Tuesday, July 8, 2008

روابط مهملة


اصبح الامر اشبه بمن يمشى فى حلم..عفوا فى كابوس طويل اثناء نوم 14 ساعة...هذا هو حالى و انا امشى فى الشوارع طول ما انت ماشى تسمع المصطلحات الاتية...اجنبى لا عربى
اهلاوى..زملكاوى
مسلم..مسيحى
مصرى...خليجى ..لبنانى
عمرو دياب..لا طبعا تامر حسنى
لا افهم ما الحكمة من كمية الانقسامات اللى نبتكرها ببراعة كل يوم اكثر من اليوم اللى كان قبله على رأى حماقى طبيعى ان يختلف الناس ..و اكرر يختلف و ليس يتخالف ,و نحن معترفين بذلك حتى فى امثالنا الشعبية..بنقول كل شيخ و له طريقة و كل دار و لها مدار و صوابعك مش زى بعضها..فهناك لحظات نختلف فيها الخلاف الطبيعى الذى لا يؤدى لاى مشاكل او خلافات...طبيعى ان اكون مسلمة تربطنى علاقة صداقة ببنوتة مسيحية و تكون علاقة ناجحة دون النظر الى دين..بالطبع سنفترق و نتذكر الاختلاف لحظيا..فى يوم الاحد او الجمعة فى وقت اداء الفرائض و عادى بردو ان اتعرف على زملكاوية ولا اتذكر ذلك الا فى نهائى الدورى المصرى الذى نادرا ما يستحوذ عليه احد غير الاهلى و الزمالك و الاسماعيلى
لا افهم ما اهمية كمية الاختلافات التى نخترعها و كأننا معجبيين بفكرة تباعد وجهات النظر..و النكتة بقى اننا هما هما اصحاب نظرية المؤامرة..فنحن كعرب لدينا فطرة تقول ان المخطط الامريكانى اننا نتقسم و نتفرق حتى يتسنى لها هى و بنتها الصغيرة اسرائيل الاستحواذ علينا..و تعالى ننزل الشارع دلوقتى و اسأل اى طفل صغير حيقولك بث يا عمو امليكا بتستهبل..تقوله و عرفت منين يا حبيبى حيقولك بابا قال كتا امبارلح لتانت فوذية...بصرف النظر عن الخناقة اللى حتحصل بين ماما و بابا لما تعرف ان المحروس كلم فوزية و بصرف النظر عن صحة نظرية المؤامرة او عدم صحتها..انما ما لا افهمه هو كيف نلوم على غيرنا رغبتهم فى تفتييت وحدتنا و نبتكر نحن الاختلافات و الانقسامات فيما بيننا لتدمير هذه الوحدة..انا لست ضد فكرة الاختلاف..فهناك اختلافات تثرى بلادنا..اهلى و زمالك و اسماعيلى يعنى دورى قوى..مسلم و مسيحى يعنى وحدة وطنية..حزب وطنى و جماعة محظورة يعنى خطوة نحو المشاركة السياسية ماتفهمش الخطوة لادام ولا لورا..المهم مش موضوعنا..مصرى بارادة و عزيمة مع خليجى بشوية دنانير يعنى وطن عربى قوى..انما النكتة البايخة بقى الاختلافات التى لا معنى لها ولا فائدة منها...عمرو دياب ولا تامر..ما تسمع اللى تسمعه يا ابنى..ولا بنات المنصورة ولا بنات اسكندرية...ما تتنيل تظبط من اى حتة..فأستعجب من كمية المشاحنات التى تنشأ بسبب اختلافات بدعناها و صدقناها و عشنا فيها..دا احنا حتى فى الدين الواحد بنختلف ...بنختلف فى الدعاة اللى بنسمعهم و فى السنن و فى كل ما هو فرعى..ولا نلتفت حتى اننا من نفس الاصل..فعادى ان تجد شد بين محبى عمرو خالد و محبى مصطفى حسنى و معز مسعود من جهة و انصار حسين يعقوب و وجدى غنيم و غيرهم من جهة اخرى..و لكنى ارى ان التنوع فى اى شىء مطلوب فهو يعطى فرصة اكبر للمتلقى لاختيار ما يناسبه و ما يتلائم مع سنه و ثقافته و فلسفته..انما تقول لمين
و ربنا يخلى منير اللى قال...لا يهمنى اسمك لا يهمنى عنوانك..يهمنى الانسان..الانسان..فى النهاية كلنا اخوات فى الانسانية و دى مش بمزاجك يا حدىء دا هما ابوك ادم و امك حوا اللى حطوك فى الوضع دا...اتمنى ان نتقبل الاختلافات الطبيعية و ان نجد المزيد من المناطق المشتركة و نتذكر روابطنا المشتركة المهملة روابط الانسانية و روابط العربية و الروابط المصرية بصرف النظر عن الروابط الاخرى فيما بيننا حتى نحافظ على اجمل ما فينا..ان نظل يدا واحدة ولا تنتقل الخلافات فى الفروع الى الاصول فى يوم ما

