Thursday, June 26, 2008

من الاعدادية لعش الزوجية


اعزائى البلوجارية...استكمالا لمسلسل سلبيات مصرية ننتقل للحديث عن ظاهرة جديدة
انا فى الصف الثالث الثانوى..او تقريبا خلصته يعنى...يعنى انا لحد دلوقتى انا و زميلاتى الكريمات معانا اعدادية..مش عيب و البنى ادم بيكبر بردو و بكرا ناخد الثانوية العامية...لفت نظرى ظاهرة غريبة جدا بدأت تظهر بشكل كبير..نص الدفعة..او حتى نسير فى طريق المصداقية الذى تعودت عليه من البلوجارية الاحباء..جزء كبير من الدفعة بين المخطوبة و اللى مكتوب كتابها و اللى مقرى فاتحتها و اللى متكلم عليها و اللى محجوزة...فتسمع هذه الكلمات بكثرة اثناء تجولك فى المدرسة..و تشاهد فى ايادى البنات اليمين شتى انواع المعادن من الذهب و الفضة..الحمد لله انها موصلتش للشمال لسا
اما عن رأيى فى هذه الظاهرة انى حقا اشفق على هذه البنات....بطبيعتنا الانسانية نمر بعدة مراحل و تختلف احتياجاتنا من مرحلة الى اخرى...ففى الطفولة كان اكثر ما تمناه المرء ان يلهو و يستكشف ما حوله فى جو من الامان و ارتبط بأهله لانهم كفلوا له هذا الشعور بالاطمئنان ....ثم مرحلة المراهقة و التى تمر بيها عرائس الغفلة..و من متطلبات هذه المرحلة عند البنات ان تشعر بأنوثتها و بأنها مرغوبة و عند الطرف الاخر الشعور بأنه راجل و قادر على تحمل المسئولية..و بتطبيق ذلك على الثنائيات السابق ذكرها نجد ان البنت وجدته مناسب لانه طرق بابها و اشعرها انها مرغوب فيها دون سائر البنات..و شعر هو باحساس الرجل المتكامل عند طرقه هذا الباب...اشفق عليهما من المرحلة القادمة..مرحلة الاستقرار و ما بعد المراهقة حيث تفكر البنت فى سندها..فى نصفها الثانى الذى ستلقب باسمه و سيكون ابا لاولادها و معاونا لها فى هذه الحياة و هو يبحث عن المرأة المحترمة التى تعينه على متاعب الحياة و تصونه فى بيته و عرضه.....و قد يجد كلا منهما انه اخطأ الاختيار..ليس بسبب سوء الطرف الاخر..و لكن بسبب اختلاف احتياجاته و تطور تفكيره
و لكنى افكر دايما..لما تبقى فرص الزواج بسم الله ما شاء الله واخدة حقها كدا اوى و احنا لسا فى ثانوى..امال العنوسة جاية منيين..اكنش انا اللى عاملة المشكلة دى
دعونى اخذكم قليلا الى زاوية اخرى من نفس المنظور ...فى المدرسة...لدينا الكثير من المعلمات اللاتى يعانيين من العنوسة..لم اتخيل شعورهن عندما تأتى لها طالبة عندها لتريها البوم صور الخطوبة...لا اقصد النفسنة و الغيرة..لكنى اجده غريبا ان يتقدم شاب فى اوائل الثلاثينات او اكبر من ذلك بقليل الى بنوتة لم تكمل العقد الثانى من عمرها فى حين ان هناك من يمكن ان تناسبه اكثر عقليا و فكريا......فأشعر ببعض التناقض فى ذلك
فلنوسع منظورنا و نخرج من مدرستى الضيقة الى المجتمع و وسائل الاعلام التى لا تكل من الحديث عن العنوسة..تلك المشكلة التى تتفاقم تدريجيا
فكنت قد قرأت اخيرا مقال فى بريد الاهرام من عدد من الفتيات و الفتية يعانيين من هذه المشكلة..من المؤكد انه ليس فى هذه الدنيا اجمل من ان تجد نصفك الثانى و تشاركه حياته مثلما شاركته احاسيسه و عواطفه..و قد لا تجده ..وقد تحيا على امل ايجاده..و قد تعيش بحسه ليقينك انه موجود..و قد يبعدك الواقع كثيرا عن ذلك....فتسلم بالقدر..ان كل ما اطلبه هو فرصة من المجتمع و الناس لتقبل فكرة العنوسة عند الرجال و الاناث و التسليم بالقدر..فالعانس ليس بالوباء..وليست بخطافة الرجالة..ولا تستحق هذه الطبقة نظرة الشفقة او الرهبة فى اعيننا...رفقا بهم ايها المجتمع

و بين الاعدادية و الخطوبة و العنوسة فى مدرسة البنات الثانوية كانت معكم مراسلتكم متيحة حاتم..عفوا دينا محمد فى الحلقة ال125457879 للسنة ال2008 على التوازى و بنجاح ساحق مسلسل متناقضات مصرية..حصريا فى مصر
و سنوافيكم بالجديد
تحياتى

55 comments:

۩۝۩ Dr. Flavio ۩۝۩ said...

