاجة عاوزة اشكر كل اللى سألوا عليا و انا مش موجودة
خامس حاجة بقى مطلوب منك ترفع ايدك حالا للسما و تدعيلى انجح و بمجموع من فضلك بصرف النظر ان كنت مسلم ولا مسيحى ولا يهودى ولا بوذى المهم اعدى السنة الغامقة دى..و بصرف النظر ان كنت مؤيد ولا معارض للحكومة دا لو كانوا المؤيدين لسا ما انقرضوش و لحقوهم و عملولهم محميات ..عشان هو دا احسن توقيت للوحدة الوطنية
سادس حاجة عاوزة اقولكم كلكم مبروك لمصر عشان الماتش اللى فات و عقبال ما نوصل كأس العالم و يتفك العمل اللى معمول لنا فى افريقيا فوق شجرة بانجو دا

و عاوزة اسأل سؤال يا جماعة مالوش اى علاقة بالكلام اللى عدا دا..لا مؤاخذة ليه الشعب المصرى بياكل لب و سودانى كتير مع انه اكتر شعب المفروض انه يكون معندوش وقت للتسالى
ما علينا

ادعولى بقى و ماتنسونيش لحد ما ارجعلكم باذن الله
و يا قاتل يا مخنوق

20 comments:

صاحب المضيفة said...

كان الله لك وسهل لك كل عسير


وفتح عليك نم فضله


ورزقك اكبر مجموع في الدنيا والاخرة



منتظرين مشاركاتك مرة أخرى

Mona Shereif said...

ربنا ينجحك يااااااااااارب يارب
على فكرة ابقى شوفى موضوع لعبة المذاكرة عندى هينفعك اووووووى ان شاء الله
والله بدعيلك من قلبى

صوت من مصر said...

ياستى بسرعه واحنا موافقين اوك
بالف سلامه

Unknown said...

لا ما تقلقيش أنا عن نفسى مقدرة ظروفك

ترجعلى لينا بالسلامة
و ربنا يوفقك و تجيبى المجموع الى بتحلمى بيه

أنا حر said...

ربنا يوفقك ويرزقك بالمجموع العالي
بس موضوع اللب والسوداني ده ده لأننا معندناش وقت نعملحاجة غير اننا نتسلى وده واضح على تقدمنا طبعا في كل حاجة
تحياتي

صوت من مصر said...

حد هنا يبعت يجيب جاتوه وبتوع النور اخيرا دينا كتبت بوست لولى لولى
حمد لله بالسلامه

۩۝۩ Dr. Flavio ۩۝۩ said...

ربنا يوفقك ويوفقني أنا كمان

بصراحه كده .. انتى فتحتي موضوع من غير ما تاخدي بالك تاعبني قوي

موضوع اللب والسوداني ده
بغض النظر عن ان الشعب معندوش وق للتسالي .. دي الأكاده .. ((ايه الأكاده دي.. مش مهم )) إنه معاهوش فلوس ياكل ويأكل عياله وتلاقيه في المواصلات عمال يأزأز لب ويقشر في سوداني .. وأنا طبعا قاعد جنبه هاتخنق وعاوز أقوم أقتله وأقفل المقله اللي اشترى منها اللب ده لأن واجع دماغي بصوت الأزأزه

هييييه .. ربنا يرحمنا ويهدي الجميع

تحياتي

Mohamed Hesham Safa said...

ربنا معاكي وان شاء الله تنجحي بالمجموع اللي تتمنيه ...

........................

يعني نقزقز لب مش عاجب ، نشرب سجاير تقوله مضرة بالصحة وغير حياتك ... طب نعمل ايه بس يا ناس ...

...........................

هستناكي بعد الامتحانات
بالتوفيق إن شاء الله

........

والسـ ختام ــلام

FaceMoon said...

ربنا ينجحك وحشتينا كتير مش تغيبى عنا تانى
وحمدلله على سلامتك
تحياتى

Unknown said...

السلام عليكم

اهلا دينا
اول زياره للمدونه المفتكسه دي
يارب تكون امتحاناتك عدت علي خير انا حالا هضيف مدونتك للفيفوريت

واتمني تنوريني

kmt said...

السلام عليكم و رحمة الله وبركاته
منور البلوج
وربنا ينجحك بمجموع اللي تتمنيه

ويخلصك من الهم دا
وللعلم ال ث/ع اسهل مرحلة في الحياة
الي اللقاء
تحياتي

Esraa Hamed said...

حمد الله علي سلامتك يا قمر

نورتي مدونتك الرقيقة

و يااااارب تنجحي و بمجموع و تكوني من الاوائل كمان

في انتظار جديدك يا جميلة

samourai 4 ever said...

ربنا معاكى يا رب
يا دينا
و تنجحى بمجموع عالى جدا جدا يا رب
و تاخدى على اد متعبتى و اكتر شويه
و فعلا انتى غيبتى علينا اوى
لدرجه القلق عليكى
قلت تكون البت اتكعبلت فى نمله ولا حاجه
بس اسألك سؤال
هى النمله عامله ايه دلوقتى

بجد ربنا معاكى يا رب

و ان شاء الله تنجحى بمجموع عالى

ربنا معاكى

و دمتـــــــــــــــــــــــم

قلوب بتغنى said...