43 comments:

blue-wave said...

لأننا اتفقنا على الا نتفق
تحياتى

. said...

i am new in blogging world
this my blog
http://aliaawwe.blogspot.com
waiting for your comments
thanks

Mohamed Hesham Safa said...

كلامك عداه العيب وأزح ...

dina said...

blue-wave:
اه و الله الجملة دى لما اخدناها فى المدرسة كنت فاكره الافغانى بيبالغ انما طلع معاه مليون حق
تحياتى

aliaawwe
اهلا بيك معانا بس كنا عاوزيين نعرف رأيك فى المدونة يعنى ليه الافش على طول كدا
تحياتى

mohamed hesham
ههههههههه
الله يخليك

Mkjwe said...

مدونة جميلة صراحتن وبوست أروع وأهم شيء بالموضوع والي اعجبني صراحتن فيه الحتة بتاعت ماتفهمش الخطوة لادام ولا لورا أههههخخ
وإلا بنات المنصورة ولا بنات اسكندرية...ما تتنيل تظبط من اى حتة.لااااااا وألف لا أحتج وأعترض وأرفع أصبعي المبهم لأعلى أعتراضاً وربما أنتقاداً على هذا السطر بالذات أعتقد بأن بنات أسكندرية أكثر أنفتاحاً من بنات المنصورة وما نتطرق اليه يا عزيزتي الفاضلة أننا نبحث عن الصيد السهل أو الفريسة السهلة من حيث جميع الأتجاهات المختلفة الجميلة والبريئة وربما الخبيثة ... الموضوع كبير كبير كبير .... أما عن الفلسفة فيقولوا عنه الفلسفة والضرب على القفا ... نهاية الموضوع
الدنيا دي فانية
وكل واحد حر بنفسه
محدش يقدر يتحكم فيه او في تصرفاته او في اعماله
ربنا اداله عقل يميز بيه بين الصح والغلط
والتفرق والمميزات الي بتشوفها بين الناس دي نتيجة لتخلف المجتمعات العربية وجهلها صراحتن وما يجلعنا عبرة للغرب ومحور سخرية ولأنهم يعلمون أننا أفضل منهم فلا يريدون أن نتفق في شيء أو نكون كيد واحدة كما كنا في الزمان أسياد الأرض
الله يهدي الجميع
ولا تؤاخذونا بموضوع بنات المنصورة ولا اسكندرية صراحتن كنت بهزر معاكي وفي الحقيقة مافيش احلا من بنات روسيا أهههخخخ
تقبلي مروري ومشاركتي

محمود حسن العدل said...

بوست جميل ومدونة جميلة تحياتى ليكى
فاانا لااجد تعليق يليق بكلامك
تحياتى

dina said...