أولا مبروك انك خلصتي امتحانات

ثانيا

انتي فاكره لما تنجحي في الثانويه وتدخلي الكليه .. هيبقى معاكي ثانويه؟؟
ههههههههههههههههه

الثانويه ليست مؤهل
يعني أنا عندك أهه .. طالب في خامسه طب ومؤهلى الاعداديه.. لول


نييجي لخطوبه والكلام ده .. ده على فكره مش في كل المجتمعات
يعني حسب التكوين العقلي للمجتمع بيكون سن الزواج
يعني القريه مثلا ممكن نلاقي فيها الكلام ده وبعض المدن الصغيره ... لكن انا مشفش حد في مدينه كبيره زي المحله مثلا اتخطب وهو في الاعداديه .. لأنه مهما كان مستوي الناس العقلي لسه مش عالي فمستوي المجتمع نفسه والبيئه بترفض ده

انا اسمع صحيح ان عندنا في البلد بنات بيتجوزوا وهما 16 و18 سنه ويعني البت من دول تاخد الاعداديه ومن بعدها الدبلون .. وتتنيل تتجوز

ده مش بيحصل في المدن .. على العكس نسبة العنوسه عاليه قوي .. لدرجة ان فيه دكاتره كبار عندنا ومعنسين .. بس يتخاف منهم والله لأنهم الي حد ما ..اتعقدوا

بالتوفيق في النتيجه ان شاء الله وبعدها تدخلى الجامعه وتكون كلية حلوه كده .. ابعدي عن الطب .. لمصلحتك

عقبالك

Unknown said...

مدونه جميله اوى بجد ...ومبروووووووووك انك خلصتى مش امتحانات خلصتى انتحارات ههههههههه وبالنسبه للموضوع بتاع حضرتك موضوع جميل تصدقى وانا ف 6 ابتدائى يدوووب طلعت اولى اعدادى لقيت نص الفصل بتاع ابتدائيه من البنات اتخطبو اقصد اتخبطو قلت والله دنيا ودلوقتى وانا ف 3 اعدادى اسمع عن بنات فعلا اتجوزو اما الصبيان اللى هما زى حلتنا كمان 30 سنه ان شاء الله يتجوزو عقبال لما يخلصو تعليم ويدخلو الكليه اللى عاوزينها وبعدين نشتغل وبعد ونجيب فلووووووووووس عشان بالفلوس نشترى الشقه والعفش و العروسه كمان؟؟ اما البنات فهما يدوووب ا من اول م البت تطلع من بطن امها تلاقيها امها بتشاورها وتكون لسه مكملتش سنه وتلاقى عندها طقمه مطبخ وفوط وهدوم والله الدنيا خربانه خربانه.....
على فكره اسم مدونتك جامد موووووووت بجد...
حاجه تانيه انا بجد حسيت ان الدنيا لسه فيها خيير لما فتحت البروفيل بتاعك ولاقيتك كاتبه دا بعدك لو عرفت حاجه عنى .... تقبلى مرورى
عمر"المبرمج المحترف"

Unknown said...

حاجه تانيه بس ممكن اعرف حكايه القلوب دى ازااااى لو سمحت اصل انا ببرمج بالجافا بس ممكن اعرف الكود لو سمحت

w da my e-mail 3shan tb3ty el code 3leeeeh 3la fekra ana so3'ayar awe
y3neeee yadoob 14 sana bs enty isA naya 3la kolyt aih
my e-mail is : O.SpiderHack 3la el yahoo w el hotmail kman



w bs 3awez aolk ya reet tshely el
Word Verification ely t7t da 3shan ely ykteb comment myzh2shy lw enty mesh 3arfa ezay bytshal 2olely wana 72olk isA :D b-(

samourai 4 ever said...

الحمد لله انك خلصتى امتحانات على خير
و بكرة تجيبى مجموع كبييييييييييير
و تدخلى بيه الكليه اللى انتى عايزاها ان شاء الله
على فكرة
كان فى واحده معايا فى الثانوى
مخطوبه
انا كنت فى مدرسه زيزنينا
كان اول سنه يعملوا فيها ثانوى عام
و كان عندنا واحده بس فى الثانوى مخطوبه
كان لما خاطبها يجى ياخدها
كنا كلنا نقف فى الكوريدور
نتفرج عليهم
و هما ماشيين
عايزة اقولك البنت دى دلوقتى خلفت
و اطلقت
و غالبا رجعوا لبعض تانى
بس حياته كانت متلخبطه كتير كتير

يا ريت البنات ميتسرعوش
و يعيشوا حياتهم
ميخلوش حد يجى يسرق منهم حياتهم

موضوع جامد بجد

ربنا يوفقك

و دمتــــــــــــــــــــــــم

سمر الشافعى said...

اه ياعفارييييييت وانا اللى بقول العرسان اختفو فين الايامدى اتاريهم نقلو العطا على بنات اعدادى ههههههههه

بعيدا عن البوست ماشاء الله اسلوبك فالكتابه اكبر بكتير من سنك كمان تفكيرك عاجبنى

تحياتى ليكى

صوت من مصر said...

جميله ايام الامتحانات صح
يارب بالنجاح وعقبال الايد الشمال اليمين مش بتفرق الفرق فى الداخل مش فى المظهر

Unknown said...

ازيك يادينا
مبروك على انتهاء الاشغال الشاقه
فيه في مصر متناقضات كتير
انت اشرتي لاحداهن

في الوقت اللي فيه عنوسه وازمة زواج نسبه كبيره من زمايلك ارتبطوا قبل الاوان
--
في الوقت اللي فيه الحديد بقه غالي نار انا شفت بعيني مساحة ارض جنبنا خلال شهور قليله كانت كلها اتبنت عمارات وبيوت
--
في الوقت اللي مصريين كتير فقدوا ارواحهم وهما بيشتروا رغيف العيش مصريين غيرهم بينفقوا الالف على تفاهات
--
في الوقت اللي مصر بتاعني فيه من ازمات وسمعتها على مستوى الجيران ان شعبها جعان ومش لاقي ياكل .. فيه مليارات من الموازنه مفقوده ومليارات اتهربت بره البلد ومليارات بتتسرق ومليارات مكاسب بيع ارض لفلان ومليارات مكسب بيع مصنع لعلان
--
في الوقت اللي اساسي مرتب المدرس الجديد 120 جنيه فيه وظائف في مصر اول مرتبها الاف مؤلفه ولا يشترط سابق الخبره يكفي تحليل جينات تؤكد انتامئك لدماء وزاريه

--
في الوقت اللي الشباب بيحالوا يسافرو تهريب ويغرقوا ويموةتوا ويتقبض عليهم ويبتهدلوا الا ان تلاقيهم لسه بيغنوا ان اللي بيشرب من النيل بيرجع ليه تاني

---
وغيرها وغيرها

وبمناسبه التناقضات شوفيلي عروسه بقه من العرايس الكتير اللي شيفاهم دول.. جت عليه انا مش هاجوز يعني

dina said...