بغض النظر على ان التعليم المصرى مهواش مقياس للنجاح فحياتك بس مقياس لفهلوتك وذكاءك الاجرامى علشان تهزمى واضع الامتحان بدعيلك من كل قلبى تنجحى

dina said...

صاحب المضيفة:
ربنا يخليك و ربنا يتقبل يا رب دعائك الجميل دا

sometimes:
طبعا ان شاء الله...فضيت خلاص و حشوف كل المواضيع

صوت من مصر:
بجد انا مش عارفة اقولك ايه عالسؤال المتكرر و الاهتمام..ربنا يخليك يا رب..يعدلك فى ثانوية ولادك بقى ولو انى اتمنى ان ربنا ما يكتبها على حد

عليا حليم:
واحشانى مدونتك و الله و ان شاء الله حتابعكم بقى تانى

انا حر:
غريبة جداااا ان يكون الوقت اللى عندنا كله كمان رايح فى التسلية ..حقول ايه..عجبى على رأى عمنا صلاح جاهين الله يرحمه

محمود فرج احمد:
لا دا كدا انت كمان فتحت موضوع و انت مش واخد بالك...موضوع ترتيب الاولويات فى مصر..ممكن تلاقى فعلا حد مش لاقى ياكل و مع ذلك عنده اهتمام بحاجات غريبة و مضيع عليها كل اللى حيلته كمان..لازم نتكلم فى الموضوع دا ان شاء الله

mohamed hesham
هو مفيش وسط..يا نطخه يا نكسر مخه..يا نبوظ صحتنا يا نبوظ حياتنا...الوسط حلو بردو...شوية شغل مع حبة تدليع لنفسك من غير ما نضرها بردو..دى السجاير دى بهدلة يا راجل

facemoon:
البنت اللى غير كل البنات بجد وحشانى مدونتك مووووووووووووووووت


bar2ash
و انا بردو بقول المدونة منورة ليه..اهم حاجة متكونش اخر زيارة..و منورنى و الله

kemet
الله يبشرك بالخير..بس للعلم بردو..طلبة الثانوية نحسوا من كل مراحل الحياة بعد اللى شافوه فى السنة الكبيسة دى

Esraa Hamed
الرقة المعتادة اللى منورانا ..دايما مرورك مميز

samourai 4 ever
ههههههههه
النملة بخير الحمد لله و فى انتظار النتيجة

قلوب بتغنى
بجد بجد هو دا المفيد...طبعا انا معاكى انه مش مقياس ابدا و دا كمان بعد اللى اتأكد السنة دى و الموضوع دا لازم حنتكلم فيه عشان انا ساكتة و الله و شايلة و معبية من اللى بيحصل فى التعليم..باختصار تعليم عايز يتفجر

Unknown said...
This comment has been removed by the author.
Unknown said...

بسم الله ما شاء الله

روحك المرحه مخلياني مبتسم طول منا بقرأ البوست

بجد ربنا يباركلك

انتي شخصيه جميله وان شاء الله ربنا هيوفقك

وانا فعلا رفعت ايدي للسما ودعيتلك ربنا يوفقك


مقدرتش معلقش تاني بجد عاجباني اوي
تحياتي

dina said...

bar2ash
يا رب يخليك..و الله العظيم اخجلتم تواضعنا...و بجد مرسى جدااااااااا عالكلام دا و المرور التانى الكريم اللى طبعا منورنى و مشرفنى و عاوزاك تدعيلى بقى على طول و تزورنا هنا كتير بردو
بجد الف شكررررررررررررررررررر
تحياتى

۩۝۩ Dr. Flavio ۩۝۩ said...

على فكره .. أنا عديت من عندك أول امبارح ومكنتيش رديتي لسه.. وملقيتش موضوعات جديده.. بتفكريني بمدونتي اللي شكلي هاقفلها وأفتح مقلة لب أحسن
ههههههههههههههههههههههه

عندك حق في موضوع الأولويات .. الشعب المصري اتعود على انه مش يحدد أولوياته وبيسيبها زي ما تييجي

وييجي آخر الشهر يستلف ويبقى مديون .. وأهه الحياه ماشيه

أستغرب قوي على اللي يصرف فلوسه ع القهوه ..أو حتى اللي يقطع من قوت عياله عشان يجيب سجاير يحرقها

هانتظر موضوع الاولويات ده انك تتكلمي فيه

دعواتك

dina said...

مـحـمـود فـرج أحمد
هههههههههههه
لب ايه بس..لما انت تفتح مقلى لب امال انا اعمل ايه بس..دا انا بقالى قرون مش بدخل
هههههههههه
اول حاجة انا عاوزة اشكرك عالاهتمام و المرور المتكرر رغم ان تقريبا مفيش حاجة جديدة
بس متقلقش..مخ البلوجارية ما يخلاش و انا اساسا فى حاجات كتير جدااااااااا حموت و اتكلم فيها بس بربط الافكار
...بس و الله انت معاك حق جدااااااااااا
موضوع الاولويات دا جابلى شلل تساعى اساسا فى مصر..و زى ما انت قلت بيبقى مش لاقى ياكل و بيجيب سجاير و بيبقى بيقطع من قوت عياله و من فلوس التعليم او العلاج عشان يضيعها فى حاجات تانية غريبة جدا...مش عارفة ازاى

عايزيين نتكلم فعلا فى الموضوع دا و انت كمان لازم تقولنا رأيك فيه و تتكلم عنه علشان نتعلم
تحياتى