L0vElYGh0sT14
عارف هى المشكلة لو فى الغرب و بس كانت عدت انما احنا نفسنا مش قادرين نستوعب بعض و بنيجى فى الهايفة و نتصدر و بدل ما تقبل اللى ادامك و تشوف المشترك بينكم لا تدور الاول على المختلف الناس بقت عجب و الله يا ابنى...اخرتها بنات روسيا
هههههههههههههه
مرسى عالرد العسول دا و يا ريت الزيارة تتكرر
تحياتى


محمود حسن العدل
يا رب يخليك دا كلامك دا احلى تعليق ممكن يجى بجد شرفتنى و يا ريت الزيارة تتكرر ان شاء الله و تنور المدونة تانى

Zika said...

مش عارف هعلق اقول ايه
بدون مبالغه البوست ده في دماغي من فترة كبيره
فعلا بوست رائع
فعلا احنا بقينا نتلف لمجرد الاختلاف
وبنسيب حاجات اساسيه وبنختلف علي حاجات هايفه
تحياتي يا دينا

بحبك يامصر said...

السلام عليكم
انا متشكر ليكى على مرورك بمدونتى وتعليقك فيها وانا قلت اجى ارد الزياره بس عجبنى البوست وناوى اكون زبون للمدونه دائم بس لو المنتج زى البوست ده بجودته هههههههههههههه ههههههههه
انتى عارفه انا بحس المشكله فى ايه انا بحس اننا بنختلف عشان خالف تعرف انا هشوف الناس بتقول ايه وهقول العكس عشان اسلط الضوء عليا بحس ان الكل بيعمل كده وكمان لما بيكون فى خلاف بتناقش عشان اطلع كسبان وفايز فى النقاش مش عشان اعرف الصح واتعلم واثقف نفسى
بحس ان الشباب بقه ده تفكيرهم
سطحيه يافوزيه
تحياتى

Desert cat said...

كل اللى وصفتيه ده موجود يا دينا ومش حينتهى
لان فى اللى عامل نفسه حكيم زمانه واللى فاهم وعالم ببواطن الامور
وكل اللى قدامه همج ومعندهمش عقل
المهم لما تلاقى حد بالشكل ده اغسلى ايديكى منه بالتراب 7 مرات
تحياتى

kmt said...

السلام عليكم ورحمة الله وبركاته

مافيش كلام بعد اللي قولتيه
بس ليا سؤال
هو انت فعلا في ثانوية عامة

ربنا يبارك لك لان كلامك كلام بجد كبيييييييييييييييييييييير

علي فكرة اللي قال ان مصر شبابها هايف هو اللي هايف

تحياتي
الي اللقاء

""""" said...

يا حدىء دا هما ابوك ادم و امك حوا اللى حطوك فى الوضع دا

_______________________________

مش عارفه ليه الجمله دى طالبه معايا ضحك
هههههههههههههههههه

انتى عسل اوى يا دينا

تعرفى انا كتير بفكر لو مكانش سيدنا آدم وامنا حواء خرجوا من الجنه

كان هيبقى ايه الوضع

الجنه كانت هتكفينا كلنا ؟

اه ومكنش هيبقى فى لازمه للنار كمان

شفتى احنا متورطين فى الحياه ع الارض اذاى
ربنا يعفو عنا

هتفضل فكرة الاختلاف الى يوم الدين

حلو اوى البوست يا دينا
ودمه خفيف

مرسى يا قمر

Empress appy said...

من رحمه ربنا علينا انه اوجد الاختلاف فى الاراء
بس موضوع تقبل الاخر بقى صعب اذا كنا يا دينا مش قابلين نفسنا هنتقبل الاخر فهمتى الموضوع

sebofy7alo said...

أول تعليق
على فكرة التنوع دة شىء لذيذ جدا وانا من المؤيدين فعن نفسي بحب أفتكس مصطلحات جديدة من باب كسر حالة الملل والرتابة اللي عايشينها يعني مثلا لما أقابل أصحابي المقربين فاقول
أفندينا وحشتني موووووز باللبن والحليب
أو
إكسلانس كيفك يا مان
أو
برنس المواهب الفاشلة فينك
كدة يعني كل شوية حاجة جديدة وبيبقوا مبسوطين جدا
وهايات كثيرات ليكي

dina said...