محمود فرج احمد:
دكتور محمود منورنى...حقولك على حاجة..انا عايشة فى اسكندرية و المفروض انها مدينة كبيرة بعد القاهرة على طول و انت معاك حق ان ثقافة المجتمع بتأثر بشكل كبير فى سن الجواز..انما دلوقتى حاسة الموضوع اختلف اوى..اننا نبقى فى بلد زى اسكندرية و فى نفس الوقت الجواز المبكر بدأ يظهر تانى..اه طبعا هما مش اغلبية بس بدأ يبقى موجود تانى و مش عارفة سببه
بس كدا يا دكتور..و عاوزاك تطمن انا علمى رياضة بعيدة عن الطب تمامااااااا و الحمد لله
تحياتى

المبرمج المحترف:
اول زيارة و مشرفنى .. انا اصلا اتبسطت جدا لما عرفت انك 14 سنة و عندك مدونة .. لسا مشفتهاش بس اكيد حتكون مميزة و دا باين من اسلوب الكلام

انت اتكلمت فى نقطة مهمة اوى...موضوع ان البنات ممكن فعلا تتجوز و هى صغيرة بتاع 18 او 16 سنة فى حين ان الولاد لازم تستنى لحد ما تكون نفسها و افتكره على سن 30 كدا يدينا و يديك طولة العمر..بس بردو عندك بنات مابتتجوزش خالص و نسبتهم كتيرة جدا

انا شلت الword verification>>
و عاوزة اقولك تركز فى البرمجة اوى عشان انا كمان و انا اصغر من كدا اخدت كورسات كتير فى لغات برمجة و دا بيفيد جدا بعد كدا و كود القلوب حبعتهولك حاضر

dina said...

samourai 4 ever
هههههه
هى ممكن تكون فعلا النسبة قليلة و مش كتير بنات اللى بتتخطب بدرى كدا بس اللى انا مستغرباه ان لفترة طويلة كانت للظاهرة دى مش موجودة بعدين ظهرت تانى مش عارفة ليه

دعواتك بقى عشان النتيجة و تحياتى

سمر الشافعى
هههههههههههههه
شفتى بقى...بنقطع على بعض
كلامك عسول جدا و بجد ربنا يخليكى على الذوق و عالمرور المميز
تحياتى

صوت من مصر
مش حقول غير حسبى الله و نعم الوكيل..مرة تقولى ادخلى معهد و مرة معجب اوى بأيام الامتحانات..هى جميلة و بس دى زى القمر..و احنا مش اى امتحانات ..امتحانات الثانوية العامية اكيد سمعت عن المهازل طبعا


دمعاتي
الله دا رد يتعمل بوست لوحده اصلا..و الله معاك حق فى كل كلمة قلتها و غير كدا كتير كمان
بس فى موضوع العروسة دا مقدرش اخدمك..يعنى انا بقول صغيرين و لسا بدرى عليهم تقوم تقولى يلا هاتيلى عروسة
هههههههههههههههه
شكرا عالمرور
تحياتى

arsenalwy said...

دينا الأهلاويه

فينك من زمان؟؟؟؟

كلامك صح والله من فترة قعدت أتكلم مع أمى فى الموضوع ده أن البنات دلوقتى بقت مستعجله أوى ومبقولوش لأ على أول واحد يخبط على الباب

ودة غالبا بينتهى بنهاية مش لذيذة كلامك جميل يادينا

وقوليلى هنكسب الزمالك كام الماتش الجاى؟؟؟؟ 3 كفاية

Mkjwe said...

مدونتك جميلة جدا صراحتن وألف مبروك على أنتهائك للأمتحانات ويارب يوفقك ويوفقنا جميعاً ونجيب مجموع كبير ونفرح ... وبالنسبة للعنوسة والله أنا مش عارف أقول اية بس ربنا كاتب لكل واحد نصيبه لو له نصيب يتجوز هيتجوز لو مالوش نصيب مالوش نصيب ولو له نصيب وهو يتجوز وهو عنده عشرين ممكن ميكنش عشرين ممكن يكون تلاتين وكمان مالها البنت لما تكون كبيرة بالسن مش قصدي كبيرة بالسن يعني بالخمسين ولا كدة لا ممكن تلاتين اتنين وتلاتين تلاتة وتلاتين حلو اوي اوي اوي دنا نفسي الاقي واحدة بالسن دة ... أصل أنا ناوي أتجوز واحدة أكبر مني ... لؤؤل
مدونتك جميلة وأتمنى لكي التوفيق في حياتك ودراستك إن شاء الله وخلينا نشوفك

blue-wave said...

اولا 17 سنه مش صغيرين وكمان طالما انها لقت الشخص اللى حاسه انه مناسب ليها ايه المشكله انها ماتضيعش وقت اكبر من عمرها وهيا مش معاة؟
مش احسن يخلوها رسمى بدل قصص الحب الفاشله اللى من ورا الناس؟

صوت من مصر said...

حسبى الله ونعم الوكيل ليييييييييييييييييييييه ؟

spower said...

الفففففففففففففففففففففف
مبروووووووووووووووووووووك

وعريس في ليد خير من عشرة علي الشجر

تحياتي
واتمني تزوري مدونتي
myfreedom-spower.blogspot.com

dina said...

