حـــــــــــــوار

من بين كل الرغى اليومى حوارات قليلة جداً فى الشهور الأخيرة اللى أقدر أقول إنى منسيتهاش , لأنها لا تنسى , لأنها جديرة بأن تحفظ فى الذاكرة , لأنها لمست عمق ما فى القلب أو فى العقل , لأنها كانت صادقة ..لأنها كانت ببساطة كلام "بنى اّدم" ل"بنى اّدم" و برقى حوار"إنسان " ل"إنسان "..

*مش كل بنى اّدم إنسان بالمناسبة ! *

واحد من الحوارات دى كان امبارح ..

- 1 -

* أنا حاسة إنى بكبر فى اليوم 20 سنة

- لسة. أول ماتعرفي إنك بتكبري في اليوم يوم بس هتبقي كبرتي, أول ماتحسي إن الدنيا مبهوقة عليكي وانك بتمشي بالراحة فيها هتبقي كبرتي .

-2- 

* حياتى مش طبيعية 

- س مين قال إننا مقدرلنا نعيش حياة طبيعية ؟ عاوزة تعيشى حياة طبيعية ؟ عيشى لنفسك ..لو عشتي للناس انسي الطبيعي !

* فى مستوى تجرد معين محتاج توصله لو كنت بجد بتدور على الحقيقة .. مستوى يخليك مش بتدور على الحياة السهلة و لا الطبيعية لو كنت فعلاً تنشد ما هو أعلى ..

بس السؤال : ليه مانقدرش نعيش لحاجة كبيرة و بردو من غير ما الناس كلها ما تتوجع كدة ؟

و لو أنى عارفة أن محدش بيتعلم بطريقة تانية !
- ربنا مخلقش الدنيا مرة واحدة ..

طب ليه خلق الكون علي مراحل ؟ مش ده فيه درس لينا ؟

مهما كان قضيتك كبيرة ف هي ممكن تتجزأ

-3-

* أنا مش بعرف استسلم .. و عمرى ما كنت بثبت عشان قادرة.. بالعكس فى الغالب ببقى مخلصة خالص..بس بثبت عشان عمرى ما حسيت إن من حقى رفاهية الاستسلام دى
-ماتستسلميش ، بس ماتعمليش زي الثور في رباعيات صلاح جاهين وتعاندي وتكملي عالفاضي "طب بس خطوة كمان وخطوة كمان ، يا أوصل نهاية الساقية يا البير يجف"..جربي حلول وسكك تانية

-4-

*مخى شبه الشجرة باين .. أصل و منه تفريعات كتير 
-أو شبه النافورة ,النافورة منبع ومصب. والمصب منفد عالمنبع تاني. *منها وإليها*

أو علي حد تعبيرك الشهير

بنلف ف دواير

 

 

-5-

- كلنا شبه بعض

*كلنا شبه بعض ..

بس فرق النسب فى التركيبة..

 

-6-

- مش بتخافي عليهم من الموت. بتخافي من المجهول..

It's the unknown we fear when we look upon death and darkness.

عشان كدة ، في سلسلة مفاتيحي هتلاقي حرف D عشان يفكرني بضيف هيشرفني ف آخر رحلتي..
الموت .. Death 

-7-

* كل النهايات بدايات جديدة
-جسمك بيرد النيتروجين للأرض
* و روحك للسما

و فينا كلنا من الاتنين روح برقى السما .. و طين بدنو الدنيا 

عاوزة أخف .. أخف من كل حمل رابطنى لتحت .. أنا أصلاً من فوق .. عاوزة أفضل بالرقى دة .. عاوزة أحافظ على روحى من كل القرف و العك

عاوزة أسلّمها زى ما أستلمتها

-8-

-ماتدوريش علي الرقي

أو الارتقاء

انشغلي بالدنيا "الواطية"

انغمسي فيها وصلحي منها قد ماتقدري

بكل إنش تصلحيه في الدنيا هترتقي قدم لفوق.

سهلة ؟

بمعني آخر ، ماتستعجليش عالهدف.

كل أما بتنضفي طينها بتديلها من طينك النضيف

ف نسبة الطين فيكي تقل بالنسبة لمجموع الطين والروح

ف تقربي تبقي كائن نوراني أكتر

ف ترتقي

سهلة ؟

فقالت : دنو الدنيا سلمة للارتقاء .. مش عبء