Zika
و الله دا شرف ليا انى خطفت البوست دا من دماغك..بس الفكرة بس ان يا رب الناس تتغير شوية
تحياتى

بحبك يامصر
ههههههه
سطحية يا فوزية...اول حاجة انا مبسوطة اوى بالزيارة دى و شرفنا بقى كتير و احنا بنتوصى بزباينا فى البوستات و فعلا انت اتكلمت فى نقطة مهمة جدا...فكرة خالف تعرف دى و دا فعلا ممكن يكون سبب
تحياتى

Desert cat
هههههههه
حلوة اغسلى ايدك بالتراب منه بس المشكلة انا كدا على طول حاخد معايا التراب تيك اواى
تحياتى

kemet
و الله العظيم زيارتك للمدونة بتاعتى بتبسطنى جدااااااااااااااا عشان بجد بترفعى معنوياتى...و الله العظيم انا فى ثانوية عامة بس خلاص داخلة كلية و دعواتك بقى تبقى كلية جامدة كدا
تحياتى يا قمرة

dina said...

amal
ههههههههه
اه و الله ما دا اصل المشكلة ان الاختلاف من هنا لحد ما الدنيا تخلص و مش حينتهى و يا تتأقلم يا تتألم و بجد مرسى اوىىىىىى على مرورك
تحياتى يا امولة

appy
صح و الله يا ابى الناس مابقتش قابلة نفسها اصلا عشان تقبل غيرها و دا اصل المشكلة
تحياتى

sebofy7alo
فعلا دى صورة للتنوع انما حتى تنوع الناس فى افكارهم و طريقة تفكيرهم بيبقى ممتع
تحياتى

صوت من مصر said...

دينا بجد تسلم ايدك البوست فى حاجه فيه بتقول للى بيقراه تعالى اقرانى تانى ؟

dina said...

صوت من مصر
الله عالكلام
ما هو لو كان اللى بيقرا من زباينا لازم ييجى تانى..ما انا بردو مصرية و واخدة من النيل و اللى ييجى مدونتى بييجى تانى
ههههههه
بجد مرسىىىىىىى عالكلام الجميل يا محمد يا رافع معنوياتى و مؤة عاملة ايه؟طمنا عليها بقى
تحياتى

Unknown said...

السلام عليكم
ازيك يا قمر

مش قادر اقول غير معاكي حق
والغريب ان كلنا بنقول كده وكلنا بنختلف وانا كمان
دايما بتعصب لرأيي
ع العموم ربنا يهدي

تحياتي

فزلوكة said...

بصى أنا معاكى إن إحنا فى النهاية
انسان
مهما اختلفت ديانتنا أو ثقافتنا
لكن من المفروض أن نحافظ على هويتنا سواء كانت هويتنا العربية أو الإسلامية وحتى المصرية

:::::::::
أما الإختلاف
فوالله يا بنتى الموضوع دا تعبنى
أيام حرب العراق سمعت إبراهيم عيسى بيقول كلمة عجبتنى جداا
بيقول إحنا عمالين نقول إن الإحتلال الأمريكى يشبه تماما حملة التتار لكن للأسف بنمارس نفس أخطاء العرب فى ذلك الوقت من التفرق, والإنقسام

يا بنتى إحنا أكتر ناس تبرع فى الكلالالالالالالام
نيجى للتنفيذ بقى
؟؟؟؟؟؟؟؟؟؟؟؟؟؟

مواطن مصري said...

اتفق معاكي يا دينا
يهمني الانسان

dina said...

bar2ash
ما كلنا بنقول كدا صح انما حنا عايزين بقى نبطل كلام و نبدأ فى الفعل عشان نحافظ على الروابط الحلوة اوى اللى بتجمعنا ببعض
تحياتى

فزلوكة
تمام يا فزلوكة..انتى اتكلمتى فى حاجتين مهمين اوى اول حاجة فكرة اننا نحافظ على هويتنا و دى فعلا حاجة مهمة اوى و محتاجة شوية تدريب لحد ما نقدر نقبل الاخر من غير ما نلغى نفسنا...جملة ابراهيم عيسى بجد تجنن و انا كنت لسا بقول لبرئش لازم نبطل كلام او حتى مش نبطل كلام عشان الكلام خطوة بردو انما ننتقل لخطوة ابعد شوية من كدا و نبدأ ننفذ و نبدأ بنفسنا كمان
تحياتى

dina said...