كاتب مصري
مرسى عالدعوة الرقيقة و انا حلبيها قريب ان شاء الله

arsenalwy
معاك حق و الله و عجبنى اوى فكرة بتكلم مع امى فى ظاهرة فى الدنيا..ربنا يخليهالك..و نحس متعب اتفك الحمد لله هو يجيبله جونين تلاتة بس على اساس ان القناعة كنز لا يفنى و يكون ابو تريكة بقى ربنا شفاه يجيبله اتنيين بردو و واحد امير يجيبه
ههههههههه
ان شاء الله نكسب و نلعب كويس

L0vElYGh0sT14
انا مقتنعة جدا بكلامك و فى بنات كتير مش متجوزة بتكون راضية و قنوعة و قادرة تعيش عادى انما المشكلة ان المجتمع مش بيرحمهم زى ما انا قلت و بيبصولها على انها خطر على الرجالة المتجوزيين و ما ينفعش تختلط فى الحياة الاجتماعية لانها اكيد معقدة علشان ما اتجوزتش لسا و خد مندا كتير
بجد يرحموهم شوية لان دا نصيب

dina said...

blue-wave
لا هو الكلام على الخطوبة و الارتباط المبكر مش قصص الحب الفاشلة..و احنا متفقين ان الجواز معتمد على انك تلاقى الحد المناسب بقى انما هل ممكن و سنها صغير اوى كدا و فى مرحلة كلها اضطرابات انها تقدر تختار صح و على فكرة انا فى اغلب الحالات اللى شفتها مش بيكون فى حب ولا حاجة علشان البنت تفكر انها ماتضيعش عمرها من غيره و كدا انما السيناريو انه بيخبط باب بيتها بتوافق و بتقتنع انها بتحبه لانه اداها احساس انها البنت اللى مرغوب فيها و دى طبيعة السن دا و اكيد اى حد بيمر بيه بيتقلب على مليون حال فازاى يقدر ياخد قرار مصيرى فى وقت زى دا بالظبط زى فكرة الثانوية العامة المطلوب ان الطالب اللى اصلا فى مرحلة مش ثابتة مطلوب منه انه يثبت بقى عشان نوينا نحدد مستقبلك..اه بيكون فى طبعا ادراك و فهم فى المرحلة دى و دا المطلوب انما القضية قضية التغير و تغيير الدماغ و التفكير و الميول طول الوقت

تحياتى

dina said...

صوت من مصر:
هو انا اقدر بردو..بس انت اللى كل ما تدخل تقولى معهد مرة و مرة تقول على ايام الامتحانات حلوة و انا اساسا و الله شايلة منها و معبية و ساكتة
هههههههه
لازم نتكلم فى موضوع الامتحانات دا قريب ان شاء الله
منور و الله العظيم



spower
اول مرور ليك عالمدونة..منورنى و ان شاء الله ازور مدونتك قريب اوى
تحياتى

عروس البحر said...

كويس انك خلصتي الامتحانات المقرفة
المدونة جميلة جدا و تدوينك اجمل يا دينا
بالنسبةلموضوع الجواز البدري بيسبب مشاكل كتيرة

عروس البحر said...

نسيت كلمتي
تحياتي

""""" said...

اولا هو كل واحد بياخد نصيبه
بس عايزه اقولك حاجه يا دينا
انا ايام ثانوى بالنسبالى يعنى من حوالى ست سنين كان معايا بنات كتييييييييييير مخطوبين
دلوقتى بعد ما دخلنا الجامعه وخلصنا وقابلتهم لاقيتهم لا مخطوبين ولا غيره

غالبا ودا بيرجع للنصيب برضه
الشاب بيحب يرتبط ببنت صغيره فى السن
لمعتقدات كتير عنده
اغلبها مش غلط ف نظرى

يعنى فرق السن من سنتين ولغاية عشر سنين جميل جدا بين الشاب والبنت

دا غير ان فى فكره معينه على البنت اللى تكبر فى السن من غير ما تتخطب

انها معقده مثلا ونفسيا غير سويه
هى دى فكره غلط لكن مضحكش عليكى فيها جانب من الصواب

لان غالبا البنت نفسيتها بتتعب فعلا لما تشوف بنات اصغر منها اتخطبو واتجوزا ومعاهم ولاد كمان
فشئ طبيعى تزعل على نفسها
محدش مش بيتمنى يحب ويتحب ويكون اسره ويكون له بيت

فهى المساله متعلقه بالنفسيات
فى نفسيات قويه اه بتزعل لكن مش بياثر على حياتها بشكل عام
وفى بنات فعلا بتتاثر جامد وبياثر فى حياتها

بس اللى بيحصل ان فى حالات كتير بتكون البنت غير مؤهله للارتباط وتحمل المسئوليه
فى بنات حتى وان بلغت سن النضج بتكون لسه مش مستوعبه معنى الارتباط واللى بيحصل ان الموضوع ميتمش

نص البنات المخطوبات ايام ثانوى دلوقتى مش متجوزين ولا مرتبطين اساسا

دى كانت مرحله وعدت بالنسبالهم
مجرد تجربه واخدوا منها خبره معينه

لكن دا ميمنعش ان فى بنات بتتجوز فى سن صغير نسبيا والجواز بيكون ناجح جدا

وبصراحه لو عايزه رايى انا أؤيد بشده الزواج المبكر

من سن 19 سنه
مش اقل من كدا بصراحه

انما فوق 25 مش هقولك وحش
لكن نفسيا بيكون فى قلق

البنت خايفه يفوتها القطر ومتلحقش تتجوز وتخلف وهى لسه صغيره

فى شباب فعلا لما بيدور على عروسه عايزها صغيره من 20 ل 25 غالبا

محدش بيفكر فى بنت عدت ال 30 مثلا
وكل واحد عنده اسبابه واغلبها مش وحش فى رايى برضه

انما اللى عايزه اقولهولك ان مش شرط كل البنات اللى لابسه معادن فى ايدها اليمين والا الشمال من مدرستك والا غيره انهم بالضروره خلاص اتجوزوا

اغلبها بيتفشكل لاسباب مختلفه
وكل واحد بياخد نصيبه برضه

بس بالذات كم الارتباطات بيكون زياده فعلا لبنات المدراس فى المرحله الثانوى تحديدا انما اغلبها مبيتمش

وعموما
انا شايفه ان الاهل مش غلط ممكن شايفينها فرصه وعريس كويس لبنتهم

وفى ظل مشاكل العنوسه اللى بتزيد يوم عن التانى بيقلقوا يرفضوا متجيش فرصه تانيه والبنت تعنس

فللى بيجيلوا فرصه بيحاول يستغلها

وللاسف غالبا مش بتكون فرصه والاهل بيضيعوا بنتهم بتسرعهم دا

ودا سبب من اسباب تزايد مشكلات الطلاق برضه

أنا حر said...