مواطن مصري
و الله يا ريت الناس كلها تتفق مع منير و تعرف ان فعلا(يهمنى الانسان) و تبقى دى ثقافتنا
تحياتى

mostafa rayan said...

طبعا كلامك صح وياريت نعمل بيه

arsenalwy said...

دينا

كلامك حكاية والله أنتى مثال للبنت المثقفه الواعيه كلامك رائع وياريت نسمع ونفهم الكلام دة ونحاول نبعد شوية شوية عن التعصب الأعمى لدين أو نادى أو حزب

بس دة ميمنعش أن أحنا هنكسب الزمالك الماتشين الجايين ولا ايه؟؟؟

سلام ياأهلاويه

أنا حر said...

في فرق بين الاختلاف والتخلف واللي عندنا للاسف تخلف اصابنا من زمان
تحياتي

محمد فاروق الشاذلى said...

الاختلاف فى حد ذاته أمر عادى وصحى إلى حد ما ولكن مهم جداً أن نتعلم ونحن نختلف كيف نحترم وجهات نظر الآخرين ونقدر إنحيازهم لوجهات نظر أخرى فى الحياة حتى لا يدمرنا إختلافنا.
وأشكرك على البوست الجميل ده

Anonymous said...

بجد يادينا توبيك هايل

وكلامك فىجميل جدا
وبجد عجزت عن التعبير بمدى ابداعك

تقبلى مرورى

dina said...

mostafa rayan
يا ريت و الله يا مصطفى كلنا نعمل بيه من عندى انا لحد كل مصرى فى الشارع
تحياتى

arsenalwy
و الله دا انت اللى كلك ذوق بجد و دايما رافع معنوياتى..بس دا ميمنعش بردو اننا حنكسب الزمالك ان شاء الله و دا مش تعصب دا حلم مشروع و الحمد لله الاهلى دايما محقق احلامنا
مرسى عالمرور المميز اوى يا اهلاوى

أنا حر
صح فعلا فى فرق كبير من اختلاف عادى و اختلاف يؤدى لخلاف و بعديه تخلف و دا بتاعنا بقى
تحياتى

قلب مصرى
تمام و الله تقبل الاخر كتير بيكون مفتاح سعادة فى الدنيا و انا اللى بشكرك على الزيارة الكريمة و يا ريت تتكرر
تحياتى

مواطن زهقان
يااااااااا خبر عجزت عن التعبير ايه بقى دا انت ثبتنى و انا اللى عجزت عن الرد..بجد مرسى عالمرور الرقيق دا و نورت مدونتى المتواضعة

محمود ابوالعزم said...

انا شخصيا مش عارف ليه الخلاف دا كله
مرة كانوا ناس كتير من اصحابي معزومين عندي في رمضان
ولما المغرب أذن
اختلفوا بصورة كبيرة جدا
نصلي في البيت ولا في الجامع
لان الجامع اللي جنبا مدفون فيه حد
وفجاة الضحك اللي كنا بنضحكه انقطع بسبب الخلاف ده

موضوع جميل اوي
ربنا يوفقك

yasmina said...

في اغنية بتقول
انت مين انا ما بفهم اي لون واي دين
انت خيي خيي بالانسانية

فعلا الاختلاف طبيعي ويجب تقبله
تحياتي لك ولتدويناتك الرائعة

مواطن مصرى نايم said...