مبروك على الانتهاء من الامتحانات
المشكلة اللي انت بتتكلمي فيها دي بنعاني منها دلوقتي لأن تاثيرها بدأ يظهر في نسب الطلاق المنتشرة واولاد الشوارع والسلوكيات او قلة التربية الموجودة في مجتمعنا واللي فرضت نفسها بشكل كبير
البنات بتفرح باي عريس والولد بيدور على البنت اللي يربيها على ايده وده معناه فرق كبير جدا في السن بين الولد والبنت وفي نفس الوقت عنوسة مخيفة للأهالي من الناحية الاجتماعية
الحل الوحيد من وجهة نظري ان اعلامنا يغير فكرة المجتمع عن الجواز من الناحية الاجتماعية لأن ده اساس المشكلة اننا مش عارفين معنى الجواز
تحياتي

سارة said...

قليل الخطوبة اما تكون بدري

بس من رأي كل ما البنت سنها كبر يكون أحسن لأن مخها بيكبر و فتى أحلامها بيتغير و بتكون أكثر دراية وواقعية بالحياة



و عن تجربة

kmt said...

السلام عليكم ورحمة الله وبركاته

اولا ربنا ويوفقك في التربيه القومية والمستوي التخين وتخلصي من الهم دا والواحد يعرف هو رايح علي فين

اما بالنسبة للمقال
بجد انت فوق سنك
اذا استمريتي في المجال دا بمشيئة الله تكوني صحفية كبييييييييييييرة اد كده

مقالك مش محتاج اكثر من انه مقال جامد يعني موز موز موز

تحياتي
الي اللقاء

Unknown said...

da my e-mail o.spiderhack 3la el yahoo w el hotmail ya reet tb3tely 3leeeh el code bta3 el hearts 3shan 3awzo darory aw tsbely comment 3la el blog bta3ty fih el code....
please

OMAR

spower said...

السلام عليكم

ارجو قراءة البوست الجديد للاهمية

تحياتي

Mohamed Hesham Safa said...

أحييكي على البوست الجميل ...

تتضافر العديد من العوامل لخلق الكثير من التناقضات في مجتمعنا المصري ... ولست بصدد ذكرها الآن ...

أنا لا أعارض الارتباط المبكر إذا كان مبني على أساس جيد ... يعني مش كده وخلاص ...

لكن يعجبني أكثر الارتباط بعد ذلك يعني يكون حصل بعض النضج في التفكير ...

أما بالنسبة للشباب اللي سنهم كبير وبيرتبطوا ببنات صغيرة فده له أسبابه وهي كتير ،
أولا يقولك لما البنت كون صغيرة ميكونش ليها تجارب قبل كده (!!!)

ثانيا يقولك أشكلها على مزاجي ومتتعبنيش وتسمع الكلام .

ثالثا يقولك البنت بتكبر قبل الراجل عشان كده يستحسن وجود فرق في السن .

رابعا عشان تكون عادة أقل منه في المستوى العلمي .

......................

ومعظم الناس بيبقوا خايفيين على بناتهم وعايزيين يجوزوهم وبتطمنوا عليهم (ومعهم الحق في ذلك) ، لأن الحياة لم تعد كما كانت ...

القليل من أصحاب الحظ السعيد هم من يصادفون الحب الحقيقي الذي يؤدي الى زواج قوي وسعيد ...

كل اللي بيتجوزوا (أو معظمهم) بيكملو لكن فيه اللي بيكمل وهو سعيد ومبسوط وعنده رغبة في الاستمرار ...

وفيه اللي بيكمل عشان لازم يكمل وأهه عايش وخلاص .


انا عارف ان ردي مشمرتب بالمرة لكن معلش ليا عودة ان شاء الله ...

(ملحوظة : اغنية زيزينيا جميلة جدا ... )


..........................

والسـ ختام ــلام

shirry said...

اولا مبروك انك خلصتي ثانوي
وان شاء الله تدخلي كلية كويسة
انا عارفة ان الامتحانات كانت زفت
بس ربنا يوفقك

علي فكرة انا احب البنات اللي دماغها حلوة كدة وبتبص للحاجة بشكل موضوعي اكبر من المعتاد

والله انتي عارفة
انا يعتبر مفيش واحدة من زمايلي او صحباتي الا مرتبطة يا ما رسميا او عاطفيا

بس بحس ان الموضوع لسة شوية عليه علي الاقل تعبش حياتها ومتبقاش مربتبطة ولا شايلة مسؤلية حد غيرها
ولا خايفة تعمل حاجة ومتعجبش

وزي ما انتي قولتي الحياة مراحل

تحياتي لكي علي دماغك العالية
وبعدين لسة الحياة

dina said...

عروس البحر
منورانى بمرورك الاول و تقبلى تحياتى

amal
فيه ايه بقى زيادة عالكلام الجميل دا كله..معاكى حق و الله
تحياتى

أنا حر
و الله حل جميل جدا بجد و دا لان تأثير الاعلام كبير جدا عالناس و المفروض انه هو المسئول انه يبنى التفكير الصح
تحياتى


سارة
فعلا يا سارة كل ما السن كبر كل ما بقى فى نضج اكبر و التفكير بيتغير
تحياتى


kemet
و الله العظيم انتى اللى كلك ذوق بجد و الله و دايما كدا رافعة معنوياتى
بجد مرسى جدا عالمرور المميز دا
تحياتى يا جميلة

dina said...

المبرمج المحترف
انا بعتلك الكود على الماسنجر على الياهو حيجيلك offline message
تحياتى


spower
حاضر من عنيا الاتنيين

mohamed hesham
و الله منور المدونة بالمرور المميز دا...و الاغنية انا مبسوطة اوى انها عاجباك هى و البوست
و انت فعلا عندك حق فى كل الاسباب اللى قلتها بس مش عارفة انت متفق معايا ان تفكير الولاد بالشكل دا سطحى و انانى منهم...يعنى ازاى واحد يبقى عاوز يرتبط بواحدة لمجرد انها مستواها العلمى اقل او لمجرد انه يسيطر عليها..انا شايفة ان دا ضعف شخصية منه و عدم ثقة فى نفسه...بس بردو فى اسباب انت معاك حق فيها....بس بردو لو استنوا شوية يكون كمان بقى فى قدر من النضج الفكرى زى ما انت قلت دا حيضمن الحياة بعد كدا الى حد ما
تحياتى

shirry
منورة البلوج يا شيرى..و دعواتك بقى عشان النتيجة
على فكرة انا بردو عندى نفس الوضع..اعرف ناس كتير جدا مرتبطين..و الارتباط الرسمى احنا اتكلمنا عنه..انما الغير رسمى دا اللى هو ازاى...اصل كلمة مرتبطة دى يعنى مسئولية زى ما انتى قلتى يعنى بتحب حد و بتحترمه فى وجوده و فى غيابه و حاجات من دى كتير و انا مش ضد دا لو فى شكل صح يعنى مش صحوبيات بقى ولا من ورا الاهل انما لو فعلا هما متفقين على كدا من غير تجاوزات او من غير ما يعملوا حاجة غلط يبقى دا كويس

و النقطة اللى انتى اتكلمتى فيها بردو حلوة اوى...فكرة المسئولية..تخيلى انتى لما تبقى بنوتة 19 ولا 20 سنة و خلاص حتشيل مسئولية بيت و زوج و احتمال اولاد
صعبة

تحياتى يا شيرى

NilE_QueeN said...

ياااااااه
جيتي على الجرح يا دينا

فعلا الظاهره دى بتضايقني

ايه رئيك بقي ان وانا ف تانيه اعدادى زميالاتى كانوا بيقولوا ان فى بنت حامل ف فصلهم

وف الثانوي قابلت كتير مخطوبين
و واحده صحبتي والدتها بتشتغل ف مدرسه اعدادى بتقول دخلت فصل واحد لقت فيه 6 بنات مخطوبين

من واقع الحياه حوالى 30 ف الميه من الجوازات دي مش بتستمر والباقي بيستمر لان الواضح اننا بتجوز من غير معايير حقيقيه
هو عايز بنت جميله وهي عايزه واحد غني
وف الاخر كلوا نصيب

ومش شرط اللى بياخدوا دبلوم بيتجوزوا بعده عالطول وخلاص
انا كان ليا زميلات ف الاعدادى ومدخلوش ثانوي عام بقابلهم ساعات واحده منهم تقولى دي اتخطبت والتانيه دخلتها ف الاجازه
وفى منهم الفكره مرفوضه عندهم لحد ما يدخلوا الجامعه

dina said...

NilE_QueeN
فعلا معاكى حق ان اغلب الجوازات دى مش بتستمر و اللى بيستمر بيبقى من مبدأ جوازة و السلام لانها من الاول مش معتمدة على حب حقيقى ولا معايير حقيقية زى ما انتى ما قلتى
تحياتى

Mkjwe said...

أقتباس بدون تصريف إن شاء الله : L0vElYGh0sT14
انا مقتنعة جدا بكلامك و فى بنات كتير مش متجوزة بتكون راضية و قنوعة و قادرة تعيش عادى انما المشكلة ان المجتمع مش بيرحمهم زى ما انا قلت و بيبصولها على انها خطر على الرجالة المتجوزيين و ما ينفعش تختلط فى الحياة الاجتماعية لانها اكيد معقدة علشان ما اتجوزتش لسا و خد مندا كتير
بجد يرحموهم شوية لان دا نصيب
=====
صراحتن الموضوع موضوع ثقة بالنفس والذات ... الواحد لازم يكون واثق بنفسه ومش يهمه اي حاجة لأن الواحد لو وثق بنفسه والله هيقف قدام أي مشكلات يقابلها أو سلوك متغير أقصد أن الواحد مش هيتغير سلوكه بسهولة من سلوك الأخرين عليه ودة الي بيخلي الواحد معقد وتحسي أنه متشفر ... الله يحفظنا ويوفقنا جميعاً بأذن الله ... ولازن تعرفي أن الدنيا حلوة ... life is LG
مش قصدي أل جي ماركة الأجهزة لؤؤل أقصد أل جي يعني life's Good
وأضحكي الصورة هتطلع حلوة
تحياتي لكي بالعطور الفرنسية

dina said...

L0vElYGh0sT14
حلوة لايف ال جى دى و الاحلى التحيات اللى بالعطور الفرنسية دى...انا معاك اه ان ثقتك فى نفسك بتأثر جدا فى السلوك خصوصا لما حد يتعرض لموقف معين او مشكلة معينة...بس بردو مش من حق حد انه يعمل ضغط على حد..يعنى الناس مش من حقها تضغط عالعانس زى ما قلنا
تحياتى لك بالعطور الفرنسية بردو

مواطن مصرى نايم said...