يا بنتى انتى ثانوية عامة بجد
لا لا لا لا
برضوا دماغك كبيرة
تصفيق حاااااااااااد
بس ممكن بعد كده لما تحبتى تتكلمى عن عمرو دياب و تيجبى وراه سيرة
الواد ده اللى ميتسماش تامر بتاع ده
تقولى كالاتى
عمرو دياب الكنج و بعدين
تنزلى تحت يجى خماشر تماناشر سطر

















كده
و تكتبى الواد تامر
لعلمك انا الشئ الوحيد اللى نرفزنى فى البوست
اسم الواد ده
بس البوست كله جميل
لانك زى ما بقولك دماغك كبيرة
الله ينور عليكى
يا بت بلدى
اسلام

semsema said...

كانوا بيقولوا زمان الاختلاف فر الرأي لايفسد للود قضية بس دلواتي مش عارفة غيروا المقولة دي ولا ايه
مدونة رائعة بجد
وكلمات اروع من عقل مفكر رغم صغر سن من يملك هذا العقل
سعيدة بزيارتك لمدونتي وزيارتي لمدونتك
تحياتي

dina said...

محمود سليمان ابو العزم
يا دا فى رمضان احلى حاجة اننا كلنا نتجمع فى وقت واحد على فطار واحد و فرحة واحدة كمان دى بنختلف عليها..كان ليا حق اكتب البوست بقى
تحياتى

yasmina
ياسمينا..اسمك على اسم اختى و كلامك فعلا جميل و حقيقى اوى و يا ريت نقدر نظبقه
تحياتى

مواطن مصرى نايم
بجد احلى حاجة ممكن تنادى بيها حد انك تقوله يا ابن بلدى او يا بنت بلدى فمرسى على اننا اتفقنا اننا ولاد بلد واحدة لا و انا متفقة معاك كمان فى موضوع تامر دا بصرف النظر عن المقارنة بينه و بين اى حد بس انا مفيش عمار بينى و بينه اصلا..و بجد مرسى كمان عالكلام الجميل دا و منور المدونة
تحياتى

semsema
لا يا سمسمة الكلام هو هو بس احنا اللى اتغيرنا و خلقنا ضاق على بعض
و بجد مرسى اوىىىىىىى عالكلام الجميل دا
منورانى فى المدونة و تحياتى ليكى يا جميلة

Mohamed Hesham Safa said...

فين الجديد ؟؟

مستنيكي

والسـ ختام ــلام

FaceMoon said...

جميل الموضوع جدا جدا
وواقعى للغاية
هو دة مجتمعنا كلة انقسامات
مقولتليش صحيح انتى اصالة ولا انغام
هههههههههههههههههه
وحشتينى اوى
تحياتى وتقديرى

Cold air said...

صباح الخير
إسلوبك في الكتابة رائع و شيق
و حقيقي صورة البوست تحفة و أحييك علي دقة الإختيار
و بالنسبة للموضوع فأعتقد أنه أصبح من الصعب بل من المستحيل تغيير ثقافة شعب بأكملة وعذرا
فالطبع يغلب التطبع
و فعلا أنا جربت الموقف ده كتير بالكورة و بأحداث تانية كتير
بوست مميز

تحياتي وسلامي

Unknown said...

عندك حق فى كل اللى قلتيه انتى عارفه الشعب المصرى دا والله غلبان اى حاجه يسمعها تلاقيه يسيح على طول والاشاعات تكتر بين الناس اللى قال فى سلعوه بتطلع ع الناس ف البيوت وتخبط ع الناس وتقتلهم ...ه هبالة والله بس بينى وبينك مفيش شعب زى مصر فى الاخوة والمودة وبالذات ما بين المسلمين والمسيحين وبعدين شعب كريم جداا مش بخيل باستثناء المنايفه..ههههههه
وبعدين الشعب انهار من الحكومة يعنى خلاص الشعب فصل شحت من قلة الفلوس غلاء الاسعار و الديون والجمعيات وكل حاجه ...على العموم شكرا على الموضوع دا وحستنى موضوعك اللى جاى متتأخريش علينا..وانا برده

نزلت موضوع جديد عن ازاى نحول ملف الى صيغة Mp3
من غير برنامج
حستنى مرورك
تحياتى

ahmed_k said...