دينا انتى بجد فى تالتة ثانوى
لا بجد دماغك كبيرة بجد
الكلام كبيييير عليكى الصراحة
انا الاسلوب عاجبنى بس مش مصدق ان اللى كاتب حد فى ثانوية عامة
هو موضوع مهم
بس وجهة نظرك مبالغ فيها بعض الشئ
مش شرط اللى يتقدم لبنت فى ثانوية عامة يكون فى التلاتينات
ما انا اختى فى تالتة ثانوى قدك
و مخطوبة خطيبها قدى يعنى شاب صغير
و مش شرط برضوا ان ابنت تتخطب فى السن ده
يعنى عادى
و بعدين بقى ابقى اشوفك فى المجمع
حتنورى يا دينا
ان شاء الله النتيجة تطلع حلوة
eslam

إنسان || Human said...

للأسف ...بالتأكيد هايكون شعور المدرسه سيئ للغايه ...لما تيجي بنت ماكملتش عشرين تعرض ألبوم خطوبتها عليها
,,,,,,,,,
العنوسه حلها الوحيد ...هو حل كل مشاكلنا الإقتصاديه

مدحت محمد said...

ههههههههههههههه

متيحة حاتم

لا العنوسة موجودة بكثرة

والله فى بنات ع الاميل بيقلولى شفلنا عريس

مش عارف انا بقيت خاطبة ولا ايه

ماعلينا

انا شايف انى البنت تتجوز بدرى افضل طول مافى عريس مناسب

بدال مابعد كدة متلاقيش عريس ونفسيتها تتعب

dina said...

مواطن مصرى نايم
و الله بجد كلامك دا يشرفنى ربنا يخليك على ذوقك
حقولك على حاجة..ممكن فعلا يكون مش كل البنات اللى بتتخطب بدرى مش بتتخطب لناس اكبر منها بكتير انما انا بردو شفت حالات كدا كتير جدا..هى الفكرة مش فى فرق السن اوى لان دا موضوع تانى غير فكرة ان حد فى سن زى دا يعرف يقرر و يختار صح فى مرحلة كلها تقلبات اصلا..انا حاسة ان دا صعب جدا
و بعدين مجمع ايه بس حرام و الله العظيم يا اسلام..اخرة صبرى على الثانوية العامية
تحياتى

Hu-man
اه و الله فعلا دا ممكن يكون حل للعنوسة بحل المشاكل الاقتصادية لانها فى حالات كتير بتكون السبب فى تأخر سن الجواز ..دا طبعا من غير تقدمه اوى خير الامور الوسط بردو
تحياتى

مدحت محمد
لا مش شرط..ما هى ممكن ترتبط بدرى بحد مش مناسب فينتهى الموضوع بطلاق و انفصال عاطفى و مشاكل من دى كتير انما لو صبرت شوية تقدر هى تختار صح و حد مناسب ليها
تحياتى

Unknown said...

شكرا على الكود يا م/دينا واقولك نصيحه من اخ صغير اوعى تتخلى عن هدفك فى يوم من الايام انتى حتتعبى سنتين فى عمرك اللى هما فى الثانويه العامه وبعدين حتستريحى طوووول حياتك بس تحددى هدفك الاول وبعدين تحققيه فى مثل بيقول
Take Your Descion TO Choose Your Destiny
ترجمى مع نفسك انا مش متاكد من كلمه منهم المهم معناه "اتخذ قرارك لتحديد مصيرك"

dina said...

المبرمج المحترف
لا هو انا مش حتعب سنتين انا تعبت خلاص سنتين و خلصت الحمد لله و عملت اللى عليا و كل اللى اقدر اعمله و خلاص اى حاجة تيجى بعد كدا تبقى بتاعة ربنا بس حقولك على حاجة..ماينفعش تكون الكلية فى حد ذاتها هدف اصلا هى وسيلة لهدف اكبر...يعنى انت عاوز تكون مبرمج وسيلتك لكدا هندسة انما لو مدخلتش هندسة ماتقفش لازم تشوف مليون سكة توصلك لهدفك بالظبط زى دكتور زويل واحد كان عاوز يدخل طب و لما دخل علوم ما قالش مستقبلى ضاع و وقف على كدا انما بالعكس اشتغل و تعب و اخد نوبل و علانا كلنا كمصريين ... دا اللى انا بتكلم فيه...فهدفى عمرى ما حسيبه حتى لو مفيهاش كلية و دا مش غلطتى لانى عملت اللى عليا دى غلطة نظام بيقيس اذا كنت ينفع تدخل طب و هندسة بدرجات العربى و الانجليزى و دخول الحقوق و الاداب بالكيميا و الرياضة
تحياتى

أ / أحمد عبد المنعم said...
This comment has been removed by the author.
ادم المصرى said...

بجد ايام وبنعشها وهنعشها وربنا يوفئك وينجحك بجد وان شاء الله الى جى احسن واجمل

almasry said...

حبيبة قلبى واختى العزيزه دينا


المشكله انك فى نظرتك للبنات نتظرتى نظره محدوده وهى انك بصيتى لبنات مدرسه ثانوى يعنى بنات صفوه وبصيتى لناس فى كليات لاحظى ان فى ناس تانيه فى ثانوى صناعى وثانوى تجارى وفى اللى مش فى مدرسه وفى اللى بيتقدم ليها عرسان لكن بترفض بمزاجها وفى وفى وفى لو جمعتى هيطلع حاصل كبير اللى هو العنوسه فى مصر والعالم العربى

وانا بشجع الزواج فى سن معقوله ليست بالصغيره ولكن بالسن التى تكون فيها البنت قادره على ممارسة شتى انواع مهامها


تحيــــــاتى
المصـــــــــــرى

أحمد بكر said...

بصى يا ستى
هو الشب من دول فى بدايه حياته يرتبط بواحده و الظروف متساعدوش يتجوزها و هى بتتجوز واحد فى التلاتينات يكون كون نفسه و يفضل الشاب يكون نفسه يدوب يوصل التلاتينات و لما يدور يكون عقله فى مرحله البنت الى سابته فيدور على ادها او اصغر ايام مكانوا مع بعض
ربنا يهدى الناس
تحياتى

dina said...

ادم المصرى
ههههههههه
ربنا يسمع منك يا رب و مرسى عالمرور المميز دا

almasry
اه و الله انت لفت نظرى لحاجة مهمة ان انا لما اتكلمت عن البنات صح اتكلمت من مكان واحد بس لان دا هو المكان اللى انا موجودة فيه على طول و متعايشة مع عناصره اعرف ناس براه من اللى انت اتكلمت عنهم دول بس بردو مش بنفس القوة......بس احنا متفقين على ان الزواج لازم يكون زى ما انت ما قلت فى سن مناسب انها تكون اد المسئولية
تحياتى


بيكر
فعلا زى ما قلنا قبل كدا ان الظروف الاقتصادية بتفرق جدا فى موضوع الجواز دا
تحياتى

سارة درويش said...

بوست جامد بيدل على دمااااااااغ جامدة .. مبرووووووووووك أولا انك خلصتى امتحانات ولو انها كده بقت مبروك مخللة ههههههههههه

ندخل بقى فى الموضوع

اول حاجة الاسباب المتخلفة للشاب اللى فى التلاتين وعايز بنوتة ماكملتش العشرين

ببساطة هو عايزها آل ايه قطة مغمضة وعمرها ماحبت حد قبله ولسة ما اتشاقتش ولا عرفت حد .. المصيبة انه بيكتشف انها كانت مرتبطة من أولى ابتدائى ههههههههههههه

ثانيا : بردو عايز قطة مغمضة من ناحية انها تقريباً طفلة وتكش بشخطة واحدة وهيشكلها على مزاجه وطبعا هيعيش سي السيد فى بيته وبينسى انه لما هيكبر خالص ويبقى عجوز هي هتبقى فى عز شبابها وساعتها لو ماكنتش بنت ناس هتربيه بجد وتطلع عليه القديم والجديد

معاكى حق يا دينا تناقضات بتخلى ميزان المجتمع مش متظبط نهائى وبتخلى عندنا مية الف مشكلة .. ربنا يهدي

Empress appy said...

مبروك انك خلصت من الامتحانات وبعدين يا بنتى مش تستعجلى كله بوقته وبعدين مالها الاعداديه يعنى والله بتخلى الواحد بيبى لسه

ذو النون المصري said...

فعلا هي مشكله كبيره ان تجد المدرسه بنت من تلميذاتها تشهر صور خطوبتها و تفرج عليها زميلاتها في المدرسه و ربما المدرسه نفسها تتفرج عليها و تكون كبيره في السن
و مش بعيد تشير بعض الخبيثات من التلميذات للموضوع ذاته باسلوب مستفز للمعلمه
موضوع شائك فعلا

Princess said...

nice topic :)

Unknown said...

اه الموضوع ده كان موجود على ايامى بس و انا فى اولى كلية كان معانا بنات متجوزين كمان و ازواجهم بيوصلوهم الصبح للكلية

بس معقول دلوقتى نزل للثانوية ؟ احنا بنتقدم و لا بنرجع لورا ؟

بكرة يرجعوا التسنين تانى
:)

امال بيقولوا باه فيه عنوسة فى البلد ليه ما شباب مصر اغنية و بيجوزوا بدرى اهوه

dina said...

سمو الأميرة سارة
هههههه
اول حاجة منورانى فى المدونة و الله و دمك زى العسل و انتى قلتى اسباب سببها انانية و ضعف شخصية الشباب لانه متأكد ان شخصيته لوحدها مش حتقدر تبنى بيت فيجيب واحدة شخصيتها ضعيفة اكتر منه و الانانية فى انه مش عاوز واحدة تكون عرفت قبل كدا حد فى حين ان هو تلاقيه مقطع القرش و ديله..و دا و الله مبدأ جميل لانه بيضمن عذرية المشاعر انما لو يطبق عالاتنيين من غير انانية و لا ظلم
تحياتى

appy
اه و الله ذكريات ايام الاعدادية دى...ايام الطفولة المشردة
تحياتى

ذو النون المصري
منور المدونة و الف شكر عالتعليق الجميل و فعلا هو موضوع متشعب جدا و شائك جداااااااااااا

dina said...

Crowned Princess
شكراااااااااااا و منورانى

عاليا حليم
مش عارفة و الله يا عاليا نكونش احنا اللى عاملين العنوسة يعنى ولا ايه مش فاهمة..طب خدى بقى الصدمة دى..انتى بتقولى ان السن نزل لثانوى ايه رأيك اعرف بنات فى اعدادى و الله و بيجيلهم عرسان و انا ماتكلمتش عنهم لانهم مش اغلبية اوى انما موجودين و الحمد لله
و على رأيك بكرا يرجعوا التسنين تانى
تحياتى

د.محمد ربيع هاشم said...

عجبتني المدونة جدا ، والأجمل إنك أهلاوية مثلي

dina said...

د.محمد ربيع هاشم
ربنا يخليك و اهلا بيك فى المدونة منورنى و اهلا بكل الاهلاوية
تحياتى

عابرة said...

اولا اريد شكرك جزيل الشكر لما قدمته لنا في هذه الحلقه
واريد ان اخبرك بأن هذه الظاهره ليست موجوده فقط في مصر بل في جميع دول العالم ولهذا اصبحنا نتعايش مع تلك الظاهره اينما كنا
ولا اعرف ماذا اقول ايضا لانك تكلمة بما فيه الكفايه
تقبلي مروري.......

dina said...

عابرة
منورة المدونة و انتى اديتينى معلومة انا فعلا مكنتش اعرفها...انا كنت فاكرة ان الموضوع دا فى مصر بس و كبيره فى الدول العربية المجاورة يعنى انما كمان يبقى فى كل العالم دا اللى انا مكنتش اعرفه
تحياتى