السلام عليكم
في البدايه انا دي أول مره يسعدني الحظ وادخل مدونتك
وان شاء الله لن تكون الأخيره
بجد مدونه جميله ومواضيعها قيمه
ربنا يوفقك
وبخصوص بوست اليوم
نحن ان لم نجد ما يفرقنا ابتكرنا ما يفرقنا
اي اننا لا نستطيع ان نعيش بدون خلافات بيننا
وعلي رأي هيكل
من حق امريكا واسرائيل ان تعمل علي تفريقنا لحماية مصالحهاولكن المشكله ايه رد فعلنا احنا في مواجهة تلك المخططات

تقبلي مروري ودمتي بكل ود

Shaimaa Zaher said...

جميل يا دينا

بس بصراحة دلوقت صعب إن الواحد حتى يكون ع الحياد ،حتلاقي ناس دايما بيصنفوكي يا أهلي يا زمالك

يعني حتى الحياد أصبح صعب جدا
تحياتي

dina said...

mohamed hesham
كله جاى يا محمد بس واحدة واحدة عليا عشان اظبطلكم حاجة حلوة كدا
تحياتى و الف شكر عالمتابعة

FaceMoon
ياااااااااااااه
حمد لله عالسلامة و الله بجد ليكى وحشة يا قمراية انتى..انا اصالة ولا انغام..انا عدوية الاب
هههههههه
حرد حاضر
و ماتغيبيش كدا تانى علينا

Cold air
اهلا بأول مرور عالمدونة بتاعتى و بجد عاوزة اشكرك على كلامك و انا مبسوطة ان البوست و الصورة عجبوك..بس فى موضوع الطبع يغلب التطبع دا انا مش معاك اوى..الانسان فعلا ممكن يتغير بس لو مقتنع انه لازم يتغير انما لو مثل انه بيتغير على نفسه و عالناس دا مش بيطول و هنا يبقى الطبع يغلب التمثيل بقى....انما اى حاجة سلبية ممكن تتغير و الا مكنش بقى فى علوم تنمية بشرية و كلام من دا
تحياتى

dina said...

المبرمج المحترف
انت طبعا معاك حق ان الناس تعبانة انما دورنا بقى اننا نحافظ عالحلو اللى عندنا و ماننساش اننا اخوات فى تعبنا دا
تحياتى

ahmed_k
دا انا اللى سعيدة جدا بالمرور الكريم دا و مبسوطة اوى من جملة هيكل اللى بجد اثرت ردك و دعمت البوست اوى و دلت على ثقافة كاتبها
تحياتى

Shaimaa Zaher
طبعا صعب يا شيماء اننا نكون عالحياد ما بالك بقى لما نقول كمان اقبل اللى ضدك..طبعا صعب انما يا ريت ربنا يوفقنا و نقدر نكون كدا و نبدأ بنفسنا
تحياتى يا جميلة

قديسك مولاتى said...

سلامو عليكو .انا ضيف جديد على مدونتك ..وعجبتنى فكره موضوعك اوى ..احب المح لحاجه مهمه جدا وهى ان الاختلافات البسيطه دى هى فى نهايتها اتفاق ...بمعنى .ان كنا بنختلف ان كان تامر حسنى ولا عمرو فزمان كل الناس اتفقت على ام كلثوم وان كل الناس اختلفت على الزمالك ولا الاهلى فكلهم اتفقوا على المنتخلب لما بيلعب . حتى فى الدعاه والشيوخ احنا فى النهايه بنتفق فى الدين .. لكن لو هاتحبى تتكلمى عن الاختلافات اللى لا بتودى ولا بتجيب ويمكن كمان تجيب بلاوى معاها فده سببه حاله الضغط النفسى اللى بيعيشوا الشعب المصرى واللى قربت على الانفجار ومحاوله للبحث عن اى شىء جديد او اثاره اى بلبله علشان نلاقى حاجه نتكلم فيها ...اه قبل ماانسى انا لقيت كلهم بيتفقوا على بنات المنصوره انهم الاحلى ...سلاموا عليكوا